جىلداعى ءداستۇر بويىنشا استانا كۇنى قارساڭىندا «وپەراليا» حالىقارالىق فەستيۆالى باستالدى. بيىل ون سەگىزىنشى رەت ۇيىمداستىرىلعان فەستيۆال اياسىندا ءبىر اي بويى الەمدىك مۋزىكانىڭ تانىمال جۇلدىزدارى ەلورداداعى «استانا وپەرا» تەاترىندا ونەر كورسەتەدى.
العاشقى كۇننىڭ اۋقىمى كەڭ, وتە قىزىقتى بولدى – قىزىل كىلەمدەگى تانىمال تۇلعالار, فويەدەگى پەرفورمانس جانە دە زامانىمىزدىڭ اتاقتى حورەوگرافى يرجي كيليان سپەكتاكلدەرىنىڭ جۇلدىزدى شەرۋى ءبىر كۇندە, ءبىر ساحنادا ۇسىنىلدى.
فەستيۆال بيىل «استانا وپەرانىڭ» ونىنشى مەرەيتويلىق ماۋسىمىندا وتكىزىلۋدە. جىل سايىن فەستيۆالدىڭ تاقىرىبى وزگەرىپ, جارقىن, قايتالانباس بوياۋلار قوسىلادى. «وپەراليا-2023» فەستيۆالىنىڭ ەرەكشەلىگى كەڭ اۋقىمدىلىعىندا جاتىر, ول وپەرا, بالەت, سيمفونيالىق جانە كونتسەرتتىك ءتارىزدى ءتۇرلى مۋزىكالىق جانرلاردا ۇسىنىلعان زاماناۋي جانە كلاسسيكالىق ونەردى قامتىپ وتىر. «كۇلشە قىز», «قالقامان-مامىر», «كىشى ءولىم», «ەتىك كيگەن مىسىق» – «استانا وپەرانىڭ» وسى ماۋسىمداعى پرەمەرالارى. تەاتردىڭ باس ديريجەرى – الان بورىباەۆ. بالەتتىڭ جەتەكشى ءسوليسى – ءمادينا ونەرباەۆا.
28 ماۋسىمدا ك.بايسەيىتوۆا اتىنداعى كامەرالىق زالدا پرەزيدەنت وركەسترى حالىق مۋزىكاسى ءانسامبلىنىڭ «سەرپىن» اتتى كونتسەرتى وتەدى. باعدارلامادا قازاقستان كومپوزيتورلارىنىڭ كۇيلەرى مەن اندەرى, سونداي-اق الەمدىك كلاسسيكالىق رەپەرتۋاردان تۋىندىلار ۇسىنىلادى. 29-30 ماۋسىمدا دج.ءروسسينيدىڭ «الجيردەگى يتاليالىق قىز» وپەراسىنىڭ پرەمەراسى وتەدى. بۇل سپەكتاكلدى تەاتردىڭ جانە «استانا وپەرا» اكادەمياسىنىڭ سوليستەرى دايىنداۋدا. ونىڭ قويۋشى-ديريجەرى – ر.بايمۋرزين, قويۋشى-رەجيسسەرى – ە.تويكەنوۆ. ارتىستەرمەن ۆوكال بويىنشا شاقىرىلعان كوۋچ اللا سيمونيشۆيلي جۇمىس ىستەدى. 29 ماۋسىمدا ساحناعا يزابەللانىڭ پارتياسىندا يتاليادان شاقىرىلعان سوليست لاۋرا ۆەررەككيا شىعادى. 30 ماۋسىمدا فەستيۆالعا ارنايى شاقىرىلعان ديريجەر دجۋزەپپە اكۆاۆيۆا ونەر كورسەتەدى, ول دا بىزگە يتاليادان كەلدى.
بيىل قر مادەنيەت جانە سپورت مينيسترلىگىنىڭ قولداۋىمەن «وپەرالياعا» ارمەنيا, قازاقستان, يتاليا, بولگاريا, موڭعوليا, قىتاي, وڭتۇستىك كورەيا, گەرمانيا, رەسەي, وزبەكستان, قىرعىزستان جانە تاجىكستان سەكىلدى الەمنىڭ 12 ەلىنەن شاقىرىلعان ارتىستەر مەن ديريجەرلەر قاتىسادى.
جالپى, فەستيۆالدە 4 گراند-وپەرا كورسەتىلەدى, ولار – دج.ۆەرديدىڭ «دون كارلوسى» جانە «ايداسى», دج.ءروسسينيدىڭ «الجيردەگى يتاليالىق قىز» وپەراسىنىڭ پرەمەراسى, دج.ءپۋچچينيدىڭ «تۋراندوتى». ءار وپەرا سوليستەردىڭ ءتۇرلى قۇرامىمەن ەكى رەتتەن ورىندالاتىنى وتە قىزىقتى.
سونداي-اق كوپشىلىكتىڭ نازارىنا 2 بالەت ۇسىنىلادى, ولار – ر.رەبەكتىڭ حورەوگرافياسىنداعى س.پروكوفەۆتىڭ «كۇلبيكە» قويىلىمى مەن «ي.كيلياننىڭ بالەت كەشتەرى». بۇدان بولەك, قر پرەزيدەنت وركەسترى حالىق مۋزىكا ءانسامبلىنىڭ «سەرپىن» مۋزىكالىق كەشى, شىۇ ەلدەرىنەن شاقىرىلعان سوليستەردىڭ قاتىسۋىمەن وتەتىن گالا-وپەرا, «جىلدىڭ ون ەكى مەزگىلى» كامەرالىق مۋزىكا كونتسەرتى سەكىلدى كورەرمەندەرگە بارلىعى 4 كونتسەرت ۇسىنىلادى. «وپەراليا» مەن «استانا وپەرانىڭ» ح مەرەيتويلىق ماۋسىمىنىڭ جابىلۋىنا وراي سيمفونيالىق كونتسەرت استاناداعى ادەمى مادەني كەشتەردى, ەلورداداعى ونەر مەرەكەسىن قورىتىندىلايدى. تاماشا كەشتە العاش رەت ا.جۇبانوۆ پەن ع.جۇبانوۆانىڭ «قۇرمانعازى» وپەراسىنان الىنعان تاقىرىپتارعا سيمفونيالىق سيۋيتا شىرقالادى.
