ەكىنشى دۇنيەجۇزىلىك سوعىس جىلدارىندا دۇنيە ەسىگىن اشقان سابيلەردىڭ ءوزى بيىل جەتپىستەن اسىپ وتىر. سونداي ازاماتتىڭ ءبىرى كوپشىلىككە قادىرلى, بارلىق سانالى عۇمىرىن ۇستازدىققا ارناعان ساتىباي قاجىمۇراتۇلى ءابدىراحمانوۆ.
بۇگىنگى تاڭدا جەتپىستىڭ بەل ورتاسىنا كوتەرىلگەن ساتىباي قاجىمۇراتۇلى سوعىستى ونشا بىلە قويماسا دا, اتا-اناسىنا تۇسكەن قيىنشىلىقتى سەزىنىپ وسكەن ەدى. اقمولا وبلىسىنداعى كىشكەنتاي عانا مەرەكە اتتى اۋىلدا كىندىك قانى تامعان ساتىباي وسىنداعى قازاقشا ءتورت سىنىپتى بىتىرگەننەن كەيىن ءارى قاراي قايدا باراتىنىن بىلمەيدى. سول كەزەڭدە سوعىستا بولىپ كەلگەن اكەسىنىڭ ءىنىسى شايمۇرات ەپتەپ وقىعانى, ساياسي ساۋاتتىلىعى بار كىسى ەكەن. بالانىڭ كەلەشەگى ورىس تىلىندە ەكەنىن اڭعارىپ, ەروفەەۆكا جەتىجىلدىق مەكتەبىنىڭ ەكىنشى ورىس سىنىبىنا وقۋعا بەرەدى. ءبىر اۋىز ورىس ءتىلىن بىلمەيتىن بالا جارتى جىلدا وسى ءتىلدى جاقسى مەڭگەرىپ كەتەدى. سودان ونجىلدىقتى جۋراۆلەۆكا ورتا مەكتەبىندە ءتامامدايدى. مەكتەپتى ويداعىداي بىتىرگەن جەتكىنشەك, ەندى نە ىستەيمىن دەگەن ويعا قالادى. جوعارى وقۋ ورنىنا بارايىن دەسە, كارى اتا-اناسىنا قامقورشى كەرەك. وسىنداي ويدا جۇرگەندە اۋداندىق وقۋ ءبولىمىنىڭ باسشىسى ءبىر مەكتەپكە ماتەماتيكا ءپانىنىڭ مۇعالىمى بولىپ بارۋدى ۇسىنادى. وسى ۇسىنىستى قابىل العان جاس جىگىت ۋريۋپين مەكتەبىنە ورنالاسادى. ءبىر جىلدان كەيىن ماتەماتيكا پانىنە زەرەك جىگىت قازاق مەملەكەتتىك ۋنيۆەرسيتەتىنىڭ مەحانيكا-ماتەماتيكا فاكۋلتەتىنىڭ ستۋدەنتى بولىپ شىعا كەلەدى. ستۋدەنت بولىپ ءجۇرىپ, قارت اتا-اناسىنىڭ ءتىرى كەزىندە كەلىن ءتۇسىرىپ, نەمەرە سۇيگىزەيىن دەگەن نيەتپەن جارقايىڭ اۋدانىنىڭ ستۋدەنت قىزى ماناتپەن تانىسىپ, وتباسىن قۇرادى. بۇل 1966 جىل بولاتىن. مىنە, سودان بەرىدە جارتى عاسىر ۋاقىت ءوتتى. تاياۋ ۋاقىتتا ولار التىن تويلارىن اتاپ وتپەكشى. بۇگىندە ءۇش بالانىڭ اكەسى, التى نەمەرەسىنىڭ اتاسى بولىپ وتىرعان ساتىباي قاجىمۇراتۇلى «ءوز ءومىرىم – ءوز باقىتىم» دەيدى وتكەن جولىنا ريزاشىلىق سەزىمىن ءبىلدىرىپ.
ۋنيۆەرسيتەتتى قىزىل ديپلوممەن بىتىرگەن ساتىباي ءابدىراحمانوۆ تسەلينوگراد ينجەنەرلىك-قۇرىلىس ينستيتۋتىنا ۇستاز ەتىپ جىبەرەدى. از ۋاقىتتىڭ ىشىندە اعا وقىتۋشى دارەجەسىنە كوتەرىلەدى. قازاق پوليتەحنيكالىق ينستيتۋتىنىڭ اسپيرانتۋراسىن بىتىرەدى. الايدا, ءارتۇرلى كەدەرگىلەرگە بايلانىستى عىلىمي اتاق الا المايدى. دەگەنمەن, ارىپتەستەرى مەن شاكىرتتەرىنىڭ كوپشىلىگى بۇل كىسىنى «حالىق پروفەسسورى» دەپ اتايدى. ويتكەنى, ساكەڭ ماتەماتيكا ءپانىنىڭ جىلىگىن شاعىپ, مايىن ىشكەن ۇستازداردىڭ قاتارىنا جاتادى.
بۇگىندە جەتپىستىڭ بەل ورتاسىنان اسىپ بارا جاتقان ساتىباي قاجىمۇراتۇلى ەلۋ جىل وتاسقان زايىبى مانات جۇنىسقىزى ەكەۋى بالالارىنىڭ اماندىعىن تىلەپ, نەمەرەلەرىنىڭ كەلەشەگىن ويلاپ جۇرگەن ابزال جاندار. ولار باقىتتى وتباسىنىڭ ۇيىتقىسى بولىپ وتىر. وسى عۇمىرلارى ءالى ۇزاق جىلدارعا جالعاسا بەرسىن دەمەكپىن.
ەركىن داۋەشۇلى,
قازاقستان جۋرناليستەر
وداعىنىڭ مۇشەسى
