قازاقستان رەسپۋبليكاسى تاۋەلسىز ەل رەتىندە العاش رەت 1994 جىلعى قىسقى وليمپيادا ويىندارىنا قاتىستى. قازاقستان سپورتشىلارى ودان كەيىن 7 قىسقى جانە 7 جازعى ويىنداردا ەگەمەن ەلىمىزدىڭ نامىسىن قورعادى. ال «وليمپيادا چەمپيونى» دەگەن قۇرمەتتى اتاققا قول جەتكىزگەن سايىپقىران قاي ەلدە دە ەلىنىڭ, ۇلتىنىڭ ماقتانىشى بولادى.
وليمپيادا ويىندارىنىڭ العاشقى التىن جۇلدەسىن اتاقتى شاڭعىشى ۆلاديمير سميرنوۆ اكەلدى. ول فينليانديانىڭ ليللەحاممەر قالاسىندا وتكەن بايراقتى باسەكەدە 50 شاقىرىمدىق مارافون جارىسىندا جەڭىمپاز اتاندى. بۇل ازىرگە قىسقى ويىنداردان تۇسكەن جالعىز التىن مەدال بولىپ تۇر.
ال جازعى ويىنداردا قازاقستان سپورتشىلارىنىڭ جارقىن جەڭىستەرى از بولعان جوق. اتاپ ايتساق, 1996 جىلى اقش-تىڭ اتلانتا قالاسىندا وتكەن جازعى وليمپيادا ويىندارىندا بوكسشى ۆاسيلي جيروۆ, يۋري مەلنيچەنكو گرەك-ريم كۇرەسىنەن جانە بەسسايىسشى الەكساندر پارىگين جەڭىس تۇعىرىنىڭ ەڭ بيىك ساتىسىنا كوتەرىلدى. جيروۆ وليمپيادا چەمپيونى اتاعىمەن قوسا ەڭ ۇزدىك بوكسشىعا بەرىلەتىن باركەر كۋبوگىن يەلەندى.
2000 جىلى اۆستراليانىڭ سيدنەي قالاسىندا وتكەن ويىنداردا دا قازاقستان ءانۇرانى 3 رەت شىرقالدى. بوكسشىلار بەكزات ساتتارحانوۆ پەن ەرماحان يبرايىموۆ التىن جۇلدەگە قول سوزسا, جەڭىل اتلەت ولگا شيشيگينا 100 مەترگە كەدەرگىلەرمەن جۇگىرۋ جارىسىندا الدىنا جان سالمادى.
2004 جىلى گرەكيانىڭ افينى قالاسىندا تۋى جەلبىرەگەن وليمپيادا ويىندارىندا قازاقستان ۇلتتىق قۇراماسىنىڭ قورجىنىنا ءبىر-اق التىن ءتۇستى. ەل ابىرويىن ساقتاپ قالعان جالعىز التىن مەدالدى بوكسشى باقتيار ارتاەۆ جەڭىپ الدى. 69 كەلى سالماقتا سىنعا تۇسكەن قازاق بوكسشىسى ەڭ ۇزدىك بوكسشىعا بەرىلەتىن باركەر كۋبوگىن دا قانجىعاسىنا بايلادى.
2008 جىلعى وليمپيادا ويىندارى قىتاي استاناسى – بەيجىڭدە ءوتتى. بۇل جولى قازاقستان سپورتشىلارى 2 التىن جۇلدەگە قول جەتكىزدى. بوكسشى باقىت سارسەكباەۆ تاعى دا 69 كەلى سالماقتا چەمپيون اتاندى. اللا ۆاجەنينا اۋىر اتلەتيكادان التىن الدى. اۋىر اتلەت يليا يلين دە جەڭىمپاز اتانعان ەدى, وكىنىشكە قاراي, ارادا بىرنەشە جىل وتكەننەن كەيىن قازاقستاندىق سپورتشىنىڭ دوپينگ پايدالانعانى انىقتالىپ, چەمپيوندىق اتاعىنىڭ كۇشى جويىلدى.
