كەشە مەملەكەت باسشىسى قاسىم-جومارت توقاەۆ «سىندارلى قوعامدىق ديالوگ –قازاقستاننىڭ تۇراقتىلىعى مەن وركەندەۋىنىڭ نەگىزى» دەگەن تاقىرىپتا قازاقستان حالقىنا جولداۋ ارنادى.
– ءبىز ەلىمىزدىڭ جاڭا تاريحىنداعى ماڭىزدى بەلەسكە جاقىنداپ كەلەمىز.
وتىز جىلعا جۋىق ۋاقىت بۇرىن حالقىمىز ءوزىنىڭ تاۋەلسىزدىگىن جاريالاپ, بابالارىمىزدىڭ عاسىرلار بويى اڭساعان ارمانىن ورىندادى.
وسى ۋاقىت ىشىندە قازاقستاننىڭ تۇڭعىش پرەزيدەنتى – ەلباسى نۇرسۇلتان ءابىشۇلى نازارباەۆتىڭ باسشىلىعىمەن ەلىمىز الەمدەگى بەدەلدى ءارى ورنىقتى مەملەكەتكە اينالدى.
باياندى بىرلىگىمىزدىڭ ارقاسىندا ءتاۋەلسىزدىگىمىزدى نىعايتىپ, حالقىمىزدىڭ جاعدايىن جاقسارتۋعا جول اشتىق.
بۇل جاسامپازدىق پەن ىلگەرىلەۋ, بەيبىتشىلىك پەن كەلىسىم كەزەڭى بولدى.
ەلىمىزدىڭ دامۋ جولىن بۇكىل الەم مويىنداپ, قازاقستاندىق, ياعني نازارباەۆ مودەلى دەپ اتادى.
قازىر بىزگە تاۋەلسىزدىكتىڭ جەتىستىكتەرىن ەسەلەپ, ەلىمىزدى دامۋدىڭ جاڭا ساپالى كەزەڭىنە شىعارۋ مۇمكىندىگى بەرىلىپ وتىر.
ءبىز بۇعان ەلباسى ساياساتىنىڭ ساباقتاستىعىن ساقتاپ, جۇيەلى رەفورمالار جۇرگىزۋ ارقىلى قول جەتكىزە الامىز.
وزدەرىڭىزگە بەلگىلى, وسىنىڭ ءبارى مەنىڭ سايلاۋ الدىنداعى باعدارلامامنىڭ نەگىزى بولدى.
قازىر مەملەكەتتىك ورگاندار ونى جۇزەگە اسىرۋ ءۇشىن ءتيىستى جۇمىستار جۇرگىزۋدە.
مەن حالىققا بەرگەن ۋادەلەرىمدى مىندەتتى تۇردە ورىندايمىن, – دەدى مەملەكەت باسشىسى.
ق.توقاەۆ مۇنان ءارى ءوزىنىڭ سايلاۋالدى باعدارلاماسىندا قامتىلعان ورتاق مىندەتتەردى ىسكە اسىرۋ باعىتتارىنا توقتالدى.
زاماناۋي ءتيىمدى مەملەكەت
ساياسي ترانسفورماتسيالاۋ جونىندەگى مەنىڭ ۋادەم ءبىزدىڭ مەملەكەت پەن حالىقتىڭ مۇددەسىنە قاراي بىرتىندەپ جانە تىڭعىلىقتى جۇزەگە اسىرىلاتىن بولادى. «كۇشتى پرەزيدەنت – ىقپالدى پارلامەنت – ەسەپ بەرۋشى ۇكىمەت». بۇل ءالى ورىندالا قويماعان, بىراق ءبىز جەدەل جەتۋگە ءتيىس ماقساتىمىز. ساياسي جۇيەنىڭ بۇل فورمۋلاسى مەملەكەت تۇراقتىلىعىنىڭ نەگىزى بولادى. سوندىقتان ازاماتتىق قوعامدى نىعايتۋعا جانە قولداۋعا كۇش سالۋىمىز كەرەك. بۇل جالپىمەملەكەتتىك ەڭ وزەكتى دەگەن ماسەلەلەردى تالقىلاۋ ءۇشىن ءارى ولاردىڭ شەشىمىن تابۋ ءۇشىن قاجەت. روتاتسيالىق قاعيدامەن جۇمىس جۇرگىزەتىن ۇلتتىق قوعامدىق سەنىم كەڭەسىنىڭ قۇرىلۋ ماقساتى دا وسىنى كوزدەيدى.
