استانادا ءبىر اپتا بويى دۇرىلدەگەن «ەۋرازيا» ءحىىى حالىقارالىق كينوفەستيۆالى اياقتالدى. ايتۋلى الەمدىك شارا اياسىندا 2016-2017 جىلدارى تۇسىرىلگەن بارلىعى 296 كينوتۋىندى كورسەتىلىپ, 200-دەن استام قوناق شاقىرىلدى. نيكولاس كەيدج, ەدريان بروۋدي, دجون مالكوۆيچ سىندى گولليۆۋد جۇلدىزدارى ەلوردا توپىراعىنا تابان تيگىزدى. ال نەگىزگى كونكۋرسقا قاتىسقان 13 تولىقمەتراجدى جانە 30 قىسقامەتراجدى فيلمنىڭ ىشىنەن قازاق رەجيسسەرى ءسابيت قۇرمانبەكوۆتىڭ «ورالمان» كوركەم ءفيلمى توپ جارىپ, باس جۇلدەنى يەلەندى.
كينوفەستيۆالدىڭ نەگىزگى باعدارلاماسىنا ەنگەن بۇل جالعىز وتاندىق كينوتۋىندى قر مادەنيەت جانە سپورت مينيسترلىگىنىڭ تاپسىرىسىمەن ش.ايمانوۆ اتىنداعى «قازاقفيلم» كينوستۋدياسىندا, «قادام» جشس ستۋدياسىنىڭ قاتىسۋىمەن ءتۇسىرىلدى. تۋعان جەرىنەن جىراق كەتۋگە ءماجبۇر بولىپ, ونداعان جىلدار وتكەن سوڭ اۋعانستاننان ەلگە قايتا ورالعان قانداستارىمىز جايلى باياندايتىن فيلمگە دۋلىعا اقمولدا, ەسىم سەگىزباەۆ, ەرجان ءتۇسىپوۆ, شىنار اسقاروۆا, بايان قاجىنابيەۆا سىندى قازاقستاندىق تانىمال اكتەرلەر تۇسكەن.
كينوفەستيۆال تاريحىندا قازاق رەجيسسەرلەرى – دانيار سالاماتتىڭ «اكەم ەكەۋمىز» كينوكارتيناسى, سەرىك اپرىموۆتىڭ «باۋىرى» جانە ناريمان تورەباەۆتىڭ «شۋاقتى كۇندەرى» ۇزدىك رەجيسسۋرا رەتىندە باعالانسا, جاڭابەك جەتىرۋوۆتىڭ «دۇنيە جارىق» جانە اباي قۇلبايدىڭ «ستريج» فيلمدەرى «ازياداعى ۇزدىك فيلم» اتالىمىندا توپ جارعان. ال ءسابيت قۇرمانبەكوۆتەن بۇرىن ارداق امىرقۇلوۆ ءوزىنىڭ «قوش بول, گۇلسارى» كارتيناسىمەن باس جۇلدە يەلەنگەن.
ال بيىل گران-پري العان «ورالمان» كوكتەمدە يراننىڭ استاناسى – تەگەران قالاسىندا وتكەن فادجر 35-ءشى حالىقارالىق كينوفەستيۆالىندە ازيانىڭ ۇزدىك ءفيلمى اتانعان. ءسابيت قۇرمانبەكوۆتىڭ ايتۋىنشا, قالىڭ كورەرمەنگە تولىقتاي جەتپەي جاتقان بۇل فيلم وسى جىلدىڭ اياعىنا دەيىن جالپىۇلتتىق پروكاتقا شىعارىلادى. سونداي-اق, شەتەلدەردە, اسىرەسە قازاق دياسپورالارى شوعىرلانعان مەملەكەتتەردە پروكاتقا جىبەرۋ جوسپارلانىپ وتىر.
«ەۋرازيا» كينوفەستيۆالى – ەلىمىزدەگى عانا ەمەس, جالپى ورتالىق ازيا كەڭىستىگىندەگى ەڭ ۇلكەن كينوالاڭ. سوندىقتان دا بۇل كينوفەستيۆالدىڭ باس جۇلدەسىن جەڭىپ الۋ – مەن ءۇشىن ۇلكەن ابىروي. دەسەك تە, مەن ءۇشىن ەڭ باستىسى – بۇل ءفيلمدى قاراپايىم كورەرمەندەرگە كورسەتۋ. وسى استاناداعى كورسەتىلىمدە كورەرمەندەر ءفيلمدى جىلى قابىلداپ, يراندىق اۋديتوريا, ونىڭ ىشىندە ەتنيكالىق قازاقتار قىزىعا كورگەن بولاتىن» دەگەن كينورەجيسسەر ءفيلمنىڭ ءتۇسىرىلىم توبىن قۇتتىقتاپ, العىسىن جەتكىزدى.
بيىلعى كينوفەستيۆالدە العاش رەت تمد ەلدەرى جانە قىتاي, ءۇندىستان, وڭتۇستىك كورەيا, اقش جانە ەۋروپا ەلدەرىنەن كەلگەن ديستريبيۋتەرلەردىڭ قاتىسۋىمەن «Eurasia Film Market» كينونارىعى ءوتتى. ياعني, فەستيۆالگە اكەلىنگەن فيلمدەر الەمدىك كەڭىستىككە شىعۋعا مۇمكىندىك الدى. ال «Eurasia Spotlight» بيزنەس الاڭى ادەتتەگىدەي كينوجوبالاردىڭ قىزىقتى پيتچينگتەرىن, كينو سالاسىنداعى ءتۇرلى تاقىرىپتارعا نەگىزدەلگەن دوڭگەلەك ۇستەل ماجىلىستەرىن, ءباسپاسوز ءماسليحاتتارىن, شەبەرلىك ساباقتارىن جانە كينويندۋستريانىڭ ماماندارى قاتىسقان ارنايى شارالاردى ۇسىندى.
امانعالي
قالجانوۆ
