ونەگەلى اكەلەردى ارداقتايدى
جاقىندا ەلورداداعى جامبىل جاباەۆ اتىنداعى №4 مەكتەپ-گيمنازياسىندا «وتباسى – ادامزات بەسىگىن تەربەگەن ۇيا» اتتى اتا-انالار فورۋمى ءوتتى.
فورۋمنىڭ وتۋىنە قالالىق اتا-انالار قاۋىمداستىعى مۇرىندىق بولدى. مۇنداي اۋقىمدى ءىس-شارا العاش ۇيىمداستىرىلىپ وتىر ەكەن. فورۋمعا قر پارلامەنتى ءماجىلىسىنىڭ دەپۋتاتى يرينا سميرنوۆا, ەلىمىزدەگى بولگاريا مەن جاپونيا ەلشىلىگىنىڭ جاۋاپتى قىزمەتكەرلەرى, «نۇر وتان» پارتياسىنىڭ ماماندارى جانە تاعى باسقا قوعامدىق ۇيىمداردىڭ وكىلدەرى قاتىستى.
فورۋمدا بۇگىنگى جاس ۇرپاقتىڭ ءبىلىمى مەن تاربيەسىنە اتا-انا مەن مەكتەپ ەكى جاقتاپ ىقپال جاساۋ جايىندا اتا-انالار قاۋىمداستىعىنىڭ ءتورايىمى گۇلنار وماروۆا مەن جامبىل جاباەۆ اتىنداعى №4 مەكتەپ-گيمنازياسىنىڭ ديرەكتورى بازارگۇل ساعىندىققىزى ءوز ويلارىن ورتاعا سالدى. باسقا دا ازاماتتار تاربيەسىز ءبىلىمنىڭ تۇل ەكەندىگىن ءسوز ەتتى.
سونداي-اق, جيىن بارىسىندا وقۋشىلاردىڭ ءوز قولدارىمەن جاساعان بۇيىمدارىنان كورمە ءوتىپ, بالالاردىڭ ءبىلىم سايىستارىندا قول جەتكىزگەن جەتىستىكتەرى جۇرتشىلىققا كورسەتىلدى. ونەرپاز ورەندەر اۋەلەتىپ ءان سالىپ, كۇمبىرلەتىپ كۇي توكتى.
جاپونيا ەلشىلىگىنىڭ مامانى كۋماري حارۋسي وزات وقۋشىلاردى كۇنشىعىس ەلىندە ءبىلىم الۋعا شاقىرسا, بولگاريا ەلشىلىگىنىڭ وكىلى جەتكىنشەكتەردىڭ ءۇش تىلدە ەركىن سويلەگەنى مەن ونەرىنە ريزاشىلىعىن ءبىلدىردى.
فورۋم سوڭىندا اتا-انالار قاۋىمداستىعى ۇندەۋ قابىلدادى. وندا جاس ۇرپاقتى ۇلتتىق قۇندىلىقتارمەن تاربيەلەۋ ءۇشىن «وتباسى جانە مەكتەپ» اكادەمياسىن قۇرۋ, قايسارلىق پەن ەرمىنەزدى, رۋحتى اكەلەردى دارىپتەۋ ماقساتىندا «ءجۇز ونەگەلى اكە» جوباسىن جاساۋ, سان عاسىرلىق مۇراعا باي ۇلتتىق ونەرىمىزدى باستاۋىش سىنىپتان باستاپ وقىتۋ سەكىلدى جاڭاشىل يدەيالار كوتەرىلدى.