مەملەكەت باسشىسى رەتىندە ەلىمىزدەگى كوپپارتيالىق ءجۇيەنى, ساياسي باسەكەلەستىكتى جانە پىكىر قايشىلىعىن دامىتۋعا ارەكەت ەتۋدى دە ماقساتىم دەپ ەسەپتەيمىن. بۇل ەلىمىزدەگى ساياسي جۇيەنىڭ ۇزاق جىلدارعا تۇراقتىلىعىن قامتاماسىز ەتۋگە كەرەك. الداعى ۋاقىتتا بولاتىن پارلامەنت ءماجىلىسى مەن ماسليحاتقا سايلاۋ ناۋقانى ەلىمىزدەگى كوپپارتيالىق جۇيەنى ءارى قاراي دامىتۋعا ىقپال ەتۋى كەرەك.
ەكىنشىدەن, حالىقپەن كەرى بايلانىستىڭ تيىمدىلىگىن ارتتىرۋ كەرەك. بۇل رەتتە مەملەكەتتىك ورگاندار جۇمىسىنىڭ باسىمدى باعىتى حالىقتىڭ مۇڭ-مۇقتاجىنا جەدەل نازار اۋدارۋعا, اشىق ديالوگ ورناتۋعا باعىتتالۋى قاجەت.
مەملەكەتتىك قىزمەتشىلەردىڭ جۇمىس تيىمدىلىگىن ارتتىرۋ ءۇشىن ولاردىڭ قاتارىنا ءبىلىمدى دە بىلىكتى جاس ماماندار تارتىلسىن. 2020 جىلدان باستاپ ءبىز بىرتىندەپ مەملەكەتتىك قىزمەتشىلەردىڭ سانىن قىسقارتۋدى باستايمىز, ال وسىعان بايلانىستى قىسقارتىلعان قاراجات پايدالى دەپ سانالعان قىزمەتكەردى كوتەرمەلەۋگە جۇمسالاتىن بولادى. 2024 جىلعا قاراي مەملەكەتتىك قىزمەتشىلەر مەن ۇلتتىق كومپانيالاردىڭ قىزمەتكەرلەرى 25 پايىزعا دەيىن قىسقارتىلادى.
ءۇشىنشى, ميتينگتەر تۋرالى زاڭدىلىقتى جەتىلدىرۋ قاجەت. كونستيتۋتسياعا سايكەس ءبىزدىڭ ازاماتتار وزدەرىنىڭ وي-پىكىرىن ەركىن ايتۋعا قۇقىلى. ەگەر بەيبىت شەرۋلەر زاڭدىلىقتاردى جانە ازاماتتاردىڭ تىنىشتىعىن بۇزبايتىن بولسا, وندا ونىڭ وتكىزىلۋىنە كەدەرگى جاساماۋ كەرەك, بەكىتىلگەن زاڭ تالاپتارىنا سايكەس رۇقسات بەرىلىپ, ارنايى ورىندار بەلگىلەنۋى كەرەك. ارينە, ول قالانىڭ شەتىنەن بولماعانى ءجون.
ال كونستيتۋتسياعا قايشى كەلەتىن كەز كەلگەن ءىس-ارەكەتتەر, بۇزاقىلىق اكتسيالار زاڭ شەڭبەرىندە شەكتەلەتىن بولادى.
قوعامدىق كەلىسىمدى نىعايتۋ
الەۋمەتتىك جانە ەتنيكالىق توپتار اراسىنداعى كەلىسىم – بۇكىل قوعامنىڭ بىرلەسكەن ەڭبەگىنىڭ ناتيجەسى.
وسىعان وراي, ساياسي ۇردىستەردى سارالاپ, بىرلىگىمىزدى نىعايتا ءتۇسۋ ءۇشىن ناقتى شارالار قابىلداۋ كەرەك.
