تۇڭعىش پرەزيدەنت كۇنى قارساڭىندا ەلوردادا Nur Otan پارتياسىنا ءارتۇرلى قىزمەت سالالارىنداعى بەلسەندى ازاماتتاردى سالتاناتتى قابىلداۋ شاراسى ءوتتى. پارتيانىڭ ءباسپاسوز قىزمەتىنىڭ مالىمەتىنشە, پارتيا قاتارىنا بارلىعى 1,5 مىڭعا جۋىق ازامات قوسىلدى.
پارتيانىڭ جاڭا مۇشەلەرىنە توراعانىڭ ءبىرىنشى ورىنباسارى باۋىرجان بايبەك پارتيا بيلەتتەرىن تابىستادى. ونىڭ ايتۋىنشا, ەلىمىزدىڭ تۇڭعىش پرەزيدەنتى نۇرسۇلتان نازارباەۆتىڭ جانە حالىقتىڭ ەرەكشە قولداۋىنىڭ ارقاسىندا Nur Otan پارتياسى بۇگىنگى تاڭدا ۋاقىت تالابىنا سايكەس ماڭىزدى رەفورمالار جۇرگىزىپ وتىرعان ەلىمىزدىڭ جەتەكشى ساياسي كۇشىنە اينالعان. Nur Otan پارتياسى ارقاشان نەگىزگى ءۇش قاعيدانى باسشىلىققا الادى جانە ونى بەرىك ۇستانادى. بۇل – جاۋاپكەرشىلىك, بىرلىك جانە ورتاق ماقساتقا دەگەن ادالدىق. ءبىز الداعى سايلاۋ ناۋقانىنا تىڭعىلىقتى دايىندالدىق. ءار ءوڭىر, قالا جانە اۋدانداعى الەۋمەتتىك-ەكونوميكالىق احۋالدى تالداۋ نەگىزىندە سايلاۋالدى باعدارلامالاردىڭ 216 جوباسى ازىرلەندى. مەملەكەت باسشىسى قاسىم-جومارت توقاەۆتىڭ «حالىق ۇنىنە قۇلاق اساتىن مەملەكەت» تۇجىرىمداماسىن ىسكە اسىرا وتىرىپ, پرايمەريز بارىسىندا حالىقتان 20 مىڭعا جۋىق تالاپ-تىلەك جينالدى. ولاردىڭ باسىم بولىگى پارتيانىڭ الداعى بەسجىلدىق «وزگەرىستەر جولى: ءار ازاماتقا لايىقتى ءومىر!» سايلاۋالدى باعدارلاماسىنا ەنگىزىلدى. العا قويعان ماقساتتار مەن مىندەتتەردى ساپالى جۇزەگە اسىرۋ پارتيانىڭ ءاربىر مۇشەسىنە بايلانىستى» دەپ اتاپ ءوتتى باۋىرجان بايبەك.