ەلورداداعى الماتى اۋدانىنىڭ بەلسەندى ۇزاق ءومىر ءسۇرۋ ورتالىعىندا ۇلتتىق قۇرىلتاي مۇشەسى, ۇلتتىق عىلىم اكادەمياسىنىڭ اكادەميگى, استانا قالاسى قوعامدىق كەڭەسىنىڭ مۇشەسى كارىمبەك قۇرماناليەۆپەن كەزدەسۋ ءوتتى.
جيىندا III ۇلتتىق قۇرىلتاي وتىرىسىندا مەملەكەت باسشىسى قاسىم-جومارت توقاەۆ كوتەرگەن ەل اعالارىنىڭ اۋىزبىرشىلىگى جانە ۇرپاققا ونەگەلى بولۋى كەرەكتىگى تۋرالى باستامالارى ءسوز بولدى.
بەلسەندى ۇزاق ءومىر ءسۇرۋ ورتالىعىنىڭ قىزمەت الۋشىلارى, ەڭبەك ارداگەرلەرى قاتىسقان كەزدەسۋدە استانا قالاسى اكىمدىگى بەلسەندى ۇزاق ءومىر ءسۇرۋ ورتالىعىنىڭ ديرەكتورى مۇحتار ەركەتاەۆ, الماتى اۋداندىق ارداگەرلەر كەڭەسىنىڭ توراعاسى مارات مۇستافين ءسوز سويلەدى.
«اتىراۋدا وتكەن ۇلتتىق قۇرىلتايدا كوتەرىلگەن جالپىۇلتتىق قۇندىلىقتاردى ۇلىقتاۋ, ۇلت بولىپ ۇيىسىپ, جۇرت بولىپ جۇمىلىپ, جاستارعا ونەگەلى جول كورسەتۋدە زيالى قاۋىم وكىلدەرىنە, ەل اعالارىنا ارتىلار جاۋاپكەرشىلىك ايرىقشا. مەملەكەت باسشىسى قاسىم-جومارت توقاەۆتىڭ: «ىنتىماعى جاراسقان, ورتاق ماقساتقا ۇيىسقان ۇلت ەشقاشان ۇتىلمايدى. ەلدىڭ تۇتاستىعى زيالى قاۋىمنىڭ بىرلىگىنەن باستالادى. ەل اعالارى ءاۋىزبىرشىل جانە ۇرپاققا ونەگەلى بولۋى كەرەك» دەگەن ەدى. قازاق حالقى, جالپى, قاي كەزدە دە الدىنداعى ەل اعالارىنا, اقساقالدارعا قاراپ بوي دا, وي دا تۇزەگەن. احمەت بايتۇرسىنۇلى بابامىزدىڭ: «الدىمەن ەل اعالارى, سەندەر قاتەلەسپەڭدەر. سەندەر قاتەلەسسەڭدەر, سوڭدارىڭنان ەرگەن ەل قاتەلەسەدى» دەگەن. جاڭا قازاقستاننىڭ جاڭا تۇرپاتتى جاستارىنا بەرەر تاعىلىمعا تولى تاربيەدە ءتىل ساياساتىن, ساپالى كادر شىعارۋدى نەگىزگە الۋ قاجەت. عىلىم مەن ءبىلىمدى ەكىنشى ورىنعا قويعان مەملەكەت ەشۋاقىتتا كوش باستامايدى» دەدى ءوز سوزىندە اكادەميك ك.قۇرماناليەۆ.
كەزدەسۋگە قاتىسۋشىلار ۇلتتىق قۇرىلتايدا كوتەرىلگەن كوكەيتەستى ماسەلەلەردى ىسكە اسىرۋدىڭ ءتيىمدى جولدارىن تالقىلاعان جيىننىڭ ماڭىزىن باسا ايتىپ, قوعامداعى وزەكتى ماسەلەلەر بويىنشا سۇراقتارىن دا قويدى. سولاردىڭ قاتارىندا ەلوردالىق مۇعالىم ءاليا ايتجانوۆا انا ءتىلى ماسەلەسىنە قاتىستى قوعامدىق ورىنداردا كەزدەسەتىن قاتەلىكتەرگە توقتالدى.
«جاڭارعان قازاقستان ناتيجەلەرى ءبىر كۇندە شىعارىلمايدى, وعان ءبىرشاما ۋاقىت قاجەت. بۇل تۇستا, ءسوزسىز, الدىڭعى بۋىن جاستارعا دۇرىس باعىت-باعدار بەرۋ كەرەك. بىراق كەيدە قازىرگى جاستارعا قارنىڭ اشادى. كورشى وزبەكستاندا اقساقالداردى جاپاتارماعاي قۇرمەتتەپ جاتسا, بىزدە قاراپايىم قوعامدىق كولىكتە ورىن بەرەتىن جاس بۋىن از ەكەنى شىندىق. وسى تۇستا بالا تاربيەسىنە كوڭىل بولگەن ماڭىزدى. ەڭ باستى ماسەلە, بۇگىندە ارداگەرلەر تۋرالى زاڭدى ءتيىمدى ىسكە اسىرۋ قاجەتى تۋىپ وتىر. ەڭبەك ارداگەرلەرىنىڭ زەينەتاقىسىن مۇمكىندىگىنشە ءوسىرىپ, پايداسىن تيگىزۋ كەرەك» دەدى الماتى اۋداندىق ارداگەرلەر كەڭەسىنىڭ توراعاسى مارات مۇستافين.
استانا قالاسى اكىمدىگى بەلسەندى ۇزاق ءومىر ءسۇرۋ ورتالىعىنىڭ ديرەكتورى مۇحتار ەركەتاەۆ جاڭا زامانعا ەل اعالارىنىڭ وزدەرى دە ساي بولىپ, «ادال ادام – ادال ەڭبەك – ادال تابىس» قاعيداتىن ۇستانىپ, جاڭا قۇندىلىقتار باستاۋىنا ەڭ الدىمەن ادال ازاماتتاردى قويىپ, ادال ەڭبەك ەتىپ, ادال تابىس تابۋعا شاقىردى.