قازاق حالقىنىڭ مەملەكەت قۇراۋشى ۇلت رەتىندەگى ءرولىن بەكەمدەپ, ەتنوسارالىق تاتۋلىق پەن دىنارالىق تۇسىنىستىكتى قالىپتاستىرا بەرۋىمىز قاجەت.
ءبىزدىڭ ۇستانىمىمىز: ەل بىرلىگى – ونىڭ ارالۋاندىعىندا!
ەلىمىزدەگى ەتنيكالىق توپتاردىڭ ءتىلى مەن مادەنيەتىن دامىتۋعا جاعداي جاساي بەرەمىز.
قازاق ءتىلىنىڭ مەملەكەتتىك ءتىل رەتىندەگى ءرولى كۇشەيىپ, ۇلتارالىق قاتىناس تىلىنە اينالاتىن كەزەڭى كەلەدى دەپ ەسەپتەيمىن.
بىراق مۇنداي دارەجەگە جەتۋ ءۇشىن ءبارىمىز داڭعازا جاساماي, جۇمىلا جۇمىس جۇرگىزۋىمىز كەرەك.
سونداي-اق, ءتىل ۇلكەن ساياساتتىڭ قۇرالى ەكەنىن دە ۇمىتپاعان ءجون.
بەلسەندى ازاماتتىق قوعام قۇرۋ ءۇشىن ۇكىمەتتىك ەمەس ۇيىمداردىڭ بەدەلىن ارتتىرۋ قاجەت دەپ سانايمىن.
سوندىقتان جاقىن ارادا ازاماتتىق قوعامدى دامىتۋدىڭ 2025 جىلعا دەيىنگى تۇجىرىمداماسىن ازىرلەپ, قابىلداۋىمىز كەرەك.
كەلەر جىلى اتالىپ وتەتىن ماڭىزدى مەرەيتويلار مەن ەلەۋلى وقيعالارعا دايىندىق جۇمىستارى باستالدى.
ەندىگى جىلى ءبارىمىز ءال-ءفارابيدىڭ 1150 جىلدىق, اباي قۇنانبايۇلىنىڭ 175 جىلدىق مەرەيتويلارىن اتاپ وتەمىز.
مەرەيتوي بارىسىندا ىسىراپشىلدىققا جول بەرمەي, عۇلاما تۇلعالارىمىزدىڭ ەڭبەكتەرىن حالىق اراسىندا دارىپتەۋىمىز كەرەك.
سونداي-اق, ەڭ ماڭىزدى مەرەكەگە – تاۋەلسىزدىكتىڭ وتىز جىلدىعىنا بايلانىستى ءتيىستى ءىس-شارالاردى ىسكە اسىرۋىمىز قاجەت.
ەل ومىرىندەگى وسىنداي ەلەۋلى وقيعالار جاس ۇرپاقتى ناعىز وتانشىلدىققا تاربيەلەۋگە جول اشادى دەپ سەنەمىن.
ەل ازاماتتارىنىڭ قۇقىعى مەن قاۋىپسىزدىگىن قامتاماسىز ەتۋ
ازاماتتاردىڭ قۇقىعى مەن قاۋىپسىزدىگىن قورعاۋدى كۇشەيتۋدىڭ نەگىزگى كىلتى سوت جانە قۇقىق قورعاۋ جۇيەسىن تەرەڭ رەفورمالاۋدا جاتىر. سوت شەشىمدەرىنىڭ ساپاسىن جاقسارتۋ بويىنشا بىرقاتار ماڭىزدى شارالاردى جۇزەگە اسىرۋ قاجەت.
قارقىندى دامىعان جانە ينكليۋزيۆتى ەكونوميكا
قازاقستان ەكونوميكاسى جاھاندىق سيپاتتاعى قيىندىقتارعا قاراماستان العا ىلگەرىلەپ كەلەدى.
جىل باسىنان بەرى ونىڭ ءوسىمى ورتاشا الەمدىك كورسەتكىشتەن جوعارى بولدى.
ەگەر قاجەتتى قۇرىلىمدىق وزگەرىستەردى جۇزەگە اسىرساق, 2025 جىلعا قاراي ىشكى جالپى ءونىمنىڭ جىل سايىنعى تۇراقتى ءوسىمىن 5 پايىزعا جانە ودان دا جوعارى دەڭگەيگە جەتكىزۋگە بولادى.
