«Nur Otan» پارتياسىنىڭ توراعاسى ن.ءا.نازارباەۆتىڭ پرايمەريزدىڭ باستالۋىنا بايلانىستى ۇندەۋى
قۇرمەتتى وتانداستار!
پاندەميا سالدارىنان قازاقستان بۇكىل الەم ەلدەرىمەن بىرگە كۇتپەگەن قيىندىقتارعا تاپ بولىپ, جاھاندىق داعدارىستىڭ ەڭ قيىن كەزەڭىن باستان وتكەرۋدە.
الەۋمەتتىك-ەكونوميكالىق احۋالدىڭ كۇرت ناشارلاۋى ناتيجەسىندە دامىعان مەملەكەتتەر دە داعدارىسپەن كۇرەسۋدە.
مۇنداي جاعدايدا كەز كەلگەن ۇكىمەتتىڭ الدىندا تۇرعان ەڭ وزەكتى ماسەلە – ەكونوميكانىڭ دامۋى جانە ەل ازاماتتارىنىڭ دەنساۋلىعى.
بىزگە حالىقتىڭ قاۋىپسىزدىگى مەن اماندىعى ءۇشىن بار كۇش-جىگەرىمىزدى سالۋ ماڭىزدى.
سوندىقتان پرەزيدەنتىمىز, ۇكىمەتىمىز كوپ شارالاردى قولعا الىپ جاتقانىن بىلەسىزدەر.
وسى ورايدا مەديتسينا قىزمەتكەرلەرىنە ەرەكشە العىسىمدى بىلدىرەمىن.
ولار پاندەميانىڭ العاشقى كۇندەرىنەن باستاپ كوروناۆيرۋسقا قارسى كۇرەستىڭ الدىڭعى شەبىندە ءجۇر.
ەرىكتىلەرگە دە العىسىم شەكسىز.
«ءبىز بىرگەمىز!» اكتسياسى اياسىندا عانا «Jas Otan» بارلىق مۇقتاج جاندارعا قولداۋ كورسەتكەن بەس مىڭ ەرىكتىنىڭ باسىن بىرىكتىردى.
ارينە, كەمشىلىكتەر دە بولدى.
كوروناۆيرۋس داعدارىسى مەملەكەتتىك باسقارۋدىڭ كەيبىر سالالارىندا ولقى تۇستار بار ەكەنىن دە كورسەتتى.
جەدەل ارەكەت ەتۋ جاعى جەتىسپەي جاتتى, ماسەلەنىڭ شەشىلۋى بيۋروكراتيالىق كەدەرگىلەرگە كەپ تىرەلدى.
مەملەكەتتىك ورگاندار مەن كەيبىر باسشىلار حالىقتىڭ ناقتى پروبلەمالارىن جەتە سەزىنبەيدى دەگەن سىن ايتىلىپ جۇرگەنىن مەن جاقسى بىلەمىن.
بۇل بارلىق دەڭگەيدەگى دەپۋتاتتاردىڭ دا جۇمىسىنا قاتىستى.
ونى كوبىنە ورىندى سىن دەپ ەسەپتەيمىن.
دەپۋتاتتار حالىقتىڭ ورتاسىندا بولىپ, ەلدىڭ مۇڭ-مۇقتاجىن جەتكىزۋگە ءتيىس.
دەپۋتاتتاردىڭ مىندەتى – ءاردايىم ەل مۇددەسىن قورعاۋ. وسىنى ۇمىتپاۋىمىز كەرەك.
ءۇش جىل بۇرىن كونستيتۋتسيالىق رەفورما جۇرگىزىلدى. پارتيالىق-ساياسي جۇيەگە تەرەڭ جەتىلدىرۋدىڭ نەگىزى قالاندى. پارلامەنتتىڭ ءرولى جانە ۇكىمەتتىڭ حالىققا ەسەپ بەرۋى كۇشەيتىلدى.
سايلانبالى ورگانداردى سايلاۋدىڭ پروپورتسيونالدىق جۇيەسىنە كوشىرۋدى جۇزەگە اسىردىق. بيىل ساياسي پارتيالاردى تىركەۋ شەگى 2 ەسەگە دەيىن تومەندەتىلدى. پارتيالىق تىزىمدە ايەلدەر مەن جاستارعا 30 پايىزدىق كۆوتا زاڭدى تۇردە ەنگىزىلدى.
تەك قانا پارتيالار بيلىككە جاڭا ادامداردى – ءوز ءىسىنىڭ كاسىبي شەبەرلەرىن, بەدەلدى كوشباسشىلاردى, ءوز ەلىنىڭ تاعدىرىنا جانى اشيتىن, شەشىم قابىلداي بىلەتىن جانە كونسترۋكتيۆتى ۇسىنىستار ايتا الاتىنداردى ۇسىنۋى قاجەت.
