ونەركاسىپ كورمەسى ءوتىپ جاتىر

كەشە استانادا العاش رەت «Innoprom.Qazaqstan» ونەركاسىپ كورمەسى باستالدى. مۇندا ەۋرازيالىق ەكونوميكالىق وداققا مۇشە ەلدەردىڭ وندىرىستىك جەتىستىكتەرى ۇسىنىلدى.

كورمەنىڭ ءبىرىنشى كۇنى «جاڭا كەزەڭنىڭ ونەركاسىپتىك ستراتەگيالارى» اتتى پلەنارلىق سەسسياسى ءوتتى. وعان پرەمەر-مينيستر ءاليحان سمايىلوۆ, استانا قالاسىنىڭ اكىمى جەڭىس قاسىمبەك جانە رەسەي, بەلارۋس, قىرعىزستان ۇكىمەتتەرىنىڭ باسشىلارى قاتىسىپ, جيىن بارىسىندا جاھاندىق نارىقتى دامىتۋدىڭ وزەكتى ماسەلەلەرىن ءسوز ەتتى.

كورمەگە قاتىسۋعا كولىك, اۋىل شارۋاشىلىعى, ەنەرگەتيكا, ستانوك جاساۋ, حيميا ونەركاسىبى, مەتاللۋرگيا, ونەركاسىپتىك IT جانە تاعى باسقا سالالاردان 18 ەلدىڭ 300-دەن استام كومپانياسى ءوتىنىم بەردى. كورمەدە قازاقستان, بەلارۋس, ارمەنيا, قىرعىزستان, رەسەي فەدەراتسياسى جانە تاعى باسقا ەلدەردىڭ نەگىزگى ونەركاسىپتىك كومپانيالارىنىڭ ۇلتتىق ەكسپوزيتسيالارى ورنالاستىرىلدى.

وسىلايشا الەمنىڭ تۇك­پىر-تۇكپىرىنەن كەلگەن بيزنەس وكىلدەرى, وندىرۋشىلەر مەن كاسىپكەرلەر ەلوردادا باس قوستى.

پرەمەر-مينيستر ءاليحان سمايىلوۆ ءوز سوزىندە قازاقستاننىڭ ەۋرازيالىق ەكونوميكالىق وداق ەلدەرىمەن تاۋار اينالىمى وتكەن جىلى 29,4 ملرد دوللاردى قۇراپ, 10,4 پايىزعا ارتقانىن ايتتى.

«بۇل – رەكوردتىق كورسەتكىش. بيىل 6 ايدىڭ ىشىندە ەلىمىزدىڭ تاۋار اينالىمى 14 ملرد دوللارعا دەيىن جەتتى. جالپى, سوڭعى 5 جىلدا رەسپۋبليكانىڭ وڭدەۋ ونەركاسىبىندەگى ءونىم كولەمى 2,2 ەسەگە – 2017 جىلعى 9,4 ترلن تەڭگەدەن 2022 جىلى 20,7 ترلن تەڭگەگە دەيىن ءوستى» دەدى ءا.سمايىلوۆ.

اتالعان ءىس-شارانى العاش رەت وتكىزىپ وتىرعان قازاقستان 2019 جىلدان بەرى «يننوپرومنىڭ» تۇراقتى قاتىسۋشىسى بولىپ كەلەدى, ال وتكەن جىلى كورمەنىڭ سەرىكتەس ەلى رەتىندە ءوز ونىمدەرىن ۇسىندى. كورمەنىڭ نەگىزگى ماقساتى – وندىرىستىك كووپەراتسيانى دامىتۋ, ينۆەستيتسيا تارتۋ, ساۋدا ىنتىماقتاستىعىن كەڭەيتۋ جانە ءوزارا تاجىريبە الماسۋ. ءىس-شارا بارىسىندا ۇكىمەت باسشىلارى «Railways Systems KZ» جشس, «TransTechMash» كومپانيالار توبى, «تكش قازورتالىعى», «قازاقستان ينجينيرينگ» كومپانياسىنىڭ ونىمدەرىمەن تانىستى.

كورمەنىڭ ورتالىعىندا ورىن تەپكەن قازاقستاننىڭ 8 پاۆيلونىندا وتاندىق كاسىپورىنداردىڭ جوبالارى كوپشىلىككە ۇسىنىلدى.

ءۇش كۇنگە ۇيىمداستىرىل­عان حالىقارالىق كورمە 27 قىر­كۇيەك­كە دەيىن جالعاسادى.