ەكونوميكانىڭ دامۋىنا تىڭ سەرپىن بەرۋ ءۇشىن ۇكىمەت پەن پرەزيدەنت اكىمشىلىگى وتاندىق جانە شەتەلدىك ساراپشىلاردىڭ بارلىق جۇمىستارىن مۇقيات سارالاۋى قاجەت.
ەلباسى ۇسىنعان 2050 جىلعا دەيىنگى ۇزاق مەرزىمدى دامۋ ستراتەگياسىنا جانە ۇلت جوسپارىنا سايكەس بىرقاتار قۇرىلىمدىق مىندەتتەردى ىسكە اسىرۋىمىز كەرەك.
بىرىنشىدەن, شيكىزاتقا بايلانعان مەنتاليتەتتەن باس تارتىپ, ەكونوميكانى ءارتاراپتاندىرۋ. ەكىنشى, كۆازيمەملەكەتتىك سەكتوردىڭ قايتارىمىن كوتەرۋ. ۇشىنشىدەن, ءتيىمدى شاعىن جانە ورتا بيزنەس – قالا مەن اۋىلدى دامىتۋدىڭ بەرىك نەگىزى.
سوندىقتان مەملەكەت الداعى ۋاقىتتا دا بيزنەسكە قولداۋ كورسەتە بەرەدى. بۇل ماقساتقا ۇلتتىق قوردان 100 ميلليارد تەڭگەگە جۋىق قارجى ءبولدى.
ۇلتتىق قوردى ءتيىمدى پايدالانۋ ماسەلەسى ۇلتتىق قور قاراجاتىنىڭ اعىمداعى ماسەلەلەردى شەشۋگە جۇمسالۋىن قىسقارتۋ قاجەت.
بۇل – كەلەشەك ۇرپاقتىڭ قارجىسى. ۇلتتىق قوردىڭ ترانسفەرتتەرى باسەكەگە قابىلەتتى ەكونوميكانى قالىپتاستىرۋعا باعىتتالعان باعدارلامالاردى جانە جوبالاردى جۇزەگە اسىرۋ ءۇشىن عانا ءبولىنۋى كەرەك.
كەپىلدەندىرىلگەن ترانسفەرت كولەمى ەكى مىڭ جيىرما ەكىنشى (2022) جىلدان باستاپ بىرتە-بىرتە 2 تريلليون تەڭگەگە دەيىن ازايۋى ءتيىس.
قور قارجىسىن پايدالانۋدىڭ اناعۇرلىم ءتيىمدى ينۆەستيتسيالىق ساياساتىن جۇرگىزگەن ءجون.
ۇكىمەتكە ۇلتتىق بانكپەن بىرلەسىپ, جىل سوڭىنا دەيىن ۇلتتىق قوردىڭ قارجىسىنا يەلىك ەتۋدى جەتىلدىرۋ ءۇشىن ناقتى ۇسىنىستار ازىرلەۋدى تاپسىرامىن.
ەڭبەكاقى تولەۋ دەڭگەيىن ارتتىرۋ.
كەن ءوندىرۋ سالاسىنداعى ءىرى كاسىپورىنداردىڭ تابىسى ارتقانمەن ازاماتتارىمىزدىڭ جالاقىسى ايتارلىقتاي وسپەگەنىن كورىپ وتىرمىز.
حالىقتىڭ الەۋمەتتىك جاعدايى تۋرالى ايتىلىپ وتىرعاندىقتان, ۇكىمەت بۇل ماسەلەگە قاتىستى تاباندىلىق تانىتۋى كەرەك.
ۇكىمەتكە ەڭبەكاقى تولەۋ قورىن ارتتىرۋ ءۇشىن جۇمىس بەرۋشىلەردى ىنتالاندىرۋ ماسەلەسىن پىسىقتاۋدى تاپسىرامىن.
الەۋمەتتىك جاڭعىرتۋدىڭ جاڭا كەزەڭى
ەلىمىزدىڭ بيۋدجەتى ەكى نەگىزگى ماقساتقا باعىتتالۋى ءتيىس – ەكونوميكانى دامىتۋ جانە الەۋمەتتىك ماسەلەلەردى شەشۋ.
