شىعارماشىلىقتى شىڭداعان «شاتتىق»
كونگرەسس-حولل سارايىندا بالالار مەن جاسوسپىرىمدەر اراسىنداعى «شاتتىق-2016» شىعارماشىلىق فەستيۆالىنىڭ گالا-كونتسەرتى ءوتتى. ونىنشى مارتە وتكىزىلگەن شارا بيىل قازاقستان تاۋەلسىزدىگىنىڭ 25 جىلدىعىنا ارنالدى.
بايقاۋ دەلفي ويىندارىنىڭ باعدارلاماسى بويىنشا وتەتىنى بەلگىلى. ال ول دەگەنىمىز – فەستيۆال حالىقتىق جانە كلاسسيكالىق جانردان باستاپ, زاماناۋي جانرعا دەيىن ونەردىڭ سان الۋان سالالارىن قامتيدى. كونكۋرس 8 جانر نەگىزىندە 15 نوميناتسيا بويىنشا ۇيىمداستىرىلدى. ولار – جەكە جانە انسامبلدىك اسپاپتا ورىنداۋ, كلاسسيكا, حالىق اسپاپتارى, حور, ەسترادالىق ءان, ۆوكالدىق انسامبل, حالىق ءانى, حالىق ءبيى, قازىرگى بي, پوەزيا, تەاتر, فوتوسۋرەت, بەينەلەۋ, سونى جانر جانە كيىم ديزاينى. سوڭعى ەكەۋى باعدارلاماعا العاش رەت ەنگىزىلدى. بۇل تۋرالى م.وتەمىسۇلى اتىنداعى وقۋشىلار سارايىنىڭ ديرەكتورى ۆاديم موتورين مالىمدەدى. ونىڭ ايتۋىنشا, بيىلعى «شاتتىق» وسى جانە باسقا دا وزگەرىستەرىمەن ەرەكشە. «جەڭىمپازدارعا ءداستۇرلى مەدالداردىڭ ورنىنا مەرەيتويلىق مۇسىندەر بەرىلمەك. «سونى جانر» نوميناتسياسىندا پاركۋرشىلار, اكروباتتار, گيمناستتار ءوز ونەرىن كورسەتۋگە دايىن. ال «كيىم ديزاينىندا» ءسان الەمىنىڭ سىرىنا قانىق تالاپكەرلەر باسەكەگە تۇسەدى. جاڭا نوميناتسيالار بويىنشا جيىرما بەستەن استام ءوتىنىش قابىلداندى» دەدى ول.
سالتاناتتى ماراپاتتاۋ ءراسىمىن اشقان استانا قالاسى اكىمىنىڭ ورىنباسارى ەرمەك امانشاەۆ العاشقى «شاتتىق» بايقاۋىنان العان اسەرىن ەسىنە الدى.
– وسىدان ون جىل بۇرىن فەستيۆال تۇڭعىش رەت ۇيىمداستىرىلدى. ون جىلدىڭ ىشىندە قالامىزدىڭ قانشاما جاس ونەرپازدارى فەستيۆالگە قاتىسىپ, ۇلكەن ونەر جولىنا جولداما الدى. اعايىندى جۇگىنىسوۆتەر سول كەزدە ساحنا تورىنە شىعىپ, بارلىعىمىزدى ەرەكشە تاڭعالدىرعان بولاتىن. قازىرگى تاڭدا ولاردىڭ قازاق ەستراداسىندا وزىندىك ورنى بار. مەنىڭشە, «شاتتىق» ءالى دە كوپتەگەن جۇلدىزدىڭ باعىن جاندىرادى. فەستيۆال ەرەكشە قۇبىلىسقا اينالدى. ەلوردانىڭ ءبىلىم بەرۋ سالاسىنا دا, مادەنيەت سالاسىنا دا ەلەۋلى وزگەرىستەر الىپ كەلدى, – دەدى.
