استاناداعى دوستىق ۇيىندە كەڭەس وداعىنىڭ باتىرى, حالىق قاھارمانى, تاۋەلسىز قازاقستاننىڭ تۇڭعىش قورعانىس ءمينيسترى, ارميا گەنەرالى ساعادات نۇرماعامبەتوۆتىڭ 100 جىلدىعىنا ارنالعان دوڭگەلەك ۇستەل ءوتتى. ءىس-شاراعا استانا قالاسى اكىمدىگىنىڭ, قالالىق قازاقستان حالقى اسسامبلەياسى, اقساقالدار كەڭەسى, «جاستار اسسامبلەياسى» رقب وكىلدەرى, عالىمدار, قورعانىس مينيسترلىگى س.نۇرماعامبەتوۆ اتىنداعى اسكەري كوللەدج كۋرسانتتارى قاتىستى.
كەزدەسۋدىڭ باستى ماقساتى – اتى اڭىزعا اينالعان تۇلعانىڭ اسكەري مۇراسىن زەردەلەۋ, اتا-بابالارىمىزدىڭ ەرلىگىن دارىپتەپ, ناسيحاتتاۋ ارقىلى وسكەلەڭ ۇرپاقتىڭ بويىندا پاتريوتيزم مەن ۇلتتىق سانانى قالىپتاستىرۋ.
استانا قالاسى ىشكى ساياسات باسقارماسىنىڭ باسشىسى نۇرداۋلەت ءالمۇحانوۆ حالىق قاھارمانىنىڭ عاسىرلىق مەرەيتويىنا وراي بيىل ەلىمىزدىڭ بارلىق وڭىرىندە ءىس-شارالار ءوتىپ جاتقانىن جەتكىزدى.
– قازاق دالاسى ەجەلدەن داڭقتى باتىرلارىمەن بەلگىلى, ولاردىڭ ەسىمى تاريحتا دا, حالىق جادىندا دا ماڭگى ساقتالعان. تۋعان حالقى ءۇشىن ءومىرىن بەرۋگە دايىن ۇلداردىڭ ءبىرى, ناعىز وتان قورعاۋشى – ساعادات قوجاحمەتۇلى. ونىڭ ەرلىك ىستەرى مەن ەلى ءۇشىن جاساعان قىزمەتى وسكەلەڭ ۇرپاققا ۇلگى-ونەگە, ءتالىم-تاربيە بەرۋدە زور ماڭىزعا يە. ءبىز ونىڭ قالدىرعان مۇراسىن مۇقيات ساقتاپ, ۇرپاققا ونەگە رەتىندە كوبەيتىپ, جەتكىزۋىمىز كەرەك, – دەدى باسقارما باسشىسى.
ل.گۋميلەۆ اتىنداعى ەۇۋ پروفەسسورى, قازاقستان حالقى اسسامبلەياسىنىڭ مۇشەسى ءامىرجان الپەيىسوۆ باتىردىڭ كەڭەس وداعىنداعى ەرلىگىن, قازاق حالقىنان شىققان تۇڭعىش ارميا گەنەرالى ەكەنىن اتاپ ءوتتى. ساعادات نۇرماعامبەتوۆ – ءوز ومىرىندە ەلىنىڭ مارتەبەسىن كوككە كوتەرگەن ادام. ءبىرىنشى رەت 19 جاسىندا مايدانعا اتتانىپ, 20 جاسىندا كەڭەس وداعىنىڭ باتىرى اتانعان.
– ءبىز بۇۇ ارحيۆىنەن 2005 جىلعى اعامىزدىڭ سويلەگەن ءسوزىن تاۋىپ الدىق, سونى نيۋ-يورككە شىعىپ, حات ارقىلى الدىردىق. ءوزى ساعيت اعاسىنىڭ قولىندا تاربيەلەنگەن. اعاسى 1941 جىلى سوعىسقا كەتىپ, ءىز-ءتۇزسىز جوعالدى, – دەدى «اتامنىڭ اماناتى» قب باسقارما توراعاسىنىڭ ورىنباسارى, قر قارۋلى كۇشتەرىنىڭ ارداگەرى ابۋباكىر سمايىلوۆ.
بۇگىندە ەلورداداعى اسكەري-تاريحي مۋزەيدە س.نۇرماعامبەتوۆتىڭ جەكە قۇجاتتارىنىڭ تۇپنۇسقاسى جانە اسكەري كيىم ۇلگىلەرى, ماداقتاۋ قاعازدارى, ءوزىنىڭ جازعان ەڭبەكتەرى, سونىمەن قاتار ۇلى وتان سوعىسى جىلدارىنداعى, سوعىستان كەيىنگى, تاۋەلسىز قازاقستانداعى وسى كۇنگە دەيىن جاريالانباعان جەكە سۋرەتتەرى ساقتالىپ تۇر. ءىس-شارا اياقتالىسىمەن قاتىسۋشىلار اسكەري كوللەدجدىڭ اۋماعىندا ورنالاسقان س.نۇرماحامبەتوۆتىڭ ەسكەرتكىشىنە گۇل شوعىن قويۋ راسىمىنە قاتىستى.
انەل امانگەلديەۆا,
ل.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ ستۋدەنتى
