استانا قالاسىنىڭ مەكتەپتەرىندە وندىرىستىك تاجىريبەدەن وتكەن اباي اتىنداعى قازۇپۋ 4-كۋرس ستۋدەنتتەرىنىڭ قورىتىندى كونفەرەنتسياسى ءوتتى, دەپ حابارلايدى astana-akshamy.kz
ءىس-شاراعا قر عىلىم جانە جوعارى ءبىلىم ءمينيسترى ساياسات نۇربەك, وقۋ-اعارتۋ مينيسترلىگى ورتا ءبىلىم بەرۋ كوميتەتىنىڭ توراعاسى قانىبەك جۇماشەۆ, استانا قالاسى ءبىلىم باسقارماسىنىڭ باسشىسى قاسىمحان سەنعازىەۆ, اباي ۋنيۆەرسيتەتىنىڭ اكادەميالىق ماسەلەلەر دەپارتامەنتىنىڭ ديرەكتورى حايرۋللا جانبەكوۆ, سونىمەن قاتار مەكتەپ ديرەكتورلارى مەن ادىسكەرلەرى قاتىستى.
كونفەرەنتسيا بارىسىندا مينيستر ساياسات نۇربەك وندىرىستىك ءىس-تاجىريبەسىنىڭ جوعارى دەڭگەيدە ەكەنىن اتاپ ءوتىپ, ستۋدەنتتەرگە العىس ءبىلدىردى.
«ەلوردانى جاڭا پەداگوگيكالىق كادرلارمەن قامتاماسىز ەتۋ جۇمىسىنىڭ العاشقى ناتيجەلەرىن كورۋ – ءبىلىم بەرۋدى دامىتۋداعى ماڭىزدى قادام. مەكتەپتەردەگى ستۋدەنتتەردىڭ پەداگوگيكالىق تاجىريبەسى سياقتى جوبالار مەكتەپتەردى جاڭا ماماندارمەن قامتاماسىز ەتىپ قانا قويمايدى, سونىمەن قاتار ستۋدەنتتەرگە بولاشاق مانساپ جولىندا قولدانا الاتىن قۇندى تاجىريبە بەرەدى. بۇل ەلىمىزدىڭ ءبىلىم بەرۋ سالاسىن دامىتۋداعى ءوزارا ءتيىمدى جانە ماڭىزدى كەزەڭ», – دەدى ساياسات نۇربەك.
اباي ۋنيۆەرسيتەتىنىڭ وكىلى حايرۋللا جانبەكوۆ ستۋدەنتتەردىڭ وندىرىستىك تاجىريبە بارىسىنداعى جۇمىسىنا توقتالىپ, الداعى وقۋ جىلىندا دا ۋنيۆەرسيتەت استانا قالاسىمەن بىرلەسىپ جۇمىس ىستەيتىنىن جەتكىزدى. اباي ۋنيۆەرسيتەتىنىڭ 4-كۋرس ستۋدەنتى التىن مەندىباەۆا ستۋدەنتتەر اتىنان مينيسترلىككە, استانا قالاسى اكىمدىگى مەن ۋنيۆەرسيتەت باسشىلىعىنا العىسىن ايتىپ, بۇل وندىرىستىك ءىس-تاجىريبەدەن العان اسەرىمەن ءبولىستى.
كەزدەسۋ بارىسىندا ستۋدەنتتەر مينيستر ساياسات نۇربەككە بولاشاقتا ۇستاز بولۋعا قاتىستى سۇراقتارىن قويىپ, پەداگوگيكالىق قىزمەتكە بايلانىستى ءوز ۇسىنىستارىمەن ايتتى. تاجىريبە قورىتىندىسى بويىنشا ستۋدەنتتەردىڭ جارتىسىنان كوبى ەلوردا مەكتەپتەرىندە جۇمىس ىستەۋگە نيەت ءبىلدىردى.
ايتا كەتەيىك, جاڭا مەكتەپتەردى جاڭا فورماتسياداعى پەداگوگيكالىق كادرلارمەن قامتاماسىز ەتۋ ماقساتىندا قر عىلىم جانە جوعارى ءبىلىم مينيسترلىگى جانە استانا قالاسى ءبىلىم باسقارماسىنىڭ قولداۋىمەن اباي ۋنيۆەرسيتەتىنىڭ 4-كۋرس وقيتىن 181 ستۋدەنت استانادا جالپى ءبىلىم بەرۋ ۇيىمدارىندا وندىرىستىك ءىس-تاجىريبەدەن ءوتتى.
