«ۇلىتاۋ» اللەياسى
قاراعاندى وبلىسى «قازاق ەلىنە مىڭ العىس» اتتى 14 مەترلىك ەسكەرتكىش پەن «ۇلىتاۋ» اللەياسىن حالىق يگىلىگىنە بەردى. مونۋمەنتتە قازاقپەن بىرگە وزگە ۇلت وكىلدەرىن باۋىرىنا باسقان انا ءمۇسىنى بەينەلەنگەن. ەسكەرتكىش رەپرەسسيا جىلدارىنداعى حالقىمىزدىڭ دارحاندىعىن بىلدىرەدى. ودان باسقا, اللەياعا التىن شوقى ءدوڭىنىڭ باسىنان تابىلعان ءامىر تەمىردىڭ جازۋى باسىلعان تاستىڭ كوشىرمەسى قويىلعان. تەرەكتى اۋليە مەن بايقوڭىردىڭ پەتروگليفتەرىن دە وسى جەردەن كورە الاسىزدار.
«جەتىسۋ» ساياباعى
استانالىقتاردىڭ سۇيىكتى دەمالىس ورنىنا اينالعان «اراي» ساياباعىن الماتى وبلىسى جاڭعىرتىپ, جاڭارتىپ «جەتىسۋ» دەگەن اتاۋمەن قايتا سىيلادى. 15 گەكتار جەردى الىپ جاتقان ساياباقتا ويىن الاڭى, تاماقتانۋ ايماعى, كولىك تۇراعى, ۇزىندىعى 1,5 شاقىرىم بولاتىن ۆەلوسيپەدشىلەرگە ارنالعان اينالما جانە جۇگىرۋ جولدارى بار. تۇنگى كورىنىسى تىپتەن تاماشا: 380 ارنايى شام ساياباقتى ساۋلەگە بولەپ, سامالاداي جارقىراتادى. بۇل ساياباقتا ورناتىلعان «اپورت» الاڭى, «تامعالى تاس» ءمۇسىنى جانە «شارىن شاتقالىنىڭ» ۇلگىسى سول ءوڭىردىڭ ءبىر بولشەگى ىسپەتتەس.
«اتىراۋ» كوپىرى
ەسىل وزەنى ارقىلى وتەتىن «اتىراۋ» كوپىرى كوپشىلىكتىڭ كوزايىمىنا اينالىپ ۇلگەردى. جاياۋ جۇرگىنشىلەر مەن قوس دوڭگەلەكتى كولىك يەلەرىنە ارنالعان كوپىر سامال اۋدانى مەن امفيتەاتردى بايلانىستىرادى. ۆەلوجۇرگىنشىلەرگە ارنالعان جولدىڭ جالپى ۇزىندىعى 56 شاقىرىمدى قۇرايدى. الىپ اسپالى كوپىردىڭ ۇزىندىعى – 313,5 مەتر, ەنى – 10,5 مەتر, ال سالماعى – 2500 توننا. كوپىر ءپىشىنى جاعىنان ءبىر-ءبىرىن قايتالامايتىن 2450 جاپىراقپەن كومكەرىلگەن. نىساننىڭ جوباسىن استانانىڭ ۋربانيستيكا ورتالىعى ازىرلەگەن.
عارىش مۋزەيى
قىزىلوردا وبلىسى ەلورداعا سىيلىق رەتىندە اشىق اسپان استىنداعى عارىش مۋزەيى – راكەتا-عارىش تەحنيكاسى ەكسپوزيتسياسىن تابىس ەتتى. «قازعارىشساپارى» اق ۇلتتىق عارىش ورتالىعىنىڭ اۋماعىندا ورنالاسقان عارىش ايلاعى 1,4 گەكتار جەردى الىپ جاتىر. زىمىران-عارىش تەحنيكاسى مۋزەيىنىڭ اشىق ەكسپوزيتسياسىندا «سويۋز», «پروتون», «زەنيت» زىمىران تاسىعىشتارىنىڭ ماكەتتەرى, «بوران» وربيتا كەمەسىنىڭ ۇلگىسى قويىلعان.
