استانا قالاسىنىڭ №73 مەكتەپ-ليتسەيىندە ەلوردالىق ۇزدىك وقۋشىلاردىڭ عىلىمي جوبالار كورمەسى ءوتتى. اتالمىش ءىس-شارانى استانا قالاسىنىڭ ءبىلىم باسقارماسى جانە «استانا دارىنى» دارىندى بالالار مەن تالانتتى جاستاردى انىقتاۋ جانە قولداۋ ورتالىعى عىلىم كۇنىنە وراي بىرلەسە ۇيىمداستىردى.
كورمە زياتكەرلىك ويىندار مەن ءتۇرلى عىلىمي جاڭالىقتار, تاجىريبەلىك جۇمىستار ارقىلى وقۋشىلاردىڭ عىلىمعا دەگەن قىزىعۋشىلىعىن ارتتىرۋ جانە وقۋشىلار اراسىندا ءوزارا تاجىريبە الماسۋعا باعىتتالدى. سونىمەن قاتار وقۋشىلاردىڭ العان ءبىلىمىن ومىرلىك تاجىريبەدە قولدانا ءبىلۋ داعدىلارىن قالىپتاستىرۋ ارقىلى كرەاتيۆتىلىكتى دامىتۋ, عىلىمي-شىعارماشىلىق قابىلەتتەرىن جەتىلدىرۋ كوزدەلدى. ينتەراكتيۆتى كورمەنىڭ كەلۋشىلەرىنە قاراپايىم تىلدە ادامزات بالاسىنىڭ ءومىرىن جاقسارتۋعا, جاڭا پەرسپەكتيۆالار اشۋعا مۇمكىندىك بەرەتىن عىلىمنىڭ جەتىستىكتەرى تۋرالى ايتىلدى. ءىس-شاراعا وقۋ-اعارتۋ ءمينيسترى عاني بەيسەمباەۆ, استانا قالاسىنىڭ ءبىلىم باسقارماسى باسشىسى قاسىمحان سەنعازىەۆ جانە وقىتۋشىلار مەن جاس عالىمدار قاتىستى.
كورمەگە وننان اسا رەسپۋبليكالىق بايقاۋلاردىڭ جەڭىمپازدارى مەن جۇلدەگەرلەرى ىرىكتەلدى. وقۋشىلار كەلۋشىلەرگە قاراپايىم تىلدە ادامزات بالاسىنىڭ ءومىرىن جاقسارتۋعا, جاڭا پەرسپەكتيۆالار اشۋعا مۇمكىندىك بەرەتىن تاڭعاجايىپ جانە جاڭاشىل جوبالارىن ۇسىندى. سونىمەن قاتار قاتىسۋشىلار زياتكەرلىك ويىندار, IT ايماعى مەن حيميالىق شوۋ كورسەتىلىمىن كوپشىلىككە پاش ەتتى. ۇشقىر ويلى ءارى عىلىمعا قىزىعۋشىلىق تانىتقان وقۋشىلار ءارتۇرلى جۇمىستارىن كورسەتە ءبىلدى.
«استانا دارىنى» ورتالىعى ديرەكتورىنىڭ مىندەتىن اتقارۋشى جانار بەيسەنباەۆانىڭ ايتۋىنشا, بىلتىردان باستاپ قولعا الىنعان عىلىمي كورمە كەلەسى جىلى دا جالعاسىن تابادى.
كورمەنىڭ وتۋىنە سونداي-اق رەسپۋبليكالىق شاحمات چەللەندجى نەگىز بولدى. بۇل تۋرالى ۇلتتىق عىلىمي-پراكتيكالىق دەنە تاربيەسى ورتالىعىنىڭ باس ديرەكتورى ساعدات سادىقوۆ اتاپ ءوتتى.
«رەسپۋبليكا كولەمىندە شاحمات چەللەندجى باستالدى. ونىڭ ماقساتى –شاحمات ويىنىنا كوپشىلىكتى قىزىقتىرىپ, ويىندى وقىتۋ پاندەرىنىڭ قاتارىنا قوسۋعا باعىتتاۋ. شاحمات – لوگيكالىق ويىن. بالالاردىڭ سىني ويلاۋ قابىلەتىن ارتتىرىپ, بايقاعىشتىق, قىراعىلىق قابىلەتىن جەتىلدىرەدى. چەللەندجگە مەكتەپ وقۋشىلارى مەن كوللەدج ستۋدەنتتەرى قاتىسادى» دەدى ول.
ۇسىنىلعان جۇمىستاردىڭ اراسىندا قالالىق №8 مەكتەپ-ليتسەيىنىڭ 8-سىنىپ وقۋشىسى شاديار بەكمۇحاممەدتىڭ تۋىندىسى ەرەكشەلەندى.
«مەن اۆتوماتتاندىرىلعان وندىرىستە قولدانىلاتىن روبوت- مانيپۋلياتور جاساپ شىعاردىم. جاساپ شىعارعان قۇرىلعىم 360 س گرادۋستا اينالادى. بەلگىلى ءبىر كورسەتىلگەن ارەكەتتى ەسىندە ساقتاپ, كەيىن ونى ءوزى جاساي بەرەدى. ونى ءوندىرىس سالاسىندا قولدانۋعا ءتيىمدى. قۇرىلعى بىرنەشە ادامداردىڭ جۇمىسىن جەڭىلدەتەدى» دەدى جاس ونەرتاپقىش.
