ونەرپازداردىڭ وسالى جوق
كەشە «استانا وپەرا» تەاترىندا «ەكسپو-2017» حالىقارالىق مامانداندىرىلعان كورمەسى اياسىندا «وپەراليا» حالىقارالىق بايقاۋىنىڭ شىمىلدىعى ءتۇرىلدى.
بايقاۋ باستالماس بۇرىن جۋرناليستەرگە ارنالعان ءباسپاسوز ءماسليحاتى ءوتتى. وعان قر مادەنيەت جانە سپورت ءمينيسترى ارىستانبەك مۇحامەديۇلى مەن ايگىلى وپەرا ءانشىسى ءارى ديريجەر پلاسيدو دومينگو قاتىستى.
وپەرا – بولمىسى بەكزات ونەر. وسىنداي كلاسسيكالىق ونەردىڭ بيىك شىڭى سانالعان ايتۋلى شارانى پلاسيدو دومينگو ءوز قولىمەن قالاعان. بيىل «وپەراليانىڭ» جيىرما بەسىنشى ماۋسىمى ەكەن. مەرەيلى داتانىڭ قازاق جەرىندە ءوتۋى دە قۋانىش. بايقاۋعا دۇنيەجۇزىنىڭ 17 ەلىنەن كەلگەن 40 دارىندى جاس قاتىسادى. ولاردىڭ اراسىندا «استانا وپەرا» تەاترىنىڭ ءسوليسى, كوپتەگەن كونكۋرستاردىڭ لاۋرەاتى ماريا
مۋدرياكپەن بىرگە وتاندىق ءتورت ءارتىس باق سىنايدى. ماڭىزدى مادەني شارانىڭ قۇرمەتتى قوناعى رەتىندە بۇلبۇل داۋىستى ءانشى بيبىگۇل تولەگەنوۆا شاقىرىلعان.
– ماەسترو دومينگو باسقارعان كونكۋرستىڭ ەلوردادا بايراعى جەلبىرەدى. بۇل – ۇلكەن قۇرمەت! بايقاۋدا باق سىنايتىن ونەرپازداردىڭ وسالى جوق. ءبارىنىڭ دە دەڭگەيى جوعارى. تالاي ورتادا توپ جارىپ جۇرگەن دۇلدۇلدەر. ارينە, اتى الەمگە جايىلعان بايگەدەن وزىپ كەلۋ دە وڭاي ەمەس. سوندىقتان كونكۋرس بىزگە وپەرا الەمىندەگى جاڭا ەسىمدەردى تانىستىرادى دەپ ەلەڭدەپ وتىرمىز. بۇعان دەيىن مۇنداي شارا ۆاشينگتون, مادريد, توكيو سەكىلدى شاھارلاردا بولعان. الدىمەن, ەلىمىزگە قوناق بولىپ كەلگەن پلاسيدو دومينگو مىرزاعا العىسىمدى ايتامىن, – دەگەن ارىستانبەك مۇحامەديۇلى اتالعان بايقاۋدىڭ باس دەمەۋشىسى «Rolex» كومپانياسىنا ريزاشىلىعىن ءبىلدىردى.
ودان كەيىن الىستان ات ارىتىپ كەلگەن سىيلى قوناق پلاسيدو دومينگو ءسوز الىپ, قازاق ەلىنىڭ قوناقجايلىلىق قاسيەتىنە العىسىن ايتىپ, بايقاۋدىڭ ماڭىزىنا توقتالدى. «وپەراليا» بايقاۋىنا كەز كەلگەن داۋىستاعى 18 بەن 32 جاس ارالىعىنداعى انشىلەر قاتىسا الادى. جالپى جۇلدە قورى 180 000 اقش دوللارىن قۇرايدى. ەرلەر مەن ايەلدەر داۋىسى اراسىنداعى 1, 2 جانە 3 دارەجەلى جۇلدەگەرلەردى ماراپاتتاۋمەن بىرگە ر.ۆاگنەردىڭ جانە ر.شتراۋستىڭ وپەرالارىن ۇزدىك ورىنداعانى ءۇشىن ب.نيلسون اتىنداعى سىيلىق جانە پەپيتا ەمبيل دە دومينگو جانە ۇلكەن پلاسيدو دومينگو سىيلىعى تابىس ەتىلەدى. قازىلار القاسىنا پلاسيدو دومينگونىڭ ءوزى توراعالىق جاسايدى. ونىڭ قۇرامىنا شارتاراپتاعى جەتەكشى تەاترلاردىڭ وكىلدەرى ەنگەن.
كەشە باستالعان بايقاۋ 29 ءشىلدەگە دەيىن جالعاسادى. وسى ارالىقتا قاتىسۋشىلار الەمدىك وپەرا كلاسسيكاسىنان وزدەرى تاڭداپ العان اريالاردى جۇرتشىلىققا ۇسىنادى. اقتىق باسەكەدە ون ۇمىتكەر ماەسترو دومينگو جەتەكشىلىك ەتەتىن «استانا وپەرا» سيمفونيالىق وركەسترىمەن ونەر كورسەتەدى. قىسقاسى, استانا تورىندە سالتانات قۇرعان الەمدىك وپەرا ونەرى بايقاۋىنان قۇر قالماڭىز, اعايىن!
ازامات
ەسەنجول