ون جىلدان كەيىن كەش قالامىز
– بۇل جولعى جولداۋ تولىقتاي الەۋمەتتىك باعىتتا بولدى. وسىعان وراي, بىرنەشە ماڭىزدى ماسەلەلەرگە توقتالايىن. بىرىنشىدەن, ەلباسى جولداۋدا ەڭ تومەنگى ەڭبەكاقى كولەمىن 28-دەن 42 مىڭ تەڭگەگە ارتتىرۋ تۋرالى ايتتى. ياعني الداعى ۋاقىتتا 1,5 ملن قازاقستاندىقتاردىڭ جالاقىسى 35 پايىزعا وسەدى دەگەن ءسوز. بۇدان بيۋدجەتكە ايتارلىقتاي سالماق تۇسەتىنىنە قاراماستان, مەملەكەت قاراپايىم حالىقتىڭ الەۋمەتتىك احۋالىن جاقسارتۋ ءۇشىن وسىنداي قادامعا بارىپ وتىر.
ەكىنشىدەن, قولجەتىمدى باسپانا. بۇل ورايدا العاشقى جارنا تولەۋ مەن جاردەماقشا وتە ماڭىزدى ماسەلە بولىپ تابىلادى. دەمەك, باسپانانىڭ قولجەتىمدىلىگى ارتادى. مىسالى, «7-20-25» باعدارلاماسى ارقىلى كوپتەگەن قازاقستاندىقتار ءۇي الادى. ەلباسىمىز ايتقانداي, العاشقى جارناعا جاردەماقشا ءبولۋ ارقىلى باسپانالى بولاتىن ازاماتتاردىڭ سانى كوبەيەدى.
ۇشىنشىدەن, جالپى ىشكى ءونىمدى ارتتىرۋدى بۇگىننەن قولعا الماساق, 10 جىلدان كەيىن كەش قالامىز. ءجىو-ءنىڭ 10 پايىزىن ءبىلىم بەرۋ, دەنساۋلىق ساقتاۋ, عىلىمدى وركەندەتۋگە جۇمساۋ – اسا قۇپتارلىق باستاما. سەبەبى بۇل سالالار دامىماي, ەل دە دامىمايدى. ەلباسىنىڭ ءوزى مۇعالىمنىڭ مارتەبەسىن ءوسىرۋ ءۇشىن ارنايى زاڭ قابىلداناتىنىن ايتتى. سونداي-اق, ورتا جانە جوعارى ءبىلىم بەرۋگە قاتىستى دا ماسەلەلەر ءسوز بولدى. مۇعالىمدەر ءبىلىمدى, بىلىكتى بولماسا, جاستارىمىز وزگە ەلدەرگە وقۋعا كەتەدى.
تورتىنشىدەن, 2025 جىلعا دەيىن «بيزنەستىڭ جول كارتاسى-2020» باعدارلاماسىنىڭ ۇزارتىلاتىنى جانە وعان جىل سايىن 30 ملرد تەڭگە بولىنەتىنى دە كوپشىلىكتى قۋانتتى. ويتكەنى اتالعان باعدارلاما ءوزىنىڭ ءتيىمدىلىگىن تولىق دالەلدەدى. سونىمەن قاتار, تىكەلەي ينۆەستيتسيالار قورىن قۇرۋ جونىندەگى ەلباسىنىڭ باستاماسىن اتاپ ايتقىم كەلەدى. بۇل ماقساتقا شامامەن 300 ملرد تەڭگە ءبولىنەدى. بۇل قازىرگى زامانعا سىن-قاتەرلەرگە ءۇن قاتۋ دەپ تۇسىنەمىن. ويتكەنى ءبىز شيكىزات شىعاراتىن ەلمىز. ءوزىمىزدىڭ ءوندىرىسىمىزدى وركەندەتكەندە عانا شيكىزاتتىق ەل دەگەن اتاۋدان قۇتىلامىز.