استانا حالىقارالىق ۋنيۆەرسيتەتىندە نۇرا اۋدانى ارداگەرلەر كەڭەسىنىڭ ۇيىمداستىرۋىمەن مەملەكەت باسشىسى قاسىم-جومارت توقاەۆتىڭ Egemen Qazaqstan گازەتىنە بەرگەن سۇحباتى تالقىلاندى. جيىنعا ارداگەرلەر كەڭەسىنىڭ مۇشەلەرى, ۋنيۆەرسيتەت وقىتۋشىلارى مەن ستۋدەنتتەر قاتىستى.
وندا سۇحباتتا ايتىلعان يدەيالاردى حالىق اراسىندا ىلگەرىلەتۋ ماسەلەلەرى ايتىلدى. اعا بۋىن وكىلدەرى اتوم ەلەكتر ستانتسياسىنىڭ قۇرىلىسى, قازاقستانداعى گەندەرلىك تەڭدىك, ازاماتتاردىڭ الەۋمەتتىك ماسەلەلەرى, ۇلتتىق تاريحتى زەرتتەۋ جانە دامىتۋ سياقتى ماسەلەلەرگە قاتىستى ءوز پىكىرىن ءبىلدىردى.
نۇرا اۋدانى ارداگەرلەر كەڭەسىنىڭ مۇشەسى جەڭىس بودەشەۆ پرەزيدەنت سۇحباتىن وتكەن جىلدىڭ ءداستۇرلى قورىتىندىسى دەپ سانايتىنىن ايتتى.
«بۇل كەزدەسۋدىڭ ماڭىزى جوعارى دەپ ويلايمىن. ويتكەنى پرەزيدەنت سۇحبات بارىسىندا ەلىمىزدىڭ الەۋمەتتىك-ەكونوميكالىق جانە حالىقارالىق جاعدايىنا توقتالىپ ءوتتى. سۇحباتتا وتكەن 2023 جىلدى قورىتىندىلاپ, الداعى ۋاقىتتا ىسكە اساتىن باسىم باعىتتار مەن ساياسي وزگەرىستەر تۋرالى جان-جاقتى ايتتى. مىنە, سوندىقتان بۇل كەزدەسۋدىڭ جاستارعا ماڭىزى زور دەپ ەسەپتەيمىن. ءيا, قازىر جاستار گازەت وقىمايتىنى بەلگىلى. سوندىقتان دا وسىنداي ماڭىزدى ءارى سالماقتى سۇحباتتاردى اعا بۋىن وكىلدەرى جاستارمەن بىرلەسىپ تالقىلاۋى قاجەت. سونىمەن قاتار پرەزيدەنت قاڭتار وقيعاسىن تۋدىرعان سەبەپتەردى, ولاردىڭ كەيبىر سالدارىن اتاپ كورسەتتى. شىن مانىندە, پرەزيدەنت ەلىمىزدە دەموكراتيالاندىرۋ پروتسەسى جوعارى ەكەنىن جانە ول دامىپ كەلە جاتقانىن اتاپ ءوتتى» دەدى ج.بودەشەۆ.
پروفەسسور سەرىك دجالماكانوۆ ءوز سوزىندە پرەزيدەنت Egemen Qazaqstan گازەتىنە بەرگەن سۇحباتىندا وسى كۇنگە دەيىنگى حالىقتى تولعاندىرىپ وتىرعان قوعامدىق ماسەلەلەرگە اشىق جاۋاپ بەرگەنىن اتاپ ءوتتى.
«پرەزيدەنتتىڭ «ءبىز وزىق ويلى ۇلت رەتىندە تەك قانا العا قاراۋىمىز كەرەك» اتتى سۇحباتىن وقىپ, ءبىراز كەرەكتى دۇنيەلەردى وزىمە ءتۇرتىپ الدىم. ەڭ اۋەلى, بۇل سۇحباتتىڭ باستى ەرەكشەلىگى – پرەزيدەنت وسى كۇنگە دەيىنگى ساياسي وقيعالارعا, حالىقتى تولعاندىرىپ وتىرعان قوعامدىق ماسەلەلەرگە اشىق جاۋاپ بەرىپتى. ءدال قازىر قوعامدا قىزۋ تالقىلانىپ جاتقان اتوم ستانتسياسى ماسەلەسىنە جاۋاپ بەردى. مۇنى ەندى حالىق شەشەتىن بولدى. سونىمەن قاتار ەلىمىز بيىل بىرنەشە بەدەلدى حالىقارالىق ۇيىمعا توراعالىق ەتەدى. اتاپ ايتساق, شانحاي ىنتىماقتاستىق ۇيىمىنا, ۇجىمدىق قاۋىپسىزدىك تۋرالى شارت ۇيىمىنا, ازياداعى ءوزارا ءىس-قيمىل جانە سەنىم شارالارى جونىندەگى كەڭەسكە, تۇركى مەملەكەتتەرى ۇيىمىنا, ارالدى قۇتقارۋ حالىقارالىق قورىنا, ازىق-تۇلىك قاۋىپسىزدىگى جونىندەگى يسلام ۇيىمدارى. جالپى بۇل سۇحبات ۇلكەندەرگە دە, جاستارعا دا وي سالدى دەپ پايىمدايمىن. سوندىقتان دا ستۋدەنتتەردى وسى سۇحباتتى تولىق وقۋعا شاقىرامىن» دەدى پروفەسسور.
جيىن بارىسىندا نۇرا اۋدانى ارداگەرلەر كەڭەسىنىڭ وزگە مۇشەلەرى دە وي-پىكىرىن ورتاعا سالىپ, جاستارمەن بىرگە سۇحباتتا ايتىلعان ماسەلەلەردى تالقىلادى.
زارينا سارسەنبايقىزى
