ومىربەكتىڭ ورنەكتەرى

وقۋشىلار سارايىندا قازاقستان سۋرەتشىلەر وداعىنىڭ مۇشەسى, مادەنيەت سالاسىنىڭ ۇزدىگى, سۋرەتشى ومىربەك تىلەۋليەۆتىڭ «اتامەكەن» اتتى جەكە كورمەسى ءوتتى.

كورمەگە اۆتوردىڭ كەيىنگى جىلدارى سالعان 50-دەن استام جۇمىس­تارى قويىلدى.
تىلەۋليەۆتىڭ تۋىندىلارى ۇلتتىق كولوريتكە وتە باي. ونىڭ ءاربىر كارتيناسىنان قازاقتىڭ جانى مەن بولمىسىن كورەسىز. اسىرەسە, دانالىقتىڭ كەيىپكەرىنە اينالعان قاريالاردىڭ بەينەسى ايشىقتى كوركەمدەلگەن. جيىر­ماسىنشى عاسىرداعى زۇلمات جىلداردى زەردەلەگەن «1916 جىل», «1932 جىل», «1937 جىل», «1986 جىل» دەگەن جۇمىستارىنان حالقىمىزدىڭ باسىنان وتكەن اۋىر كەزەڭدى بوياۋ تىلىمەن سويلەتكەن. بۇل كارتينالاردان قاسىنان جاي ءوتىپ كەتە المايسىز. ءسىزدى تەرەڭ ويعا قالدىرىپ, مۇڭعا باتىرادى. جالپى, سۋرەتشىنىڭ قىلقالامى – گرافيكاعا دا, ابستراكتىگە دە جۇيرىك. كورمەنىڭ تاقىرىبىنا بەرىلگەن «اتامەكەن» تۋىندىسى – جەر مەن كوكتى ءبىر كەڭىستىكتەگى اداممەن ۇيلەستىرەتىن وتباسىلىق اعاش ءتارىزدى بەينەلەگەن. «قوقيقازدار» كارتيناسى دا توسىن ويلارعا جەتەلەيدى.
كورمەنىڭ اشىلۋىندا بەلگىلى جازۋشى جولتاي-جۇمات ءالماشۇلى بالا كۇنىنەن بىرگە وسكەن دوسى جايىندا جىلى ەستەلىك ءوربىتتى.
– ەكەۋمىزدىڭ بالالىق شاعىمىز بىرگە ءوتتى. ونەرگە دە بىردەي قادام باستىق. مەن جۋرناليستيكانى, ول سۋرەتشىلىك جولدى قۋدى. ومىربەك الپىسقا كەلسە دە, ۇنەمى جاس جىگىتتەي ىزدەنىپ جۇرەدى. بۇگىنگى كورمە دە بۇرىنعى كورمەدەن باسقاشا. وزگەشە مانەرمەن سالعان جۇمىستارىن كورىپ ريزا بولىپ وتىرمىن. ونىڭ ماعان تاقىرىپتى كەڭ الا بىلەتىندىگى ۇنايدى. سۋرەتتى قانداي جانردا سالسا دا, سونىڭ وزەگىندە ۇلتتىق نەگىز جاتادى. قازاقى ءداستۇر مەن بولمىسىمىز اتويلاپ كورىنىپ تۇرادى, – دەدى قالامگەر.
ومىربەك اعامىز ءبىراز جىلداردان بەرى وقۋشىلار سارايىندا بالالارعا بەينەلەۋ ونەرىنەن ساباق بەرەدى. وسى ءبىلىم ورداسىنىڭ باسشىسى ەربول ىرگەباي سۋرەتشىگە ىزگى لەبىزىن ءبىلدىرىپ, العىس حاتپەن ماراپاتتادى.
نەگىزى, بۇل كىسىنىڭ ەڭبەك جولى كىتاپ سۋرەتشىلىگىنەن باستالعان. ءبىراز جىل باسپا سالاسىندا ەڭبەك ەتىپ, تۇمانباي مولداعاليەۆ, فاريزا وڭعارسىنوۆا, تۇرىسبەك ساۋكەتاەۆ سەكىلدى كوپتەگەن اقىن-جازۋشىلاردىڭ كىتاپتارىن بەزەندىرگەن.
ايتپاقشى, الداعى جىلى كيپردە تۇركى ەلدەرى الەمىنىڭ مۇراجايى اشىلادى. سوعان تىلەۋليەۆتىڭ دە تۋىندىلارى قويىلماق.