ولەڭدەرى وتتى ورەندەر
استانا قالاسىنىڭ جاستار ساياساتى ماسەلەلەرى باسقارماسى ەلباسىنىڭ «بولاشاققا باعدار: رۋحاني جاڭعىرۋ» ماقالاسى اياسىندا «مەملەكەتتىك رامىزدەر ماقتانىشىم!» جانە «ماڭگىلىك ەل – مۇراتىم!» تاقىرىبىندا ۇيىمداستىرعان جاس اقىندار ءمۇشايراسىنىڭ جەڭىمپازدارى انىقتالدى.
مۇشايراعا ەلىمىزدىڭ ءار ايماعىنان ەكى جۇزگە تارتا جاس اقىن قاتىسىپ, باق سىنادى. ولاردان وتانسۇيگىشتىك رۋحتا جازىلعان ولەڭدەر كوپ ءتۇستى. قازىلار القاسىنا بىرىنەن-ءبىرى وتەتىن جۇيرىكتەردى انىقتاۋ وڭايعا تيگەن جوق. «جۇزدەن جۇيرىك, مىڭنان تۇلپارلار» عانا دارالاندى.
ءبىرىنشى ورىندى شىعىس
قازاقستان وبلىسىنان كەلگەن جاس اقىن راۋان قابيدولدين جەڭىپ الدى. وعان 300 مىڭ تەڭگە بەرىلدى. ەكىنشى ورىندى قاراعاندىلىق امانكەلدى اقجىگىت پەن جامبىلدىق ناۋرىزبەك سارشاەۆ يەلەندى. ولارعا 200 مىڭ تەڭگەدەن تابىس ەتىلدى. ءۇشىنشى ورىن العان ءۇش اقىنعا 100 مىڭ تەڭگەدەن بۇيىردى. ولار: ەلوردالىق ءابىل ميراس, اتىراۋلىق
ديدار ۇزاعاليەۆ جانە باتىس قازاقستان وبلىسىنىڭ ورەنى تالاپ شەرحان. «ۇزدىك اقىن» اتالىمى بويىنشا الىبەك اماندىقوۆ, ءجاميليا باحتيارقىزى, اينۇر پولوتوۆا, ۇلجالعاس
مامادياروۆا توپ جاردى. ەندى مۇشايراعا قاتىسىپ, وتتى ولەڭدەرىمەن كورىنگەن وتىز اقىننىڭ جىرى جيناق بولىپ جارىق كورەدى.
جاستار ساياساتى ماسەلەلەرى باسقارماسىنىڭ باسشىسى اسحات ورالوۆ ءوز سوزىندە جاس اقىندار ءمۇشايراسى العاش وتكىزىلىپ جاتقاندىعىن ەسكەرىپ, ەندى ونى تاماشا ءداستۇرگە اينالدىرۋدى كوزدەپ وتىرعاندىعىن جەتكىزدى. الداعى جىلعى جىر بايقاۋى ەلوردانىڭ جيىرما جىلدىق مەرەيتويىنا ارنالماق.
ازامات ەسەنجول