قازاقستاننىڭ حالىق جازۋشىسى, ادەبيەتىمىزدىڭ كوزى ءتىرى بۇگىنگى ابىزى ءابدىجامىل نۇرپەيىسوۆ نوبەل سىيلىعىنا ۇسىنىلىپ وتىر.
سەيسەنبى كۇنى استانادا اشىلعان «زاماناۋي الەمدەگى وقۋ مادەنيەتى» ءىىى حالىقارالىق وقۋ كونگرەسىندە رەسەيلىك جازۋشى, «حۋدوجەستۆەننايا ليتەراتۋرا» باسپاسىنىڭ ديرەكتورى گەورگي پرياحين وسىلاي دەپ مالىمدەدى.
«قازاقتاردا عاجاپ ادەبيەت بار. قازاقستان جەرىندە ورىس ادەبيەتىنىڭ تاماشا ۇلگىلەرى دە جازىلدى. الەكساندر سولجەنيتسىندى جاقتىرماساڭىزدار دا, ول بۇل جەردەن ءنار الدى. يۆان شۋحوۆ, كوپتەگەن ورىس ءتىلدى جازۋشىلار دا وسى جەردەن تۇلەدى. ءبىزدىڭ باسپامىز ءابدىجامىل نۇرپەيىسوۆتىڭ «سوڭعى پارىز» رومانىن نوبەل سىيلىعىنا ۇسىندى. ول رومانىنا كەزەكتى مارتە تۇزەتۋ ەنگىزدى. نۇرپەيىسوۆ – كۇردەلى تۇلعا بولسا دا, اسا دارىندى جازۋشى. ول ءوز شىعارماسىندا ەكولوگيالىق جانە پسيحولوگيالىق ماسەلەلەردى كوتەردى. ونىڭ كوتەرگەن ماسەلەسى – قازاقستانعا, ارالعا, ورتالىق ازياعا عانا قاتىستى ەمەس, بۇكىل الەمگە ورتاق ماسەلە. نۇرپەيىسوۆتى ۇسىنعاندا ءبىز ءبىر بەلگىلى نوبەل سىيلىعىنىڭ لاۋرەاتىنىڭ قولداۋىنا يە بولدىق. حات جازعاندا ونىڭ ۇلى وتان سوعىسىنىڭ كوزى ءتىرى ەڭ سوڭعى ارداگەرلەرىنىڭ ءبىرى, ستالينگرادتى قورعاۋشى ەكەنىن اتاپ كورسەتتىك» دەدى گ.پرياحين.
ەكى كۇنگە جالعاسقان كونگرەسكە الەمنىڭ 26 ەلىنەن قوناقتار قاتىستى. سونىڭ ىشىندە «ادامزاتتىڭ ايتماتوۆى» اتانعان شىڭعىس ايتماتوۆتىڭ تۋعانىنا 90 جىل تولۋىنا ارنالعان, قازاقتىڭ قابىرعالى قالامگەرى, مەملەكەتتىك سىيلىقتىڭ يەگەرى اكىم ءتارازيدىڭ 85 جىلدىعىنا ارنالعان ءىس-شارالار ءوتتى.
