قالىڭ جۇرت ەلىمىزگە شەتەلدەن اعىلىپ كەلگەن مەيمانداردىڭ ىشىندە ونەر جۇلدىزدارىن اسىعا كۇتەتىنى راس. ولار ءان-ءبيى مەن عاجاپ شوۋىمەن قوسا, رۋحاني ازىق بولاتىن دۇنيەلەرىن ارقالاپ كەلەدى. كورەرمەن الەمگە ايگىلى ديۋ سولەيدىڭ «Reflekt» قويىلىمىن تاماشالاپ, ەجەلگى مىسىردىڭ ەسكەرتكىشتەرىن ءوز كوزىمەن كورىپ, الەمدەگى ەڭ ۇلكەن مۇراجاي – ەرميتاجدى ارالايدى. ەكسپو كورمەسى اياسىندا «La Scala» تەاترى «استانا وپەرا» ساحناسىندا ونەر كورسەتىپ, وپەرا كورولى پلاسيدو دومينگو «تراۆياتا» وپەراسىندا شىرقايدى.
مونرەالدان باستاۋ العان ديۋ سولەي تسيركى ەلوردادا 16 ماۋسىمنان باستاپ 9 قىركۇيەككە دەيىن بولادى. ءۇش ايدىڭ ىشىندە اكروباتتار 75 مينۋتتىق شوۋدى 71 رەت قويىپ شىعادى. «Reflekt» شوۋى قازاقتىڭ كوشپەلى تۇرمىس-سالتىن كوپشىلىككە تانىستىرادى. سول سەبەپتى تسيرك ارتىستەرىنىڭ كيىمى قازاقيلانىپ, قويىلىمنىڭ مۋزىكاسى وڭدەلدى, قۇلاق تۇرسەڭىزدەر, دومبىرا ءۇنىن ەستۋگە دە بولادى.
قر ۇلتتىق مۋزەيىنە قويىلاتىن ەجەلگى مىسىر ەسكەرتكىشتەرىن كورسەڭىز, تاريحقا تەرەڭ ۇڭىلەسىز. 23 ماۋسىم مەن 3 تامىز ارالىعىندا ەلوردالىقتار جانە قالا قوناقتارى مىسىر پەرعاۋىنى تۋتانحامون مولاسىنان تابىلعان مۇرالاردى كورە الادى. ال قارۋ-جاراققا قىزىعۋشىلىق تانىتاتىندار ەرميتاج مۇراجايى وتكىزەتىن كورمەگە اسىعىڭىزدار. وندا شىعىس پەن باتىستىڭ 70-كە جۋىق قارۋ ۇلگىسى ۇسىنىلادى. كورمە 3 شىلدەدە باستالىپ, 10 قىركۇيەككە دەيىن جالعاسادى. 
ال وپەرا سۇيەر قاۋىمعا ەرەكشە سىي ازىرلەنىپ وتىر. «استانا وپەرا» تەاترىنا اتاعى جەر جاراتىن ميلاندىق «La Scala» تەاترى گاسترولدىك ساپارمەن كەلەدى. ەكسپو كورمەسىنىڭ جابىلۋ راسىمىندە, ناقتىراق ايتساق, 1 قىركۇيەك پەن 10 قىركۇيەك ارالىعىندا تەاتردىڭ 250-گە جۋىق ءارتىسى ونەر كورسەتەدى. تەنور داۋىستى دومينگو 24-29 شىلدە كۇندەرى حالىقارالىق «وپەراليا» بايقاۋىنا جەتەكشىلىك ەتەدى. سونداي-اق, «تراۆياتا» وپەراسىندا ءان شىرقايدى. ماەسترو قازاقستاندىق وپەرا ءانشىسى ماريا مۋدرياكپەن بىرگە پارتيا ورىندايدى دەپ كۇتىلۋدە. بۇدان باسقا, شىلدەدە رەسەيدەگى مارينا تەاترى ۇجىممەن ەلورداعا تابان تىرەيدى.
كورمە اياسىندا جاستارعا ارناپ تالاي دۋماندى كەشتەردى وتكىزۋ جوسپارلانىپ قويىلدى. «30 seconds to Mars» امەريكالىق روك-توبىنىڭ كونتسەرتى «استانا ارەنادا» 2 شىلدەدە وتەدى. اتى اڭىزعا اينالعان Limp Bizkit روك-توبى «سارىارقا» ۆەلوترەگىندە 12 تامىزدا تىڭداۋشىلارىن كۇتەدى. رەسەي رەپەرى تيماتي باستاعان Black star party «سارىارقا» ۆەلوترەگىندە 8 شىلدەدە ونەر كورسەتەدى. «ا-ستۋديو» توبىنىڭ كونتسەرتى 14-19 تامىزدا ميۋزيكل رەتىندە كونگرەسس-ورتالىقتا وتەدى. ال ەروس راماززوتتي شىعارماشىلىعىنا عاشىق جاندار ءۇشىن 19 تامىزدا «سارىارقا» ۆەلوترەگىندە جاندى داۋىستا ءان شىرقايدى.
گۇلدانا تالعاتقىزى
