وسىدان وتىز جىل بۇرىن تۋعان ازامات ەلدىڭ ەرتەڭىن ويلايتىن جاسقا جەتتى. سول سياقتى «استانا اقشامى» گازەتى دە ەسەيىپ, تولىسىپ, ءومىر اعىسىنان ءوز ارناسىن تابا ءبىلدى. ونىڭ بۇگىنگى دەڭگەيىنە جەتۋىنە جۋرناليستەردىڭ بىرنەشە تولقىنى ۇلەس قوستى. ولار وزدەرىنە جۇكتەلگەن مىندەتتى تولىق ورىندادى دەپ ويلايمىن. ءوزىم وسى باسىلىمنىڭ كوپ جىلداردان بەرى اۆتورىمىن, گازەت بەتىندە بىرنەشە تاريحي, قوعامدىق تاقىرىپتا قوزعاعان دۇنيەلەرىم جارىق كوردى.
قازىر ۋاقىت تا, وقىرمان دا وزگەردى. «استانا اقشامى» – تاۋەلسىز, ءوز-ءوزىن اسىراپ وتىرعان باسىلىم ەمەس. ەلوردا اكىمدىگىنىڭ قاراماعىنداعى گازەت. سوندىقتان دا سونىڭ ءسوزىن سويلەۋگە دە مىندەتتى. ول ءۇشىن باسىلىمدى ايىپتاۋعا بولمايدى. قالا اكىمدىگى جۇرگىزىپ وتىرعان جۇمىستاردى, ءىس-شارالاردى دەر كەزىندە جاريالاپ وتىرعان دۇرىس. سونىمەن بىرگە قازىرگى استانالىقتاردىڭ رۋحاني-مادەني ءومىرى, عىلىمي دەڭگەيى تۋرالى تالداۋ ماتەريالدارىن بەرىپ تۇرۋعا بولادى. بۇگىن ەلوردادا قانشاما جوعارى وقۋ ورنى بار, ولاردىڭ عىلىمي دەڭگەيى قانداي, قانداي ديسسەرتاتسيالار قورعالدى, قانداي عىلىمي جاڭالىقتار اشىلدى, ولاردىڭ وندىرىسكە, ەكونوميكاعا پايداسى بار ما الدە ديسسەرتاتسيا قورعاۋ ءۇشىن جازىلعان با؟ وسى ۇلكەن ماسەلە گازەتتە قوزعالسا دەيمىن. بۇل قاراپايىم وقىرمانعا ەمەس, عىلىم سالاسىندا جۇرگەن جاستارعا دا قىزىقتى بولار ەدى.
ەلىمىزدىڭ باس قالاسى بولعاننان كەيىن ونىڭ مادەنيەتى بولۋ كەرەك. شىن مانىندە, استانا مادەنيەتى رەسپۋبليكاعا ۇلگى بولعانى ءجون. سول مادەنيەت شىنىمەن سولاي ما؟ ماسەلەن, «استانا وپەرا» تەاترى بار, سونىڭ رەپەرتۋارىن تالداپ جازعان جان بار ما؟ ىلعي ەۋروپالىق كلاسسيكالىق شىعارمالاردى قويىپ جاتىر, ونى ساحناعا ازىرلەۋ ءۇشىن سىرتتان رەجيسسەر شاقىرىلادى. ەندى «اباي», «ءبىرجان-سارا» سەكىلدى ۇلتىمىزدىڭ ءىنجۋ-مارجاندارىن قويدى. بىراق وسى تەاتر اشىلعاننان بەرى جاڭادان قازاقتىڭ كلاسسيكالىق وپەراسىن جازدىرۋعا ىقپال ەتە الدى ما؟ سول سەكىلدى قازاق تەاترى دا استانانىڭ تاريحىن, بۇگىنگى بەينەسىن كورسەتەتىن سپەكتاكل ۇسىندى ما؟ مەنىڭشە, جوق.
قازىر جىلت ەتكەن كىشكەنتاي جەتىستىكتى جارنامالاۋعا ءۇيىر بولدىق. ول قوعامدى العا سۇيرەمەيدى, قايتا كەرى كەتىرەدى. ادامدى بولىمسىز نارسەگە قاناعاتتاندىرادى. وسىدان ارىلۋ كەرەك دەپ ويلايمىن. بىرەۋدى ماقتاۋ ءۇشىن مىڭ ويلانىپ, ءجۇز تولعانۋ قاجەت. ءوزىمىزدى دارىپتەۋدى ادەتكە اينالدىرىپ الدىق. بىرەۋدىڭ مەرەيتويى نەمەسە جاڭا كىتابى شىقسا, جاتا كەپ ماقتايمىز. بۇل – دۇرىس ەمەس. كىتابى شىقسا, سول جايىندا پىكىر ۇيىمداستىر, وقى, ول نەسىمەن دۇرىس, بەلگىلى ءبىر تاقىرىپتا جازىلسا بۇرىنعى عىلىمي نەگىزگە نە جاڭالىق قوستى, كوركەم تۋىندى بولسا, بۇگىنگى قوعامنىڭ شىندىعىن اشا الدى ما, تاريحقا ارنالسا, سوعان كوركەمدىك دەڭگەيى لايىقتى ما؟ وسىلاردىڭ ءبارىن تالداپ, جازۋ كەرەك.
سودان كەيىن باسىلىمدا مەكتەپ وقۋشىلارى مەن ستۋدەنتتەردىڭ شىعارماشىلىعىن بەرىپ تۇرسا دەيمىن. قازىر تالانتتى بالالاردى ىزدەپ جاتقان ەشكىم جوق. قازاق ءتىلىن دامىتۋ كەرەك دەپ ايتا بەرگەننەن ەشنارسە شىقپايدى, قايتا تىلدىك ورتا جاساۋ قاجەت. تىلدىك ورتا وسىلاي جاسالادى.
قىسقاسى, كوكەيىمدە جۇرگەن ءبىراز نارسەنى ايتقان سەكىلدىمىن. «استانا اقشامىنىڭ» وتىز جىلدىق بەلەسىمەن گازەت ۇجىمىن قۇتتىقتاپ, بۇدان دا بيىك اسۋلاردان اسا بەرسىن دەمەكپىن!
الدان سمايىل,
جازۋشى, مەملەكەتتىك
سىيلىقتىڭ لاۋرەاتى
