استانا قالاسى ورتالىقتاندىرىلعان كىتاپحانالار جۇيەسىنىڭ ورتالىق بالالار جانە جاسوسپىرىمدەر كىتاپحاناسىندا ۇلاعاتتى ۇستاز وسپان سۇلەيمەنۇلىنىڭ 75 جاس مەرەيتويىنا ارنالعان «عاجايىپ قازاقستان – 2050» جۋرنالىنىڭ تۇساۋكەسەرى ءوتتى.
اتالعان باسىلىمدا مەرەيتوي يەسىنىڭ ءومىر مەن ونەر جولى جان-جاقتى جازىلعان. اقمولا ءوڭىرىنىڭ تۋماسى وسپان سۇلەيمەنۇلى 1959 جىلى 11 جاسىندا وبلىستىق كوركەمونەرپازدار بايقاۋىنا قاتىسىپ, ءبىرىنشى ورىندى جەڭىپ الدى. سول ۋاقىتتا بالا كۇيشى اتانادى. ودان كەيىن دە بىرنەشە مارتە رەسپۋبليكالىق, بۇكىلوداقتىق, حالىقارالىق بايقاۋلاردىڭ جەڭىمپازى, جۇلدەگەرى بولدى. جالپى الەمنىڭ 50 مەملەكەتىنىڭ ساحناسىندا ونەر كورسەتتى.
ۇستازدىق جولىن وسىدان 57 جىل بۇرىن ءوزىنىڭ تۋعان اۋىلىنداعى قوسقوپا سەگىز جىلدىق مەكتەبىنەن باستاعان وسپان سۇلەيمەنۇلى جەتپىسىنشى جىلدارى قورعالجىن اۋداندىق مادەنيەت ءبولىمىنىڭ باسشىسى بولعاندا جەرگىلىكتى ونەرپازدار بىرنەشە ەلدە ونەر كورسەتتى. جالپى قىرىق جىلداي قورعالجىن, تسەلينوگراد اۋداندارى مەن اقمولا قالاسى مادەنيەتىنىڭ ورلەۋىنە ۇلەس قوستى.
1990-1991 جىلدارى تسەلينوگراد قالاسىندا تۇڭعىش قازاق ۇلتتىق بالالار مۋزىكا مەكتەبىنىڭ اشىلۋىنا مۇرىندىق بولىپ, سونىڭ العاشقى ديرەكتورى بولدى. 1996 جىلدان اقمولا وبلىستىق ءبىلىم باسقارماسى, وبلىستىق ءبىلىم جەتىلدىرۋ ينستيتۋتىندا, قالالىق ءبىلىم باسقارماسىندا مامان-ادىسكەر. «مۋزىكا – شەكسىز الەم» قاۋىمداستىعىن قۇردى.
استانا تۋرالى جازىلعان العاشقى ءان اۆتورلارىنىڭ ءبىرى دە – وسپان سۇلەيمەنۇلى. «اقمولام – استانام» اتالاتىن بۇل تۋىندى 1997 جىلى جازىلدى.
مەرەيتوي يەسىنە ارنالعان تۇساۋكەسەردە زامانداستارى, دوستارى, تىلەكتەستەرى, شاكىرتتەرى ەستەلىكتەرى مەن تىلەكتەرىن ايتتى. ءان-كۇيدەن شاشۋ شاشتى. وسپان سۇلەيمەنۇلى «عاجايىپ قازاقستان-2050» جۋرنالىنىڭ باسشىلىعىنا جانە ۇيىمداستىرۋشىلارعا العىسىن ءبىلدىردى.
