م.گوركي اتىنداعى مەملەكەتتىك اكادەميالىق ورىس دراما تەاترى سەربيادا وتكەن «Synergy #wtf» اتتى ءى حالىقارالىق تەاتر فەستيۆالىنە «ماڭگۇرت. ماڭگى قۇل» ميستەرياسىمەن قاتىسىپ, تابىستى ونەر كورسەتتى.
سپەكتاكلدىڭ الدىندا كورەرمەنگە ۇلتتىق مۋزىكامەن كوركەمدەلگەن قازاقستاندى, استانانى جانە اتالمىش تەاتردى تانىستىرعان كورمە ۇيىمداستىرىلدى. جينالعان قاۋىم سول ارقىلى قازاقستان مادەنيەتىنەن حابار العانداي بولدى.
سپەكتاكلگە دە فەستيۆالدى ۇيىمداستىرۋشىلار مەن سەربيالىق كورەرمەن وڭ پىكىرلەرىن ايتتى. وعان قاجەت دەكوراتسيالار سول ەلدە قارسى الۋشى تاراپتىڭ ەسەبىنەن ازىرلەنگەنىن ايتۋ كەرەك.
– قازاقستاندىق تەاتردىڭ كەلۋىن تاعاتسىز كۇتتىك. ۇسىنىلعان سپەكتاكل قىزىعۋشىلىعىمىزدى وياتىپ, تەاتر قازىرگى زامان دراماتۋرگياسىنا ساي قويىلعانىنا كوزىمىزدى جەتكىزدى. الەمدىك دراماتۋرگيا كوشىنىڭ سوڭىندا قالماي, العا باسىپ كەلەدى ەكەنسىزدەر. ال تەاترلاردىڭ ىنتىماقتاستىعى – ماڭىزدى ماسەلە. وسىدان كەيىن مادەني بايلانىسىمىز بەكي ءتۇستى دەپ ويلايمىن, – دەدى فەستيۆال ديرەكتورى ۆالەنتيل ۆەنتسەل.
بىلتىر مەملەكەت باسشىسى نۇرسۇلتان نازارباەۆتىڭ سەربياعا ساپارى بارىسىندا بەلگراد قالاسىندا جىر الىبى جامبىل جاباەۆتىڭ ەسكەرتكىشى اشىلعان بولاتىن. سول جەردە ەلباسى ەكىجاقتى مادەني جانە گۋمانيتارلىق بايلانىستى نىعايتۋ جونىندە اڭگىمە قوزعادى. م.گوركي اتىنداعى مەملەكەتتىك اكادەميالىق ورىس دراما تەاترى سول ەلگە بارعاندا وسىنى باسشىلىققا الدى.
جالپى, فەستيۆال ءبىر اپتاعا جالعاستى. وعان قازاقستانمەن قاتار ۆەنگريا, رۋمىنيا, ماكەدونيا جانە سەربيا مەملەكەتتەرىنىڭ تەاترلارى قاتىستى. شارا اياسىندا سيمپوزيۋمدار وتكىزىلىپ, جينالعان ونەر ۇجىمدارى تاجىريبە الماستى, جاڭا تەاتر ماۋسىمىنا ارنالعان جوسپارلارىمەن ءبولىستى.
امانعالي قالجانوۆ