الەۋمەتتىك سالادا مىناداي باعىتتارعا باسا ءمان بەرۋ كەرەك.
ءبىرىنشى. ءبىلىم بەرۋ ساپاسىن جاقسارتۋ.
ءبىزدىڭ ەلىمىزدە ەڭبەك رەسۋرستارىنىڭ بالانسىن ەسەپكە الۋدىڭ ءتيىمدى ادىستەمەسى ءالى كۇنگە دەيىن ازىرلەنگەن جوق.
شىن مانىندە, ماماندار دايارلاۋدىڭ وتاندىق جۇيەسى ناقتى ەڭبەك نارىعىنان تىس قالعان.
جىل سايىن 21 مىڭعا جۋىق مەكتەپ تۇلەگى كاسىبي جانە جوعارى وقۋ ورىندارىنا تۇسە الماي قالادى.
جاستاردىڭ بۇل توبى جۇمىسسىزدار مەن مارگينالداردىڭ نەگىزىن قۇرايدى. ولار امالىنىڭ جوقتىعىنان قىلمىستىق جانە ەكسترەميستىك اعىمداردىڭ ىقپالىنا تۇسۋدە.
ءبىز وقۋشىلاردىڭ قابىلەتىن ايقىنداپ, كاسىبي باعىت-باعدار بەرۋ ساياساتىنا كوشۋىمىز قاجەت.
بۇل ساياسات ورتا ءبىلىم بەرۋدىڭ ۇلتتىق ستاندارتىنىڭ نەگىزى بولۋى ءتيىس.
ەكونوميكامىزدا تەحنيكا سالاسىنىڭ ماماندارىنا سۇرانىس وتە جوعارى, بىراق مۇمكىندىكتەر از. كاسىپورىندار ءتيىستى مامانداردى شەتەلدەن شاقىرۋعا ءماجبۇر. وسىنداي كەلەڭسىز جاعدايدى جەدەل تۇزەتۋىمىز كەرەك.
قالا مەن اۋىل مەكتەپتەرى اراسىنداعى ورتا ءبىلىمنىڭ ساپاسى الشاقتاپ بارادى.
نەگىزگى ماسەلە – اۋىلدىق جەرلەردەگى بىلىكتى پەداگوگ كادرلاردىڭ تاپشىلىعى.
سوندىقتان «ديپلوممەن – اۋىلعا» باعدارلاماسىنىڭ اياسىن كەڭەيتىپ, جۇمىستى جاڭا دەڭگەيدە جالعاستىرۋىمىز قاجەت. ۇكىمەتكە كەلەسى جىلدان باستاپ وسى باعدارلامانى قارجىلاندىرۋدى 20 ملرد تەڭگەگە جەتكىزۋدى تاپسىرامىن.
دارىندى اۋىل جاستارىن ىرىكتەپ, وتاندىق جانە شەتەلدىك جوعارى وقۋ ورىندارىنا دايىنداۋ كەرەك.
از قامتىلعان جانە كوپ بالالى وتباسىلاردى قولداۋ ءۇشىن ۇكىمەتكە دارىندى بالانىڭ قابىلەتىن دامىتۋدىڭ جول كارتاسىن ازىرلەۋدى تاپسىرامىن.
ۇكىمەت پەن اكىمدەر وسىنداي بالالاردىڭ ۇيىرمەلەر مەن ورتالىقتارعا, جازعى لاگەرلەرگە بارۋى ءۇشىن مۇمكىندىك جاساۋى كەرەك.
ەندى جوعارى ءبىلىمنىڭ ساپاسىنا جەكە توقتالعىم كەلەدى.
ءوز تۇلەكتەرىن جۇمىسپەن قامتۋ جاعىنان ەلىمىزدەگى جوعارى وقۋ ورىندارىنىڭ جارتىسى عانا 60 پايىزدىق دەڭگەيگە قول جەتكىزىپ وتىر.
سوندىقتان ولاردىڭ سانىن قىسقارتۋ ماسەلەسىن قاراۋ كەرەك.
تەرەڭ ءبىلىم بەرۋدىڭ ورنىنا ديپلوم ساتۋمەن اينالىسقان ۋنيۆەرسيتەتتەرىمىز بار ەكەنى دە جاسىرىن ەمەس.
