جاقىندا ەلباسى كىتاپحاناسى قىزىقتى دەرەكتەرگە تولى جاڭا ءبىر جيناقپەن تولىقتى. ول – گەيدار اليەۆ قورىنىڭ قولداۋىمەن جارىق كورگەن ريزا ديگاتيدىڭ «لاپىل قاققان وت» («The Elegance of Fire») اتتى كىتابى. مۇندا وقىرماندار ازەربايجان حالقىنىڭ تۇرمىسى مەن ادەت-عۇرىپ, سالت-داستۇرىمەن جاقىنىراق تانىسادى.
كىتاپ «بالالىق شاعىمنىڭ ارمانى», «مادەني جاڭعىرۋ», «رۋحانياتتىڭ جەرى», «ءۇمىت پەن اقيقات», «ىزدەنىس» دەگەن بەس بولىمنەن تۇرادى. ونىڭ ءار تاراۋى ءتۇرلى ءتۇستى سۋرەتتەرمەن بەزەندىرىلگەن. جيناقتاعى سۋرەتتەردەن اۆتوردىڭ كوزقاراسى, ازەربايجانعا دەگەن ەرەكشە ىقىلاسى بايقالادى.
ريزا ديگاتي – فرانتسۋز ءفوتوجۋرناليسى. يراننىڭ تەبريز قالاسىندا دۇنيەگە كەلگەنىمەن, ۇلتى – ازەربايجان. 1979 جىلى يرانداعى مەملەكەتتىك توڭكەرىستىڭ سەبەبىنەن ەلدەن كەتۋگە ءماجبۇر بولادى. بۇگىندە ول ءوز جۇمىستارىندا ادامزات الەمىنىڭ سۇلۋلىعى مەن قايعىلى وقيعالارىن قىراعى نازارىنان تىس قالدىرعان ەمەس.
سونداي-اق ريزا ديگاتي The National Geographic ۇلتتىق گەوگرافيالىق قوعامداستىعىنىڭ 30-دان استام دەرەكتى ءفيلمىنىڭ تۇسىرىلىمىنە قاتىسىپ, جۋرنالدارىنا ءبىرتالاي سۋرەتتەرىن جاريالاعان. وتىزدان استام جىل بويى ول جۇزدەگەن ەلدى ارالاپ, قوعامداعى ءتۇرلى شيلەنىستەردىڭ, تابيعات اپاتتارىنىڭ كۋاگەرى بولدى. ونىڭ ەڭبەكتەرى National Geographic, Time Magazine, Stern, Newsweek, El Pais, Paris Match, Geo سەكىلدى بەدەلدى بۇقارالىق اقپارات قۇرالدارىندا جارىق كورگەن. فيلانتروپ ءارى ناعىز جاناشىر رەتىندە ول بالالارعا ءبىلىم بەرۋ ماسەلەسىمەن اينالىساتىن «AINA» قايىرىمدىلىق قاۋىمداستىعىنىڭ نەگىزىن قالاپ, سونى 2001 جىلدان باستاپ باسقارىپ كەلەدى. بۇگىنگە دەيىن اۆتوردىڭ 29 كىتابى جارىق كورگەن. قورىتا كەلگەندە, ريزا ديگاتيدىڭ جاڭا جيناعى وقىرمانداردى ساياحاتقا شاقىرادى.
