«نۇرلى جۇرەككە» كولىك سىيلادى

استانا اكىمى باقىت سۇلتانوۆ قالاداعى «نۇرلى جۇرەك» الەۋمەتتىك قىزمەت كورسەتۋ ورتالىعىنا باردى.

بۇگىندە بۇل مەكەمەدە مۇمكىندىگى شەكتەۋلى 273 بالاعا الەۋمەتتىك كومەك كورسەتىلەدى. ورتالىقتا ولارعا بارلىق جاعداي جاسالعان. مۇندا سەنسورلىق بولمە, مونتەسسوري ءادىسى مەن لوگوپەد, پسيحولوگ, فيزيو كابينەتتەرى, مۋزىكالىق زال, سپورت الاڭى جانە ەڭبەككە باۋ­لۋ شەبەرحانالارى جۇمىس ىستەيدى. ورتالىق جۇمىسىمەن جان-جاقتى تانىسقان شاھار باسشىسى: «مۇمكىندىگى شەكتەۋلى بالالاردا قوعامدا ءوز ورىندارىن تابۋى قاجەت. وسى باعىتتا «نۇرلى جۇرەك» ورتالىعى جاقسى جۇمىس ىستەپ جاتىر» دەپ ۇجىمعا ريزاشىلىعىن ءبىلدىردى.
وسىندا قىزمەت ىستەيتىن ماماندار جەت­ك­ىنشەكتەرگە سەگىز ءتۇرلى الەۋمەتتىك قىزمەت ۇسىنادى. بيىل قاڭتاردا جاستارعا جۇمىسقا ورنالاستىرۋ ماقساتىندا وقىتۋ كورپۋسى اشىلعان.
«بۇرىن ءبىز بالالاردى 3 جاستان 18 جاسقا دەيىن قابىلدايتىن ەدىك. بيىلدان باستاپ 29 جاسقا دەيىنگى مۇمكىندىگى شەكتەۋلى جاستارعا دا قىزمەت كورسەتەمىز. سونداي-اق ءبىز ولارعا وزىنە-ءوزى قىزمەت ەتۋ, ادامدارمەن دۇرىس قارىم- قاتىناس جاساۋدى دا ۇيرەتەمىز» دەدى ورتالىق ديرەكتورى سەرىك بوپەجانوۆ.
سونىمەن قاتار «ينۆاتاكسي» اۋقىمدى الەۋمەتتىك جوباسىنىڭ اياسىندا «حالىق» قايىرىمدىلىق قورى مەن قازاقستان حالىق بانكىسى ورتالىققا مۇمكىندىگى شەكتەۋلى ازاماتتاردى تاسىمالدايتىن كولىك سىيلادى.