نۇرسۇلتان نازارباەۆ: بۇگىنگى ارميامىز – باتىر بابالار مۇراگەرى
كەشە قازاق ەلى مونۋمەنتىنىڭ الدىندا ەلباسى ن.نازارباەۆتىڭ قاتىسۋىمەن قر قارۋلى كۇشتەرىنىڭ قۇرىلعان كۇنىنە بايلانىستى اسكەري شەرۋ بولىپ ءوتتى.
جالپى سانى 2,5 مىڭنان استام ادام, 250 قۇرلىقتىق تەحنيكا مەن 75 اۋە تەحنيكاسى قاتىسقان شەرۋ قر جوعارى باس قولباسشىسى نۇرسۇلتان نازارباەۆتىڭ سوزىمەن باستالدى. ول بەيبىتشىلىك پەن تۇراقتىلىقتىڭ بەسىگىنە اينالعان ەلىمىزدىڭ بولاشاعىنا زور سەنىممەن قاراۋ كەرەكتىگىن ايتتى.
«اتا-بابالارىمىز كەيىنگى ۇرپاققا داۋىرلەرگە جالعاسقان داڭق جولىن ەرلىك قاسيەتىن بىزگە ميراس ەتتى. ءبىزدىڭ بۇگىنگى ارميامىز – تاريحىمىزداعى باتىر بابالاردىڭ مۇراگەرى. قارۋلى كۇشتەرىمىز ەلىمىزدىڭ قۇدىرەتىن ايگىلەپ, ايبىنىن اسىرادى. سىزدەر وتانىمىزدىڭ شەبى ءبۇتىن, شەكاراسى بەرىك بولۋىنا قىزمەت ەتەسىزدەر. بۇگىنگى قاسيەتتى جەرىمىز كوكتە دە, جەردە دە, سۋدا دا سەنىمدى قورعالعان. ەلىمىزدىڭ ارمياسى – ناعىز بەس قارۋى ساي ارميا. بۇگىنگى اسكەري شەرۋ وسىنىڭ دالەلى بولسا كەرەك. ءبىزدىڭ اسكەري دوكترينامىز بەيبىتشىلىك جاعدايداعى قورعانىسقا باعىتتالعان. كورشى ەلدەردىڭ بارشاسىمەنەن دوستىق قارىم-قاتىناستامىز. شەكارامىزدى تولىعىمەن ايقىنداپ, بەكىتتىك. دەگەنمەن, ءار مەملەكەت ءوزىنىڭ تاۋەلسىزدىگىن, جەرىنىڭ تۇتاستىعىن جان اياماي قورعاي ءبىلۋى ءتيىس! ءبىز دە, قازاقستان سولاي بولۋى كەرەك. وتان قورعاۋشىلار مەرەكەسى قۇتتى بولسىن!» دەدى ەلباسى.
شەرۋدە وتاندىق اسكەري-وندىرىستىك زاۋىتتاردا قۇراستىرىلىپ, قايتا جاڭعىرتىلعان تەحنيكالار تانىستىرىلدى. بۇل كۇنى ەلىمىزدىڭ زاماناۋي قورعانىس ونەركاسىبى 350-دەن استام تانك, 40-تان استام بمپ, 110-نان استام بتر-دى ۇسىنىپ وتىر. ولاردىڭ قۇراستىرۋ جۇمىستارى تولىقتاي قازاقستاندىق زاۋىتتا جۇزەگە استى.
سونداي-اق, ن.نازارباەۆ: «ەكى كۇننەن كەيىن ۇلى جەڭىس كۇنىن اتاپ وتەتىن بولامىز. تاريحتاعى ەڭ قاسىرەتتى سوعىسقا 1 800 000 وتانداسىمىز اتتاندى. ونىڭ جارتىسىنا جۋىعى مايدان دالاسىنان قايتپاي قالدى. 500-دەن استام جەرلەسىمىز كەڭەس وداعىنىڭ باتىرى اتاندى. كەلەسى جىلى جەڭىستىڭ 70 جىلدىعىنا وراي ەلىمىزدىڭ بارشا وڭىرلەرىندە ءاربىر باتىردى ەسكە ءتۇسىرىپ, تاعزىم ەتۋىمىز قاجەت. قاس دۇشپانعا قارسى اتىلعان ون وقتىڭ توعىزى قازاقستاننىڭ قورعاسىنى مەن جەزىنەن قۇيىلدى. ول جەڭىس بىزگە اتالاردىڭ قانىمەن, انالاردىڭ تەرىمەن كەلدى. ەرلىك ەشقاشان حالىقتىڭ جادىندا ۇمىتىلمايدى. ءبىز اتا-بابالاردى ۇلىقتاپ, ەسىمدەرىن ۇرپاق جادىندا جاڭعىرتا بەرۋىمىز كەرەك. بۇگىندە قازاقستاندا 6700-گە جۋىق ۇلى وتان سوعىسىنىڭ ارداگەرلەرى بار. ءبىز ءاربىر ارداگەردى قۇرمەت تۇتىپ, قولداي ءبىلۋىمىز قاجەت. باتىر بابالاردىڭ ەرلىك جولدارى ۇرپاق ساباقتاسىتىعىنا ۇلاسىپ, «قازاقستان-2050» ستراتەگياسىنىڭ باستى تىرەگى, جاڭا قازاقستاندىق ءپاتريوتيزمنىڭ نەگىزى بولۋعا ءتيىس» دەپ, يۆان پانفيلوۆ, باۋىرجان مومىشۇلى, قاسىم قايسەنوۆ, مانشۇك مامەتوۆا, ءاليا مولداعۇلوۆا, سەرگەي لۋگانسكي, ساعادات نۇرماحانبەتوۆ, راقىمجان قوشقارباەۆ, نۇركەن ءابدىروۆ, تالعات بيگەلدينوۆ سياقتى تاعى دا باسقا ازاماتتاردىڭ ماڭگىلىك اڭىزعا اينالعانىن ايتىپ ءوتتى.
سونىمەن قاتار, اسكەري شەرۋدىڭ سوڭىنا قاراي اۋەدە سامعاعان ۇشاقتار استانانىڭ سيمۆولىنا اينالعان «بايتەرەكتىڭ» سۇلباسىن بەينەلەپ, كورەرمەندەرگە ەرەكشە كوڭىل كۇي سىيلادى.
نۇريسلام قۇسپانعالي