ءبىرىنشى كەزەكتە سولارعا تىيىم سالۋ ارقىلى ءبىز وقۋ ورىندارىنداعى ءبىلىم بەرۋ ساپاسىن ارتتىرۋعا كۇش سالامىز.
ءبىلىم سالاسىنا قاتىستى تاعى ءبىر ماسەلە – قارجىلاندىرۋدىڭ بىركەلكى بولماۋى جانە وڭىرلىك باسقارۋدىڭ قازىرگى جۇيەسىنىڭ تيىمسىزدىگى.
ءبىلىم بولىمدەرىن باسقارۋ جانە بيۋدجەت قارجىسىن اكىمشىلەندىرۋ فۋنكتسيالارىن اۋداندىق دەڭگەيدەن وبلىستىق دەڭگەيگە بەرۋ كەرەك.
ءبىلىم بەرۋدىڭ بارلىق دەڭگەيىندە دەربەس قارجىلاندىرۋ ءتارتىبىن ەنگىزۋ قاجەت.
تاعى ءبىر وزەكتى ماسەلە. بۇل – وقۋلىق ساپاسىنىڭ تومەندىگى.
وقۋشىلاردى ساپالى وقۋلىقتارمەن قامتاماسىز ەتۋ – ءتيىستى مينيسترلىكتىڭ تىكەلەي مىندەتى.
مۇعالىمدەر مەن وقىتۋشىلاردىڭ الەۋمەتتىك جاعدايىن جاقسارتپاساق, بۇل شارالار جۇزەگە اسا قويمايدى.
سوندىقتان مەن تامىز كونفەرەنتسياسىندا الداعى ءتورت جىل ىشىندە مۇعالىمدەردىڭ ەڭبەك اقىسىن ەكى ەسە ارتتىرۋدى تاپسىردىم. بۇل – كەلەسى جىلدان باستاپ ۇستازداردىڭ جالاقىسى 25 پايىزعا وسەدى دەگەن ءسوز.
مادەنيەت قىزمەتكەرلەرىن قولداۋ.
ءبىز مادەنيەت سالاسىندا جۇمىس ىستەيتىن ازاماتتارعا جەتكىلىكتى تۇردە كوڭىل بولمەي وتىرمىز.
بۇل – ەڭ الدىمەن, كىتاپحانا, مۋزەي, تەاتر قىزمەتكەرلەرىنە قاتىستى ماسەلە.
ولاردىڭ ەڭبەكاقىسى سوڭعى جىلدارى مۇلدە كوبەيگەن جوق.
سونىڭ سالدارىنان مادەنيەت قىزمەتكەرلەرى, اسىرەسە جاس ماماندار جەڭىلدىگى بار تۇرعىن ءۇي باعدارلامالارىنا قاتىسا المايدى.
مۇنداي احۋال وسى كاسىپتىڭ بەدەلىن ءتۇسىرىپ, لايىقتى كادرلاردىڭ تاپشىلىعى ايقىن سەزىلۋدە.
كەلەسى جىلدان باستاپ ۇكىمەت مادەنيەت قىزمەتكەرلەرىنىڭ ەڭبەكاقىسىن كوبەيتۋى ءتيىس.
سونداي-اق, ءبىلىم بەرۋ جانە دەنساۋلىق ساقتاۋ سالالارىنداعى مىندەتتى الەۋمەتتىك جەڭىلدىكتەر مادەنيەت سالاسىنىڭ وكىلدەرىنە دە بەرىلۋى كەرەك.
قۇرمەتتى وتانداستار!
ءبىز ەلىمىزدى رەفورمالاۋدىڭ جاڭا كەزەڭىنە قادام باستىق. وسى ماڭىزدى مىندەتتەردى ساپالى ورىنداۋىمىز كەرەك.
ەلىمىزدىڭ ءاربىر تۇرعىنى وڭ وزگەرىستى سەزىنۋى ءتيىس.
مەن مەملەكەتتىك ورگانداردان جۇمىستى جەدەل اتقارىپ, ناقتى ناتيجەگە قول جەتكىزۋدى تالاپ ەتەمىن.
