ونەرتاپقىشتار مەكتەبى
ۇلتتىق زياتكەرلىك مەنشىك ينستيتۋتىندا «جاس ونەرتاپقىش مەكتەبى» اتتى كەزەكتى وقىتۋ سەمينارى ءوتتى.
شارانىڭ ماقساتى – قازاقستاننىڭ باسەكەگە قابىلەتتى ازاماتتارىن تاربيەلەۋ, ونەرتاپقىشتىق ەڭبەك ناتيجەلەرىن ءتيىمدى پايدالانۋ نەگىزىندە شيكىزاتتىق ەكونوميكادان جوعارى تەحنولوگيالىق ەكونوميكاعا كوشۋ. وسكەلەڭ ۇرپاق ءۇشىن «جاس ونەرتاپقىش مەكتەبى» وقىتۋ سەمينارلارىنىڭ سەرياسىن 2020 جىلى باستاعان ەدى.
ەلوردانىڭ جاس زەرتتەۋشىلەرى زياتكەرلىك مەنشىك نەگىزدەرى بويىنشا كىرىسپە دارىستەردى قىزىعۋشىلىقپەن تىڭدادى, ونەرتاپقىشتىق نەگىزدەرى بويىنشا تانىمدىق ترەنينگتەرگە, ۆيكتورينالار مەن ينتەراكتيۆتى ويىندارعا قاتىستى, سونداي-اق پاتەنتتەۋدە تاجىريبەسى بار جاس ونەرتاپقىشتارمەن كەزدەسىپ, جوعارى سىنىپ وقۋشىلارىنا ارنالعان رەسپۋبليكالىق جارىستار وتكىزىلەتىنى تۋرالى اقپارات الدى. بۇل زياتكەرلىك ءىس-شاراعا جاراتىلىستانۋ-ماتەماتيكا باعىتىنداعى رەسپۋبليكالىق عىلىمي جوبالار كونكۋرسى قالالىق كەزەڭىنىڭ جەڭىمپازدارى مەن جۇلدەگەرلەرى اتانعان نۇر-سۇلتان قالاسىنىڭ 140 وقۋشىسى قاتىستى. شارا سوڭىندا قاتىسۋشىلارعا سەرتيفيكات تابىستالىپ, بەلسەندىلىك تانىتقان وقۋشىلار ەستەلىك سىيلىقپەن ماراپاتتالدى.
ايتا كەتۋ كەرەك, جاقىندا دارىندى جاسوسپىرىمدەرگە ارنالعان «ءبىلىم-يننوۆاتسيا» ليتسەيىنىڭ 10-سىنىپ وقۋشىسى دىنمۇحاممەد ومار IJSO بەدەلدى حالىقارالىق وليمپياداسىندا ءساتتى ونەر كورسەتىپ, قولا مەدال جەڭىپ الدى.