كوپتەن كۇتكەن قۋانىشتى جاڭالىق! 1 ماۋسىمنان باستاپ استانادا «نۇرلى جول» تەمىرجول ۆوكزالىنان العاشقى پويىزدار جولعا شىعادى. بۇل تۋرالى جاڭا تەمىرجول ۆوكزالى كەشەنىنىڭ باستىعى دىنمۇحامەد قۇسايىنوۆ مالىمدەدى.
جاڭا ۆوكزالعا 27 جۇپ جولاۋشىلار پويىزى كەلىپ-كەتەتىن بولادى. وسىلايشا, بۇرىنعى تەمىرجول ۆوكزالىنداعى جولاۋشىلار قاتىناسى 60 پايىزعا جەڭىلدەتىلەدى. زاماناۋي ارحيتەكتۋرالىق ديزاين سوعىلعان عيمارات 6 قاباتتان تۇرادى. العاشقى ەكى قابات 740 اۆتوتۇراققا ارنايى سالىنعان. ءۇشىنشى قاباتتا – پەررون, ءتورتىنشى قابات – جولاۋشىلاردى پەررونعا شىعاراتىن كونكورس, ياعني ۇيلەستىرۋشى زال, ال بەسىنشى-التىنشى قاباتتا كوممەرتسيالىق ورتالىق بولماق. بۇل جەردە جولاۋشىلار مەن شىعارىپ سالۋشىلار دەمالىپ, دۇكەندەردى ارالاپ, تاماقتانا الادى. سونداي-اق كەلۋشىلەردىڭ جايلىلىعى ءۇشىن قوناقۇي قاراستىرىلعان. كاسسا, انا مەن بالالارعا ارنالعان بولمە وسى قاباتتا ورنالاسقان. ۆوكزالدا مۇمكىندىگى شەكتەۋلى جاندارعا بارلىق جاعداي جاسالعان. ولارعا ارناپ تاكتيلدى توسەنىشتەر جايىلىپ, جەكە كاسسا جۇمىس ىستەيدى, كوزى ناشار كورەتىندەر برايل الىپپەسىن قولدانا الادى. قالا تۇرعىندارى مەن قوناقتارى ءۇشىن 52 ەسكالاتور مەن 26 ليفت ورناتىلعان.
– جاڭا ۆوكزالدا جاڭا تەحنولوگيالار دا ىسكە قوسىلماق. نىساننىڭ شاتىرىندا جيناقتالعان جاڭبىر سۋىن قايتارا پايدالانۋدى كوزدەپ وتىرمىز. جاڭبىر سۋى تەحنيكالىق قاجەتتىلىكتەرگە, سونداي-اق جەر تەلىمىن سۋعارۋعا كەتەدى. بۇل – «جاسىل» تەحنولوگيادا قولدانىلاتىن ەڭ وزىق جوبالاردىڭ ءبىرى.
اۋا باپتاۋ جۇيەسىن دە بايقاپ كورەمىز, ياعني عيماراتتىڭ ءبىر بولىگىنەن ەكىنشى بولىگىنە اۋانى الماستىرامىز. سۋىق بولىپ تۇرعان جەرگە جىلى اۋانى ايدايمىز, وسىلايشا ۆوكزالدى جىلىتۋعا كەتەتىن ەنەرگيانى ۇنەمدەيمىز. بىزدە جەردىڭ تۇراقتى تەمپەراتۋراسى ارقىلى اۋانى جىلىتۋعا مۇمكىندىك بار. جەردىڭ تومەنگى اۋا قاباتىندا رادياتوردى ورناتتىق, ول ارقىلى جازعى ماۋسىمدا اۋانى سالقىنداتىپ, قىسقى ۋاقىتتا جىلىتۋعا بولادى. اۆتوماتتاندىرىلعان قۇرىلعى ەنەرگيانى ۇنەمدەيدى. وسىنىڭ بارلىعى قازىردەن باستاپ جاڭا ۆوكزالدا جۇمىس ىستەپ تۇر, – دەدى تەمىرجول ۆوكزالىنىڭ باسشىسى.