الىپ سۋبۇرقاق
شىعىس قازاقستان وبلىسى مۋزىكالىق سۋبۇرقاقتى سىيعا تارتتى. ول جاڭادان بوي كوتەرگەن بوتانيكالىق باقتا ورناتىلدى. ءبىر ەرەكشەلىگى, فونتان ءتۇرلى تۇسكە بويالىپ, اۋەنگە مىڭ بۇرالا بيلەيدى. 72 مەترلىك دوڭگەلەككە جايعاسقان سۋبۇرقاقتىڭ ءدال ورتاسىندا تايقازان قويىلعان. ونىڭ بيىكتىگى – 6,5 مەتر, ال اۋماعى – 8 مەتردەي. سۋ وسى قازاننىڭ ىشىنەن قايناپ شىعىپ جاتقانداي اسەر قالدىرادى.
ەكسپو قالاشىعىنا جاقىن ورنالاسقان ساياباقتا ۆەلوسيپەدشىلەرگە جانە جۇگىرۋگە ارنالعان جولدار بار.
«الماتى» بالاباقشاسى
سول جاعالاۋدا 240 ورىنعا شاقتالعان «Almaty» balabaqshasy اشىلدى. ءبىر قىزىعى, بالاباقشانى 12 توپقا ءبولىپ, ءار توپتىڭ اتاۋىن الماتى قالاسىمەن بايلانىستىرعان. ماسەلەن, «الاتاۋ», «مەدەۋ» مۇز ايدىنى, «شىمبۇلاق» زاماناۋي تاۋ-شاڭعى شيپاجايى, اتاقتى «الما-اراسان», تۋريستەرگە تارتىمدى «تاۋ سامالى», اتى اڭىزعا اينالعان «ۇشقوڭىر», بارشاعا تانىمال «المالى», تاريحي ورتالىق – «جەتىسۋ», الماتى سيمۆولى – «اپورت», جۇمباققا تولى «التىن ادام» تاقىرىپتىق توپتارى اشىلعان.
«اقجايىق» تىنىمباعى
باس قالانىڭ كوركى باتىس قازاقستان وبلىسى سالعان «اقجايىق» تىنىمباعىمەن تولىقتى.
ول جەڭىس–بوگەنباي باتىر داڭعىلدارىنىڭ قيىلىسىندا سالىندى. جاڭا ساياباقتىڭ باستى نىسانى – قازاقتىڭ باتىر قىزى مانشۇك مامەتوۆانىڭ ەسكەرتكىشى. «اقجايىق»
تىنىمباعىندا امفيتەاتر, سۋبۇرقاق, «سيقىرلى لابيرينت» ينستاللياتسياسى, تاقىرىپتىق
الاڭدار, سونداي-اق باسكەتبول جانە جۇگىرۋ الاڭدارى بار.
دوستىق ءۇيى
مۇنايلى ولكە – ماڭعىستاۋ اسسامبلەيا وكىلدەرىنە ارناپ جاڭا عيمارات سالىپ بەردى. ناقتىراق ايتقاندا, باۋىرجان مومىشۇلى كوشەسى بويىندا ورنالاسقان عيمارات «دوستىق ۇيىنە» اينالىپ, قايتا جاڭعىردى. ۇشقاباتتى عيماراتتىڭ جالپى اۋماعى – 4900 شارشى مەتر. ءبىرىنشى قاباتتا – بي زالى, اسحانا, ستۋديا, ەكىنشى جانە ءۇشىنشى قاباتتاردا اكت زالى, كىتاپحانا, كيىم بولمەسى, مۇراجاي, سونداي-اق كونفەرەنتس-زال ورنالاسقان.
