نۇرسۇلتان نازارباەۆ: الەمنىڭ ءاربىر ءدىنى ءبىزدى ىنتىماققا شاقىرادى
ەلباسى نۇرسۇلتان نازارباەۆ استاناداعى ازىرەت سۇلتان مەشىتىندە بولىپ, بارشا قازاقستاندىقتاردى قۇربان ايت مەرەكەسىمەن قۇتتىقتادى.
پرەزيدەنت قۇتتىقتاۋ سوزىندە: «جاسامپازدىقتىڭ, ىزگىلىك پەن مەيىرباندىقتىڭ نىشانى بولعان وسىناۋ جارقىن مەرەكە ادامداردى قايىرىمدىلىق پەن جاناشىرلىققا ۇندەيدى. ول قازاقستاندىقتاردىڭ جۇرەگىنە جاقىندارىنا دەگەن سۇيىسپەنشىلىك ۇيالاتادى, ادامگەرشىلىك قۇندىلىقتاردى نىعايتا وتىرىپ, كومەككە مۇقتاج جاندارعا قامقورلىق جاساۋعا جەتەلەيدى جانە رۋحاني داستۇرلەرگە باۋليدى.
قازاقستان تابىستى دامىعان 25 جىلدا قۇربان ايت شىن مانىندە ەل بىرلىگى مەن قوعامداعى كونفەسسياارالىق كەلىسىمدى نىعايتا تۇسۋگە بىرەگەي ىقپال ەتكەن ايتۋلى مەيرامعا اينالدى.
وسىناۋ قاسيەتتى مەرەكە كۇندەرى ءاربىر وتباسىنا بەيبىتشىلىك پەن كەلىسىم, اماندىق جانە قۇت-بەرەكە تىلەيمىن! شاڭىراقتارىڭىز شاتتىق پەن باقىتقا تولسىن!» دەدى.
ەلباسىنىڭ ايتۋىنشا, 10 جىلدان بەرى قۇربان ايت پەن روجدەستۆو دەمالىس كۇندەرى بولىپ سانالادى. بۇل – يسلام دىنىنە دە, حريستيان دىنىنە دە مەملەكەت قامقورلىعىنىڭ كورىنىسى.
مەشىتتە جاماعاتپەن اڭگىمەلەسكەن نۇرسۇلتان ءابىشۇلى تاۋەلسىزدىك جىلدارىندا قول جەتكەن تابىستىڭ ءبارى ەلىمىزدەگى بىرلىك پەن تىنىشتىقتىڭ ارقاسى ەكەنىن اتاپ ءوتتى.
– الەمدەگى ءاربىر ءدىن ءبىزدى ىنتىماققا, ىزگىلىككە, ءبىر-ءبىرىمىزدى قۇرمەتتەۋگە شاقىرادى. قۇراندا ءوزىڭ توق بولىپ, كورشىڭ اش وتىرسا, سەن مۇسىلمان بولىپ سانالمايسىڭ دەلىنگەن. وندا مۇسىلمانداردىڭ اعىمعا, جىككە بولىنبەيتىنى دە ايتىلعان. ناعىز مۇسىلمان – ەل-جۇرتقا, قوعامعا, وتانىنا كومەكتەسەتىن, بارلىق ءدىندى بىردەي كورەتىن ادام, – دەدى مەملەكەت باسشىسى.