«استانا» كونتسەرت زالىندا نۇر-سۇلتان قالاسى اكىمدىگىنىڭ قولداۋىمەن «ساعىندىم سەنى» اتتى كورنەكتى ءانشى-كومپوزيتور, قازكسر حالىق ءارتىسى, مەملەكەتتىك سىيلىقتىڭ يەگەرى ەسكەندىر حاسانعاليەۆتى ەسكە الۋ كەشى ءوتتى. وسى كونتسەرتپەن ەلوردانىڭ ە.راحماديەۆ اتىنداعى مەملەكەتتىك اكادەميالىق فيلارمونيانىڭ ۇرلەمەلى وركەسترىنىڭ XXI كونتسەرتتىك ماۋسىمى اشىلدى. كومپوزيتوردىڭ جارى داريكو حاسانعاليەۆا مەن ۇلى ءبىرجان كەشتىڭ ارنايى قوناقتارى بولدى. ەلوردا اكىمدىگى اتىنان ولارعا قالا باسشىسىنىڭ ورىنباسارى اسحات ورالوۆ قۇرمەت كورسەتتى.
ۇرلەمەلى وركەستردىڭ (كوركەمدىك جەتەكشى نيكيتا پوچيتالين, باس ديريجەرى دارحان راحىمعاليەۆ) سۇيەمەلدەۋىمەن جاندى داۋىستا كومپوزيتوردىڭ ولمەس, وشپەس تۋىندىلارى شىرقالدى.
ەسكەندىر حاسانعاليەۆتىڭ ونەردەگى جولى انشىلىكتەن باستالدى. 21 جاسىندا اقىن ءوسپانالى يماناليەۆتىڭ ولەڭىنە ءوزىنىڭ العاشقى «اناعا سالەم» ءانىن جازدى. بۇل تۋىندىنىڭ جازىلعانىنا بيىل تۋرا الپىس جىل تولدى. ءوزىنىڭ شىعارماشىلىق عۇمىرىندا 200-گە جۋىق ءانى جازىلدى. سونىڭ ىشىندە بەيرەسمي تۇردە ەلدىڭ ءانۇرانىنا اينالعان «اتامەكەننىڭ» دۇنيەگە كەلگەنىنە جارتىعاسىردان استى.
كومپوزيتور كورنەكتى اقىن باكىر تاجىباەۆپەن بىرگە شىعارماشىلىق بايلانىستا بولىپ, ەكەۋى جەمىستى ەڭبەك ەتتى. حاسانعاليەۆتىڭ ءساتتى تۋىندىلارىنىڭ كوپشىلىگى وسى اقىننىڭ قالامىنان تۋعان. سونداي-اق قادىر مىرزا ءالي, تۇرسىناي ورازباەۆا, حاميت ەرعاليەۆ, باسقا دا اقىنداردىڭ ولەڭدەرىنە ءان جازدى. سونداي ەل ءسۇيىپ تىڭدايتىن «ادەمى-اۋ», «الماتىنىڭ الماسى», «جانارىم», «كەلشى, كەلشى, بالاشىم», «گۇل سەزىم» سەكىلدى جانە ت.ب. اندەرى كەشتە ايتىلدى.
ولاردى بەلگىلى انشىلەرمەن قاتار جاس انشىلەر شىرقادى. اتاپ ايتقاندا, قازاقستاننىڭ ەڭبەك سىڭىرگەن ارتىستەرى مايرا ءىلياسوۆا مەن نۇرلان ونەرباەۆ, قازاقستاننىڭ ەڭبەك سىڭىرگەن قايراتكەرلەرى سۆەتلانا ايتباەۆا, سۇندەت بايعوجين, التىناي جوراباەۆا, مارجان اراپباەۆا, ارايلىم راحىمقىزى, حالىقارالىق بايقاۋلاردىڭ لاۋرەاتتارى ايدىن جۇماباەۆ, نۇربول بالاپانوۆ, ايگەرىم وراز, پاراسات وتان, تالعات اللابيرينوۆ, اقبوتا كۇسنادين, اكىمحان ماجەنوۆ, مۇراتبەك حايرولدا, نۇربول بالاپانوۆ, باقداۋلەت جاقىپوۆ, ارۋجان قويشىقارا سالدى. «Alem» ەسترادالىق بي ءانسامبلى, ۇلتتىق گۆارديانىڭ «قۇرمەت» قاراۋىل روتاسى ونەر كورسەتتى.
نۇرلان ونەرباەۆ:
– بۇگىنگى كەشتە سىزدەر مەن بىزدەردىڭ باسىمىزدى قوسىپ وتىرعان, ارقايسىمىزدىڭ جۇرەگىمىزدىڭ تورىنەن ورىن العان – قاناتتى اندەر. سول اندەردى دۇنيەگە الىپ كەلگەن – قازاقتىڭ ءبىرتۋار ازاماتى, تاۋتۇلعا, ۇلى كومپوزيتور ەسكەندىر حاسانعاليەۆ. بۇل كەش ەسكە الۋ كەشى بولىپ جاريالاندى. ال نەگىزىنەن, ەسكەندىر اعامىزدىڭ ءوزىنىڭ قاتىسۋىمەن ءوتۋ كەرەك ەدى. «ادامنىڭ ايتقانى بولمايدى, اللانىڭ دەگەنى بولادى» دەيدى. ارتىندا سۇيىكتى تىڭدارمانى بار دا, تۇياعى, ءوزىنىڭ ءىزىن جالعاۋشى ۇلى بار دا, بۇگىن ورتامىزدا وتىرعان داريكو جەڭگەمىز بار دا اعامىزدىڭ ەسىمى دە, ۇلى شىعارمالارى دا ەشقاشان وشپەيدى.
https://youtu.be/cNIL9de41v0
