تۇركىستان دەگەن جاڭا وبلىستى قۇرعان ەلباسىنىڭ تاريحي شەشىمىنە ءدان ريزامىن. بىراق… ەلىمىزدىڭ كارتاسىنان «وڭتۇستىك» دەگەن اتاۋ, ۇعىم ءتۇسىپ قالدى. بىزدە سولتۇستىك قازاقستان, باتىس قازاقستان جانە شىعىس قازاقستان وبلىسى دەگەن بار. وڭتۇستىك قازاقستان وبلىسى جوق!
ادىلدىككە جۇگىنسەك, گەوگرافيالىق شارتتىلىقتان باس تارتىپ, سولتۇستىك قازاقستان وبلىسىن دا قىزىلجار وبلىسى دەپ وزگەرتەيىك. اقىرى قالاعا بەرە الماعان اتاۋدى, وبلىسقا بەرەيىك. ويتكەنى جەردىڭ اتاۋى – قىزىلجار. م.قوزىباەۆ اتىنداعى سولتۇستىك قازاقستان مەملەكەتتىك ۋنيۆەرسيتەتىنىڭ پروفەسسورى زارقىن تايشىباي: «قىزىلجاردىڭ قىزىلجار بولاتىن ءجونى بار. ءتىپتى, رەسەيدىڭ ارحيۆتەرىن قاراپ وتىرساڭىز, «اۋليە پەتر», «پەتر اعزام» بەكىنىسى دەپ, ودان كەيىن «پەتر پاۆل» بەكىنىسى دەپ ورىسشا ايتقان كۇننىڭ وزىندە جەردىڭ اتى – قىزىلجار دەگەن سوزدەر بار» دەيدى. قازاقتىڭ ساناسىن وتارسىزداندىرۋعا زور ىقپال ەتەتىن قىزىلجار دەگەن اتاۋدى وبلىسقا بەرۋدىڭ وڭتايى كەلىپ-اق تۇر.
باتىس قازاقستان وبلىسىن «بوكەي ورداسى وبلىسى», «اقجايىق وبلىسى» دەپ وزگەرتەيىك دەگەن دە ۇسىنىستار ايتىلىپ ءجۇر. وسى وڭىردە اقجايىق دەگەن اۋدان بار. مەنىڭ ۇسىنىسىم مىناداي: شىعىس قازاقستاندى الاشوردا وبلىسى, سەمەيدى الاش قالاسى دەپ اتايىق! ازاتتىعىمىزدىڭ باستاۋىندا الاش تۇر. الاش قايراتكەرلەرى بۇگىنگى تاۋەلسىزدىگىمىزدىڭ جولىندا ايانباي كۇرەستى, قۇربان بولدى. ءوز ۇلتىنا قىزمەت ەتەمىن دەگەن ءار قازاق بالاسى الاشتىڭ مۇراتىن جان-جۇرەگىمەن ءتۇسىنىپ, ساناسىنا ءسىڭىرىپ ءوسۋى ءتيىس. سوندا الاش مۇراتى مەن تاۋەلسىزدىك تالابى تەرەڭ ۇيلەسىم تابادى. ەگەر دە تۇركىستاننان كەيىن, ەلىمىزدىڭ كارتاسىندا قىزىلجار, الاشوردا دەگەن جاڭا وبلىستار, الاش دەگەن قالا پايدا بولسا, رۋحاني جاڭعىرۋدىڭ, سانامىزدى تازارتۋدىڭ كەرەمەت كورىنىسىنە اينالار ەدى.
تولەن تىلەۋباي
