كەشە «استانا وپەرا» تەاترىنىڭ ۇلكەن زالىندا اتالعان ونەر ورداسىنداعى بالالار ستۋدياسىنىڭ ءسوليسى, ون جاستاعى قاجىمۇرات ەركىن ساحنادا العاش رەت ك.ورفتىڭ اتاقتى «كارمينا بۋرانا» ساحنالىق كانتاتاسىنىڭ تەنور پارتياسىن ورىندادى.
راسىندا, بۇل – ەلەۋلى جاڭالىق. ون جاسار ورەن جەكە نومىرمەن سوليست رەتىندە قويىلىمعا قاتىسىپ, دەبيۋت جاسادى. ونىڭ ونەرىنە كورەرمەندەر ريزا بولىپ, ۇزاق ۋاقىت قول شاپالاقتادى. ارينە, جاس ونەرپاز ساحنا سيقىرىن ابدەن مەڭگەرگەن. داۋىسى دا اۋەزدى. پارتيانى ءساتتى الىپ شىقتى. ول بۇدان بۇرىن دا دج.ءپۋچچينيدىڭ «توسكا» وپەراسىندا باقتاشى بالا ءرولىن, «بوگەما» وپەراسىندا سولونى ورىنداعان. اعا بۋىن وكىلدەرىمەن ءتۇرلى كونتسەرتتىك باعدارلامالارعا قاتىسقان. قىسقاسى, بولاشاعىنان كوپ ءۇمىت كۇتەتىن جاس دارىن. بەلگىلى ديريجەر ابزال مۇحيتدينوۆ: «كارل ورفتىڭ وسىنداي بىرەگەي بالا-ءارتىسى بولعاندا, ول بۇل پارتيانى سوعان ارناپ جازار ەدى» دەپ ايتادى. وسىدان-اق قاجىمۇراتتىڭ جوعارى كاسىبيلىگىن, ارتىستىگىن, ايرىقشا مۋزىكالىق قابىلەتىن كورە الاسىز.
«ول قاراپايىم ەمەس ۆوكالدىق پارتيانى كەرەمەت يگەرىپ قانا قويماي, جاڭا ساحنالىق بەينەنى دە ءساتتى جاسادى. مۇنداي تاجىريبە ومىردە بۇرىن بولعان ەمەس ەدى» دەدى قويىلىم رەجيسسەرى ناتاليا كاگادي.
اتاقتى كومپوزيتوردىڭ ەڭ تانىمال شىعارماسى سيمفونيالىق وركەستر, حور, بالالار حورى مەن وپەرا ترۋپپاسى جەتەكشى سوليستەرىنىڭ ورىنداۋىندا شىرقالدى. سوپرانو پارتياسىن باشقۇرتستاننىڭ ەڭبەك سىڭىرگەن ءارتىسى الفيا كاريموۆا ورىندادى.
بۇل ليبرەتتوسىنىڭ نەگىزىندە ورتاعاسىرلىق پوەزيا جيناعىنان الىنعان لاتىن جانە كونە نەمىس تىلدەرىندەگى جيىرما ءتورت ولەڭ جاتىر. ساحنالىق كانتاتا بۇگىنگى كۇننىڭ دە وزەكتى تاقىرىپتارىن قامتىدى. اسىرەسە, ءومىردىڭ قاس-قاعىم ءساتى, تابىس پەن بايلىقتىڭ تۇراقسىزدىعى, اسقاق ماحاببات پەن پەندەلىك قۋانىش سەكىلدى كۇندەلىكتى تىرشىلىكتە ساپىرىلىسىپ جاتاتىن جاعدايلارى شىنايى ورىلگەن.
قويىلىمدى تاماشالاۋعا كەلگەن كورەرمەندەر جاس تالانت قاجىمۇرات پەن باسقا دا سوليستەردىڭ ونەرىنە ءتانتى بولىپ, ريزا كوڭىلمەن تارقاستى.
ازامات ەسەنجول
