استانانىڭ 20 جىلدىعىنا وراي ۇلتتىق مۋزەيدە وتاندىق جانە الەم قىلقالام شەبەرلەرىنىڭ قاتىسۋىمەن «نۇر كەلبەتتى استانا» حالىقارالىق كوركەمونەر فەستيۆالى وتۋدە.
شەتەلدىك مەيمانداردى استانانىڭ 20 جىلدا قول جەتكىزگەن جەتىستىكتەرىمەن تانىستىرۋ ماقساتىندا ۇيىمداستىرىلعان فەستيۆالدىڭ اشىلۋ سالتاناتىنا مادەنيەت جانە سپورت مينيسترلىگىنىڭ وكىلدەرى مەن وتاندىق جانە شەتەلدىك قىلقالام شەبەرلەرى, ديزاينەرلەر قاتىستى. شەتەلدىك سۋرەتشىلەر ەلورداداعى وزدەرىنە ۇناعان جەرلەرىن تاڭداپ الىپ, كورمەگە 2-3 شىعارمادان ۇسىنعان ەكەن. مىسالى, جاپوندىق سۋرەتشى اكيرا مۋراتا حازىرەت سۇلتان مەشىتىن سالسا, ۇلىبريتانيا ونەر قوعامى كورولدىگىنىڭ مۇشەسى الەكساندرا كوننور ءوزىنىڭ كارتينالارىندا ۇلتتىق كيىم كيگەن استانالىق ەر ادامدى, دومبىرادا ويناپ تۇرعان استانالىق ايەلدى جانە بۇركىتشىنى بەينەلەگەن. ال گوللانديالىق ديمتريس ۆوياوگلۋدىڭ مايلى بوياۋمەن سالعان سۋرەتىنە ەسىلدىڭ جاعاسىنداعى ساعات پەن كۇن باتقان كەزدەگى كورىنىستى كورسەتكەن. سونىمەن قاتار برازيليالىق جيزەل ۋليسس, تۇركيالىق مۇستافا مۋفتۋوگلۋ جانە باسقا دا بىرقاتار شەتەلدىك قىلقالام شەبەرلەرى استانانىڭ تابيعاتى مەن كوركى كەلىسكەن ارحيتەكتۋراسىن بەينەلەگەن جۇمىستارىن ۇسىنىپتى.
– مەملەكەت باسشىسى قازاقستاندىق مادەنيەت الەمنىڭ بارلىق تىلىندە سويلەۋى كەرەكتىگىن ايتقان بولاتىن. ياعني, الەم ەلدەرى قازاقستاندى جەراستى بايلىعىمەن عانا ەمەس, مادەني جەتىستىكتەرى ارقىلى دا باعالاۋى كەرەك. بۇل فەستيۆال وسى ماقساتتى كوزدەپ وتىر. سوندىقتان الەمنىڭ تۇكپىر-تۇكپىرىنەن كەلگەن قىلقالام شەبەرلەرىنىڭ قيالىنان تۋعان تۋىندىلار جەر شارىنىڭ جەتەكشى ەلدەرىندە ەلوردامىزدى ناسيحاتتاۋعا ۇلكەن ۇلەس قوسادى دەپ سەنەمىز, – قر مادەنيەت جانە سپورت مينيسترلىگىنىڭ جاۋاپتى حاتشىسى قۋاتجان ۋاليەۆ.
ءوز كەزەگىندە ءسوز العان حورۆات سۋرەتشىسى, «ابۋ دابي پلازا», «جەلدى ءتۇن» جانە «استاناداعى العاشقى كۇن» كارتينالارىنىڭ اۆتورى ماركو زۋباك حورۆاتيانىڭ كوپشىلىك باراتىن جەرلەرىنىڭ ءبارى كونە ەكەنىن ايتادى.
– سىزدەردە بىزدەن ايىرماشىلىق كوپ ەكەن. مىسالى, مەنىڭ قالامداعى عيماراتتاردىڭ كوپشىلىگى, كوشەلەرى دە كونەنىڭ كوزىندەي بوپ قالعان. ال استانادا ءبارى جاس, سۋ جاڭا قۇرىلىستار, ءۇرىپ اۋىزعا سالعانداي ۋىزداي جاس مۋزەي, سالتاناتتى ارحيتەكتۋرا. ءبىر سوزبەن ايتقاندا, ءبارى جاڭا. سىزدەر بولاشاقتى ءوز قولدارىڭىزبەن قۇرىپ جاتىرسىزدار. مەن ءۇشىن وسىنىڭ ءبارىن كورۋ – باقىت, – دەيدى ول.
كوركەمونەر كورمەسى اشىلۋى قارساڭىندا شەتەلدىك قوناقتاردى استانانىڭ كورىكتى جەرلەرىمەن تانىستىرۋ ماقساتىندا ەكسكۋرسيا ۇيىمداستىرىلعان بولاتىن.
نۇرداۋلەت كاكىشتەگى