ءوزىنىڭ تاريحي تۇرعىدان جاۋاپكەرشىلىگىن سەزىنە وتىرىپ, «Nur Otan» «سەنىم. ديالوگ. كەلەشەك» باعدارلاماسىن قابىلدادى. بيلەۋشى پارتيانىڭ «قايتا تۇلەۋىنىڭ» ناتيجەسى ەلىمىزدە اۋقىمدى پرايمەريز وتكىزۋ بولماقشى. بۇل – پارتيا ىشىندەگى سايلاۋ. بۇل – ناقتى الەۋمەتتىك ساتى. باسەكەلەستىك ىرىكتەۋ, جاڭا يدەيالار مەن جوبالاردى ىزدەۋ. كوپتەگەن تانىمال ساياساتتانۋشىلار مەن ازاماتتىق بەلسەندىلەر بۇل يدەيانى قولدادى. بۇل – «Nur Otan» جاقتاۋشىلارىنىڭ ليگاسىنا بىرىككەن جانە رەفورمالارعا قاتىسۋعا دايىن, بەلسەندى ازاماتتىق ۇستانىمى بار ادامدار. اشىق جانە ەسەپبەرۋشىلىك پارتياىشىلىك سايلاۋعا قاجەتتى جاعدايلاردى تولىق جاسادىق.
باستىسى – قاتىسۋشىلار ءۇشىن اشىقتىق پەن ادالدىقتى, تەڭ جاعداي مەن باسەكەلەستىكتى قامتاماسىز ەتۋىمىز كەرەك.
سەنىمدىلىك پەن ءوزارا سىيلاستىق بولعاندا حالىقتى تولعاندىراتىن ماسەلەلەر كوتەرىلەتىنىنە سەنىمدىمىن.
ايتىلعان, كوتەرىلگەن پروبلەمالاردى پارتيا نازاردان تىس قالدىرماۋى كەرەك.
بارلىق شەشىمدەردى وبلىستىق, قالالىق, اۋداندىق سايلاۋالدى باعدارلامالارعا ەنگىزۋ ءۇشىن بيۋدجەتتىڭ مۇمكىندىگىمەن ورايلاستىرۋ قاجەت.
مەملەكەت الدىندا پاندەميادان كەيىن ەكونوميكالىق ءوسىمدى قالپىنا كەلتىرۋ, جۇمىس ورىندارىن قۇرۋ, شاعىن جانە ورتا بيزنەستى جانداندىرۋ ماسەلەسى تۇر.
سونىمەن قاتار پاندەميامەن كۇرەس پروبلەمالارىن ساراپتاپ, ونىڭ ەكىنشى تولقىنى بولۋى جاعدايىنا دايىن بولۋىمىز كەرەك.
وسىنىڭ ءبارى پارتيانىڭ سايلاۋالدى باعدارلاماسىنا ەنگىزىلەدى جانە نۇروتاندىقتاردىڭ الداعى 5 جىلداعى جۇمىسىندا باسشىلىققا الىنادى.
بارلىق پارتيالىقتاردى جانە «Nur Otan»-نىڭ جاقتاۋشىلارىن ەلىمىزدىڭ وسى ءبىر ماڭىزدى ساياسي وقيعاسىنا قاتىسۋدا بەلسەندىلىك تانىتۋعا شاقىرامىن.
قۇرمەتتى وتانداستار!
ءبىز تاۋەلسىزدىكتىڭ 30 جىلدىعى قارساڭىندا تۇرمىز.
عاسىرعا تەڭ كەلەتىن جول ءجۇرىپ وتتىك.
ءبىزدىڭ بۋىن اۋىرتپالىعى مول داعدارىس كەزەڭىندە ەگەمەن مەملەكەت قۇردى.
ۇلتتىق ەكونوميكا قالىپتاستى.
شەكارامىز شەگەندەلدى.
قازاقستان الەمگە بەيبىتسۇيگىش ەل رەتىندە تانىلدى.
ءبىز تۇراقتىلىق پەن كەلىسىمدى ساقتاي بىلدىك. ءبىرتۇتاس ۇلتقا اينالدىق.
بىراق الدىمىزدا ءالى دە كوپتەگەن قيىندىقتار بار ەكەنى انىق.
مەن ءاردايىم ايتىپ كەلەمىن جانە قازىر دە قايتالاپ ايتامىن: «ءتاۋەلسىزدىككە قول جەتكىزۋ ءبىر بولەك, ونى كوزدىڭ قاراشىعىنداي قورعاپ, نىعايتىپ, كەلەر ۇرپاققا تاپسىرۋعا ءتيىسپىز».
سوندىقتان جيعان تاجىريبەمىزگە سۇيەنىپ, وتكەن كۇننەن ساباق الىپ, العا ۇمتىلۋىمىز كەرەك.
ورتاق ماقسات – ەلدىڭ ەرتەڭى, حالىقتىڭ بولاشاعى جولىندا بىرىگە الاتىندار عانا تابىسقا قول جەتكىزەتىنىن ۇمىتپايىق.