رەفورمانى تەك رەفورما ءۇشىن جۇرگىزۋگە جول بەرىلمەيدى.
ءاربىر مينيستردە جانە اكىمدە ناتيجەلى جۇمىستىڭ نەگىزگى كورسەتكىشتەرىنىڭ ءتىزىمى بولۋى ءتيىس.
سول ارقىلى ولاردىڭ ناقتى ماقساتقا قول جەتكىزۋ دەڭگەيى انىقتالادى.
ۇكىمەت مۇشەلەرىنە, مەملەكەتتىك ورگاندار مەن وڭىرلەردىڭ, مەملەكەتتىك كومپانيالاردىڭ جانە مەكەمەلەردىڭ باسشىلارىنا ءتيىستى رەفورمانىڭ جۇزەگە اسىرىلۋى ءۇشىن دەربەس جاۋاپكەرشىلىك جۇكتەلەدى.
وسىعان بايلانىستى, جاقىندا ءتيىستى جارلىققا قول قويدىم. بۇل جارلىقتىڭ اياسىندا ەلدەگى احۋال, سونىڭ ىشىندە ايماقتارداعى حالىقتىڭ جاعدايى ساۋالناما نەگىزىندە ناقتى باعالاناتىن بولادى.
ۇكىمەتتىڭ الەۋمەتتىك جانە ەكونوميكالىق ساياساتقا جاۋاپتى قۇرىلىمدارى قوعامنىڭ قاجەتتىلىكتەرىنە سايكەس الدىن الا ناقتى جۇمىس جۇرگىزۋى قاجەت. بۇل ءۇشىن باقىلاۋ, تالداۋ جانە بولجاۋ جۇيەسىن نەعۇرلىم كۇشەيتۋ كەرەك.
سوندىقتان دەپۋتاتتارىمىزدىڭ وتىنىشىنە وراي پارلامەنت جانىنان زاڭنامانى زەردەلەۋ جانە ساراپتاۋ ينستيتۋتىن قۇرۋ جونىندە تاپسىرما بەرەمىن.
اتالعان قۇرىلىم زاڭدارىمىزدىڭ ساپاسىن ارتتىرۋعا ىقپال ەتۋى ءتيىس.
قادىرلى قازاقستاندىقتار!
حالقىمىزدى تولعاندىراتىن بارلىق ماسەلەلەر بىزگە بەلگىلى.
وسىعان وراي, احۋالدى جاقسارتۋ ءۇشىن ءىس-قيمىل جوسپارى ازىرلەنىپ جاتىر.
بىزگە زور جاۋاپكەرشىلىك جۇكتەلىپ وتىر.
مەن ەل تاعدىرىنا جانى اشيتىن ءاربىر ازاماتقا زور سەنىم ارتامىن.
قازاقستان – ورتاق شاڭىراعىمىز!
مەن ءبارىڭىزدى مەرەيلى مەكەنىمىزدى وركەندەتۋگە ۇلەس قوسۋعا شاقىرامىن!
سىندارلى قوعامدىق ديالوگ – تاتۋلىق پەن تۇراقتىلىق نەگىزى.
ۇلى اباي ءوزىنىڭ التىنشى قارا سوزىندە «بىرلىك – اقىلعا بىرلىك» دەگەنىن بىلەسىزدەر.
ەلباسىمىزدىڭ «ەل بىرلىگى – ەڭ اسىل قاسيەت» دەگەن قاناتتى ءسوزى – ءبىزدىڭ اينىماس قاعيدامىز.
بەرەكە مەن بىرلىك, اقىل مەن پاراسات حالقىمىزدى ۇنەمى العا باستاپ كەلەدى.
باعىتىمىز – ايقىن, جولىمىز – اشىق.
ءبارىمىز بىرگە بولساق, ەلىمىز بۇدان دا زور جەتىستىككە جەتەدى دەپ سەنەمىن!
بارشاڭىزعا اماندىق, تابىس تىلەيمىن, دەپ تۇيىندەدى مەملەكەت باسشىسى قاسىم-جومارت توقاەۆ.
(جولداۋدىڭ ىقشامدالعان نۇسقاسى بەرىلىپ وتىر. تولىق ءماتىنىن Elorda Aqparat سايتىنان وقي الاسىزدار)