ەنەرگيانى ۇنەمدەۋدەن بولەك, جاڭا ۆوكزال وڭ جاعالاۋدا ورنالاسقان ۆوكزالدان ەكى ەسە كوپ ادامدى قابىلداۋعا قاۋقارلى. «نەگىزى, ەسكى تەمىرجول ۆوكزالى 12 مىڭ ادامعا شاقتالعان. الايدا قاۋىرت كۇندەرى حالىق سانى 25 مىڭعا دەيىن كوبەيەدى. ال جاڭا ۆوكزالدىڭ اۋماعى 130 مىڭ شارشى مەتردى قۇرايدى. دەمەك, ءبىر مەزەتتە 35 مىڭداي ادام ەمىن-ەركىن كەلىپ-كەتە الادى» دەيدى دىنمۇحامەد قۇسايىنوۆ. قالا حالقىنىڭ تابيعي ءوسىمى مەن كوشى-قون ەسەبىنەن, سونداي-اق «ەكسپو» كورمەسىن وتكىزۋگە بايلانىستى ەلورداعا اعىلىپ كەلەتىن ادامدار سانىن ەسكەرە وتىرىپ, ۆوكزال باسشىلارى قوسىمشا پويىزداردىڭ جولعا شىعۋىن ازىرلەپ وتىر.
جوعارىدا اتاپ وتكەندەي, 740 تۇراق ورنى ۆوكزالدىڭ 2 قاباتىندا ورنالاسسا, 760 تۇراق ورنى ۆوكزالدىڭ سىرتىندا بولادى. دەمەك, ۆوكزالعا قاتىناعان ازاماتتارعا 1500 تۇراق ورنى ازىرلەنگەن. تۇراقتاردىڭ بارلىعى قالا مەنشىگىنە بەرىلەدى. سوندىقتان تۇراقتىڭ قۇنى, ولاردىڭ قاۋىپسىزدىگىنە جەرگىلىكتى بيلىك جاۋاپتى. ال ۆوكزال ىشىندەگى تۇراق ازىرشە تەگىن. الماتىلىق اۋەجايداعىداي كولىكتەر پاندۋس ارقىلى بىردەن 3 قاباتقا كوتەرىلە الادى, بۇل دا تەگىن.
ارينە, ادام كوپ شوعىرلانعان جەرلەردە ءتارتىپتى ورناتىپ, قاۋىپسىزدىكتى قامتاماسىز ەتۋ وڭاي شارۋا ەمەس. «نۇرلى جول» تەمىرجول ۆوكزالىنىڭ ديرەكتورى دىنمۇحامەد قۇسايىنوۆ نىسانداعى قاۋىپسىزدىك شارالارى تۋرالى ايتىپ بەردى.
– ۆوكزالدى پايدالانۋعا بەرگەندەگى نيەت بىرەۋ – جولاۋشىلار مەن ولاردى شىعارىپ سالۋشىلارعا جايلى جاعداي جاساۋ. بىزگە ادامداردىڭ قانداي ماقساتتا كەلىپ-كەتەتىنى بەيمالىم, كەيبىرەۋلەرى جاي عانا شىعارىپ سالۋشى بولۋى مۇمكىن. سوندىقتان عيماراتتا ەشقانداي شەكتەۋ قويىلماعان. الايدا قالا تۇرعىندارى مەن قوناقتارىنىڭ قاۋىپسىزدىگى ءبىز ءۇشىن اسا ماڭىزدى. ۆوكزال ىشىندەگى ءتارتىپتى ارنايى كۇزەت قىزمەتكەرلەرى قاداعالايدى. عيمارات اۋماعىندا 500-گە جۋىق ۆيدەوكامەرا ورناتىلىپ, 16 تەكسەرۋ بەكەتى قويىلعان. ياعني ۆوكزالعا كىرگەن ادامدار ءىشىنارا تەكسەرۋدەن ءوتۋى مۇمكىن. وسى جايتتارعا بايلانىستى جولاۋشىلاردى پويىز جۇرەتىن ۋاقىتتان 1 ساعات بۇرىن كەلۋلەرىن سۇرايمىز, – دەدى ول.
گۇلدانا تالعاتقىزى
