ەلوردادا «قامقورلىق» ەرتە وڭالتۋ-ارالاسۋ ورتالىعى اشىلدى. ورتالىق 3 ايدان 3 جاسقا دەيىنگى دامۋىندا اۋىتقۋى بار نەمەسە پايدا بولۋ قاۋپى بار بالالارعا العاشقى دامۋ كەزەڭىندە كەشەندى كومەك كورسەتەدى. اتاپ ايتقاندا, مۇندا ءارتۇرلى نەۆرولوگيالىق دياگنوزى بار بالالار قابىلدانادى. ورتالىقتىڭ اشىلۋىنا تۇڭعىش پرەزيدەنت قورى, «سامۇرىق-قازىنا» ۇاق» اق, قالالىق اكىمدىك وكىلدەرى قولداۋ كورسەتتى.
– ەلىمىزدە ارقاشان بالا قۇقىعىن قامتاماسىز ەتۋگە, دەنساۋلىعىن ساقتاۋ مەن الەۋمەتتىك قورعاۋعا كوپ كوڭىل بولىنگەن. مۇنداي ورتالىقتار ءبىزدىڭ بالالارىمىزعا نەۆرولوگيالىق اۋرۋلاردى ەمدەۋگە كومەكتەسەدى, وڭالتۋ جانە قالپىنا كەلتىرۋ پروتسەسىن جەدەلدەتەدى. بۇل جەردە ايىنا 50-گە جۋىق بالانى قابىلداۋ جوسپارلانىپ وتىر. قازىر ارنايى باعدارلامالار جاسالدى. تاجىريبەلى مامانداردان تۇراتىن ۇجىم بالانىڭ ەرەكشەلىگىن ەسكەرە وتىرىپ, كەشەندى وڭالتۋ ءۇشىن بارلىق جاعدايدى جاسايتىن بولادى. ارقايسىسىنا جەكە كۇتىم كورسەتىلەدى, – دەپ اتاپ ءوتتى قالالىق قوعامدىق دەنساۋلىق ساقتاۋ باسقارماسىنىڭ باسشىسى تيمۋر مۇراتوۆ.
بالالاردى نەۆرولوگ, رەابيليتولوگ, ەدش كابينەتىنىڭ دارىگەرى, پەدياتر, ورتوپەد, سۋردولوگ مامانداردان قۇرالعان ارنايى مۋلتيديستسيپلينارلىق ۇجىم باقىلايدى. سونىمەن قاتار پەداگوگيكالىق قۇرام, دەفەكتولوگ, لوگوپەد, ەرگوتەراپەۆت, پسيحولوگ, ەدش نۇسقاۋشىلارى قىزمەت كورسەتەدى. ورتالىققا سوڭعى ۇلگىدەگى زاماناۋي قۇرال-جابدىقتار ساتىپ الىنعان.
بايان اسىلبەكوۆا