وتكەن جىلدارداعى بايقاۋ جەڭىمپازى قالا اكىمىنىڭ ورىنباسارىنا فەستيۆالدىڭ دامۋىنا قوسقان ەلەۋلى ۇلەسى ءۇشىن «شاتتىق-10 جىل» مەرەيتويلىق قۇرمەت مەدالىن تابىستادى.
جاس دارىندار, شىنىمەن دە, كورەرمەنگە شاتتىق سىيلادى. ساحنا تورىندە ءان شىرقالىپ, قىزدار مىڭ بۇرىلا بي بيلەدى. №37, №64 مەكتەپتىڭ دومبىراشىلار ءانسامبلى كورەرمەندى كۇمبىرلەگەن كۇيگە بولەدى. «زەردە» مەكتەبىنىڭ ءانشىسى اقكەربەز تىلەۋبەكوۆا ۆوكالدىق قابىلەتىمەن ەرەكشەلەنسە, №68 جانە №37 مەكتەپ وقۋشىلارى راۋان ادەتحان مەن ءامينا راحيموۆا اسپاپتىق انسامبل قۇردى. كونتسەرت بارىسىندا №32 مەكتەپ شاكىرتى ميراس سارتمانوۆ فلەيتانى سىزىلتا تارتسا, №60 مەكتەپ وقۋشىسى ءجاميلا تىلەۋقۇل پيانينونىڭ قۇلاعىندا وينادى. تالىمگەرلەر اراسىندا «استانا وپەرانىڭ» بولاشاق جۇلدىزدارى بار بولىپ شىقتى. №50 مەكتەپتە وقيتىن نۇرعيسا ءابدىمومىن №30 مەكتەپ-گيمنازياسىنىڭ حور ۇجىمىمەن ءوز پارتياسىن ءساتتى ورىنداپ شىقتى. ولارمەن بىرگە №3 مەكتەپ-گيمنازياسىنىڭ حورەوگرافيالىق ۇجىمى ونەر كورسەتتى. جەڭىمپازدار تىزىمىنەن اتالعان بالالاردىڭ ەسىمىن كەزدەستىرۋگە بولادى.
كونكۋرسقا 5000-نان استام ۇمىتكەر قاتىستى. ولاردىڭ 200-دەن استامى كۇمىس جانە قولا مۇسىندەرمەن ماراپاتتالدى. ال 33 جۇلدەگەرگە التىن ءمۇسىندەر تابىستالدى. «سونى جانرى» بويىنشا №77 مەكتەپ-گيمنازياسىنىڭ كلوۋندار تەاترى جانە №14 ورتا مەكتەپ وقۋشىسى شەرجون راشيتوۆتىڭ ونەرى جوعارى باعالاندى. ايرىقشا كيىم ديزاينىمەن مەنەدجمەنت جانە بيزنەس كوللەدجىنىڭ ستۋدەنتى نازەركە تايشىباەۆا ەرەكشەلەندى, سونداي-اق, №54 مەكتەپ-گيمنازياسىنىڭ شاكىرتى دانا ساريەۆا مامانداردىڭ جوعارى باعاسىن الدى. №56 مەكتەپ-ليتسەيىنىڭ تالىمگەرى ارۋجان دارحانباەۆا مەن №4 مەكتەپ-گيمنازياسىندا وقيتىن ازات بالتاشتىڭ سۋرەتتەرى فوتوونەرىنە قويىلاتىن تالاپتارعا ساي بولىپ تانىلدى. №71 مەن №63 مەكتەپ-ليتسەيلەرىنىڭ وقۋشىلارى ءاليا ايتجانوۆا مەن لاۋرا قارامىسوۆا بەينەلەۋ ونەرىمەن تامساندىردى. №54 مەكتەپ-گيمنازياسىنىڭ قويىلىمى ءساتتى شىعىپ, №48 مەكتەپ-ليتسەيدىڭ وقۋشىسى بولات يبراەۆتىڭ اكتەرلىك شەبەرلىگى ۇزدىك اتاندى.
گۇلدانا تالعاتقىزى,
astana-akshamy.kz