نۇرسۇلتان نازارباەۆ, قر پرەزيدەنتى: ناۋرىز مىزعىماس بىرلىگىمىز بەن ىنتىماعىمىزدى كورسەتەدى
ۇلىستىڭ ءۇلى كۇنىنە ارنالعان ءدۇبىرلى دۋمان ەلىمىزدىڭ بارلىق وڭىرىندە تويلانۋدا. بۇگىن پرەزيدەنت نۇرسۇلتان نازارباەۆ «سارىارقا» ۆەلوترەك سارايىندا وتكەن «ناۋرىز – جاڭا بەلەس, جاڭا ورلەۋ» اتتى مەرەكەدە بارشا قازاق ەلىن ءاز-ناۋرىز مەرەكەسىمەن قۇتتىقتادى.
«بۇل بابالارىمىزدىڭ باعزى زاماننان بەرى تويلاپ, بىزگە قالدىرعان اماناتى, بىزگە بىرلىك پەن ىنتىماقتىڭ جولى بولسىن دەگەن تىلەۋى. جاقسىلىق پەن كەلىسىمنىڭ, جاڭارۋ مەن جاڭا كۇننىڭ سيمۆولى. وسى كەزدەن باستاپ كۇن ۇزارىپ, ءتۇن قىسقارىپ, جارىق ساۋلەسى جەرگە ءتۇسىپ, ايازدى قۋالاپ, كوكتەمدى اكەلۋدىڭ باسى بولىپ سانالادى. ناۋرىزدا حالقىمىز جينالىپ, بۇلاقتاردىڭ كوزىن اشىپ, جاسىل-جەلەك وتىرعىزىپ, بولاشاققا كوز تىگەتىن بولعان. ناۋرىز كوجە جاساپ, اعايىن-تۋىس, كورشىلەر ءبىر-بىرىمەن قاتىناسىپ, ءدام تاتىپ, بولعاندى ەسكە ءتۇسىرىپ, رەنجىگەندەر ءبىر-بىرىنەن كەشىرىم سۇراپ, كورىسىپ, قاۋىشىپ, ءبىر-بىرىنە سۇيىسپەنشىلىك كورسەتەتىن بولعان» دەدى ەلباسى.
رۋحاني تىلەۋدىڭ اقجارما مەيرامىندا كۇن استىنان نۇر توگىلىپ, جەرگە التىن ءدان سەبىلەتىن ايتقان پرەزيدەنت ەل-جۇرتتىڭ كوڭىلىندە جاڭا ءۇمىت پايدا بولىپ, ەرتەڭگى كۇنگە سەنىم نىعاياتىنىن العا تارتتى.
«شىنىن ايتقاندا, ءبىزدىڭ جاڭا جىلىمىز, شىعىستىڭ دا, قازاقتىڭ دا وسى كۇن بولىپ تابىلادى. مىڭجىلدىقتاردان جالعاسىپ, وزگەرمەي كەلە جاتقان زاڭدىلىق بيىل سول باعىتىنان جاڭىلعان جوق. بۇل مەرەكە ۇلت پەن ءدىندى تالعامايدى. ورتاق مەيرام حالىققا. مىزعىماس بىرلىگىمىز بەن ىرىستى ىنتىماعىمىزدى كورسەتەتدى. جاراتىلىس اتاۋى جاڭعىرىپ, كەرەمەت كۇندە جاقسى تىلەكتە بولايىق» دەگەن ەلباسى اعايىنعا ارناعان اق تىلەگىن ودان ءارى جالعاي ءتۇستى.
ايتۋىنشا, بيىلعى ناۋرىز وتكەن جىلدىڭ اياعىندا ەل بولىپ اتاپ وتكەن تاۋەلسىزدىگىمىزدىڭ 25 جىلدىق مەرەيتويىمەن تۇسپا-تۇس كەلدى.
« ءبىز اتا-بابامىزدىڭ قاعيدالارىن ورىنداي وتىرىپ, بىرلىك پەن بەرەكەدەن جاڭىلماعان حالىقپىز. سونىڭ ارقاسىندا تاۋەلسىزدىگىمىزدى تۇگەندەپ, بارلىق جەتىستىكتەرگە جەتتىك. عاسىرعا تاتيتىن 25 جىل ىشىندە كۇرەس پەن قۋانىشقا تولى جىلداردا حالقىمىزدىڭ ەڭسەسىن كوتەرىپ, قازاقتىڭ تۋىن جوعارى ۇستاپ كەلە جاتىرمىز» دەگەن ەلباسى حالىقتىڭ تۇرمىسىن جاقسارتۋ جولىندا قولعا الىنعان ءۇشىنشى جاڭعىرۋ باعدارلاماسى تۋرالى ەرەكشە اتاپ ءوتتى. كونستيتۋتسيانىڭ وزگەرىسى ەلدىڭ بولاشاعىنىڭ تۇراقتىلىعى ءۇشىن جاسالعان بولاشاققا دەگەن ءۇمىتىمىز ەكەنىن جەتكىزدى.
«كيەلى تاۋەلسىزدىگىمىزدەن باستاۋ الاتىن بارشا قۇندىلىقتارىمىزدى بەكەمدەي تۇستىك. ەلدىگىمىز تارازىعا سالىنعان وسىناۋ زاماندا بەرەكە –بىرلىگىمىزدى ەشۋاقىتتا جوعالتپايىق. ەلىمىز جاڭا بەلەسكە كوتەرىلۋ ءۇشىن, ءۇشىنشى جاڭعىرۋدى ورىنداۋ ءۇشىن بارلىعىمىز ءبىر ادامداي بولىپ جۇمىس ىستەۋىمىز كەرەك» دەپ تۇيىندەدى ءوز ءسوزىن.
مەرەكەلىك شارا ودان ءارى وتاندىق ونەرپازداردىڭ قاتىسۋمەن وتكەن مەركەلىك كونتسەرتكە ۇلاستى. ناۋرىز مەيرامى مەن كوكتەمنىڭ جاڭارۋىن پاش ەتەتىن ءتۇرلى ساحنالىق قويىلىمدار كورسەتىلىپ, ارقا, جەتىسۋ, سىر ءوڭىرى مەن باستىستىڭ ءداستۇرلى ءان مەكتەبىنىڭ اۋەندەرى شىرقالدى. ءدۇبىرلى دۋماننىڭ جالعاسى «حانشاتىر» ويىن-ساۋىق الاڭىندا ورنالاسقان ەتنو-اۋىلدا جاراسىمدى جالعاسىن تاپتى.