2012 جىلعى ۇلىبريتانيا استاناسى – لوندوندا وتكەن وليمپيادا ويىنداردا قازاقستان ۇلتتىق كومانداسى رەكوردتىق كورسەتكىش ورناتتى. جەتى سپورتشىمىز وليمپيادا چەمپيونى دەگەن اتاققا يە بولدى. العاشقى التىندى ۆەلوشاباندوز الەكساندر ۆينوكۋروۆ اكەلسە, بوكسشى سەرىك ساپيەۆ تاعى دا 69 كەلى سالماقتا توپ جارىپ, ونىمەن قوسا, ەڭ ۇزدىك بوكسشىعا بەرىلەتىن باركەر كۋبوگىن يەلەندى. جەڭىل اتلەت ولگا رىپاكوۆا ءۇش قارعىپ سەكىرۋدەن چەمپيون اتاندى. سونداي-اق اۋىر اتلەتتەر يليا يلين ەكىنشى رەت, زۋلفيا چينشانلو, مايا مانەزا جانە سۆەتلانا پودوبەدوۆا چەمپيون اتانعان ەدى, الايدا بىرنەشە جىلدان كەيىن تاعى دا دوپينگ داۋىنا بايلانىستى بۇل اتلەتتەردىڭ كورسەتكىشى جوققا شىعارىلدى.
2016 جىلعى جازعى وليمپيادا ويىندارىندا قازاقستان ۇلتتىق كومانداسىنىڭ قورجىنىنا 3 التىن مەدال ءتۇستى. بوكسشى دانيار ەلەۋسىنوۆ تاعى دا 69 كەلى سالماقتا چەمپيوندىق تۇعىرعا كوتەرىلسە, براسس ادىسىمەن ءجۇزۋشى دميتري بالاندين التىن مەدال ەنشىلەدى. اۋىر اتلەت نيدجات راگيموۆ تا التىن تۇعىردان كورىنىپ ەدى, وكىنىشكە قاراي, ونىڭ ناتيجەسى بەس جىلدان كەيىن دوپينگكە بايلانىستى جوققا شىعارىلدى.
2022 جىلى توكيودا وتەتىن وليمپيادا ويىندارى پاندەميا جاعدايىنا بايلانىستى ءبىر جىل كەشىگىپ ءوتتى. وكىنىشكە قاراي, بۇل ويىنداردان قازاقستان سپورتشىلارى التىن جۇلدەسىز قايتتى. چەمپيوندار قاتارىنان كورىنە المادى. تەك 8 قولا مەدال يەلەندىك.
جالپى قازاقستان سپورتشىلارى تاۋەلسىز مەملەكەت رەتىندە قاتىسقان 15 قىسقى جانە جازعى وليمپيادا ويىندارىنان 15 التىن مەدال, 21 كۇمىس مەدال, 36 قولا مەدال جەڭىپ الدى.
الدىمىزداعى 2024 جىلى كەزەكتى جازعى وليمپيادا ويىندارى وتەدى. پاريج تورىندەگى بايراقتى باسەكەدە قازاقستان سپورشىلارى توكيودا كەتكەن ەسەنى قايتارادى, قازاقتىڭ كوك تۋىن ەڭ بيىكتەن جەلبىرەتىپ, ءانۇرانىمىزدى الەم اسپانىندا اۋەلەتەدى دەپ سەنىممەن قارايمىز. ويتكەنى وليمپيادا ويىندارى – 4 جىلدا 1 رەت وتەتىن ەڭ مارتەبەلى سپورت سايىسى. ولاي بولسا ەگەمەن ەلدىگىمىزدى, ۇلتتىق نامىسىمىزدى ابىرويمەن قورعايتىن سايىپقىراندارىمىزعا ساتتىلىك سەرىك بولعاي دەمەكپىز!
