9 قىركۇيەكتە «استانا وپەرا» تەاترى ءوزىنىڭ مەرەيتويلىق ونىنشى تەاتر ماۋسىمىن الەمدىك وپەرا ساحناسىنىڭ جۇلدىزى, «گرەممي» سىيلىعىنىڭ لاۋرەاتى, سوپرانو سۋمي چونىڭ (كورەيا) قاتىسۋىمەن وتەتىن كونتسەرتپەن اشادى. كەش كورەيا رەسپۋبليكاسى مەن قازاقستان رەسپۋبليكاسى اراسىنداعى ديپلوماتيالىق قاتىناستاردىڭ 30 جىلدىعى مەن مادەني الماسۋ جىلى قۇرمەتىنە وراي قازاقستان رەسپۋبليكاسىنداعى كورەيا رەسپۋبليكاسى ەلشىلىگىنىڭ كورەي مادەني ورتالىعى قولداۋىمەن ۇيىمداستىرىلۋدا.
سۋمي چو – ءوز زامانداستارىنىڭ اراسىنداعى ەڭ سۇرانىسقا يە سوپرانولاردىڭ ءبىرى. جازبالارى مەن كۇيتاباقتارى ەڭ كوپ ساتىلاتىن الەمدەگى كلاسسيكالىق ءانشى, ونىڭ قورجىنىندا 50-دەن استام جازبا بار. اتاپ ايتقاندا, «گرەممي» سىيلىعىن يەلەنگەن «كولەڭكەسىز ايەل», Deutsche Grammophon ءۇشىن «بال-ماسكاراد» جانە 2019 جىلعى قاراشادا Platinum Award جۇلدەسىمەن ماراپاتتالعان سوڭعى «Mother» (Universal Records) ديسكىسى.
ءانشىنىڭ قورجىنىندا ەڭ سۇرانىسقا يە وپەرالىق پارتيالار بار: «ريگولەتتوداعى» دجيلدا, «گوفمان ەرتەگىلەرىندەگى» وليمپيا, «سەۆيل شاشتارازىنداعى» روزينا, «ليۋچيا دي لاممەرمۋرداعى» باستى پارتيا جانە ت.ب.
نيۋ-يوركتەگى مەتروپوليتەن-وپەرا, ميلاندىق لا سكالا تەاترى, كوۆەنت-گاردەن كورولدىك وپەرا, ۆەنا مەملەكەتتىك وپەرا, بۋەنوس-ايرەستەگى كولون تەاترى سىندى ايگىلى وپەرا ساحنالارىندا ونەر كورسەتتى. ساحنا تورىندەگى سەرىكتەرى پلاسيدو دومينگو, دميتري حۆوروستوۆسكي, اننا نەترەبكو, ەلينا گارانچا, اندجەلا گەورگيۋ جانە ت.ب. بولدى.
2021-2022 ماۋسىمدا ءانشى ماسكەۋ, پاريج, تايلاند, سينگاپۋر, گونكونگ, اۆستراليا, كورەيا سىندى ەلدەر مەن قالالاردا گاسترولدىك ساپارمەن حالىقارالىق وپەرا ساحناسىنداعى 35 جىلدىعىن اتاپ ءوتتى.
بەلسەندى مادەني ءارى قوعامدىق قىزمەت اتقارۋدا; كوركەم فيلمدەرگە تۇسكەن, تانىمال ۆوكالدىق حالىقارالىق بايقاۋلاردىڭ قازىلار قۇرامىنا ەنگەن. 2003 جىلى يۋنەسكو «الەم ءارتىسى» بولىپ سايلادى, 2019 جىلى يتاليا جۇلدىزى وردەنىنىڭ كاۆالەرى اتاندى, ەسىمى ازيانىڭ داڭق زالىنا ەندى, «ۇزدىك كورەي مادەني برەندى» جانە «كورەي ءيميدجى» ماراپاتتارىنا لايىق دەپ تانىلدى (2022).
مەرەكەلىك گالا-وپەرا كونتسەرتىنە اتاقتى انشىمەن بىرگە «استانا وپەرا» تەاترىنىڭ جەتەكشى سوليستەرى ونەر كورسەتەدى. سوليستەر قازاقستاننىڭ ەڭبەك سىڭىرگەن قايراتكەرى الان بورىباەۆتىڭ جەتەكشىلىگىندە «استانا وپەرانىڭ» حورى مەن سيمفونيالىق وركەسترىنىڭ سۇيەمەلدەۋىمەن وپەرالىق اريالار مەن دۋەتتەردەن جارقىن باعدارلاما ۇسىنادى.
بايان اسىلبەكوۆا
