بەلگىلى كاسىپكەرلەر, قوعام قايراتكەرلەرى مەن جۋرناليستەر «ADAL» پارتياسىنان ءماجىلىس دەپۋتاتتىعىنا ۇمىتكەرلەر تىزىمىنە ەندى.
ورتالىق سايلاۋ كوميسسياسى (وسك) قر پارلامەنتى ءماجىلىسى دەپۋتاتتارىنىڭ سايلاۋىنا «اDAL» پارتياسىنان ۇمىتكەرلەر ءتىزىمىن تىركەدى. «قازاقستان رەسپۋبليكاسىنداعى سايلاۋ تۋرالى» 1995 جىلعى 28 قىركۇيەكتەگى كونستيتۋتسيالىق زاڭنىڭ 89-بابىنا سايكەس, ورتالىق سايلاۋ كوميسسياسى «اDAL» ساياسي پارتياسى» قوعامدىق بىرلەستىگىنىڭ پارتيالىق ءتىزىمىن تىركەۋگە قاۋلى شىعاردى.
سونداي-اق وسك سايلاۋ بيۋللەتەنىنە «اDAL» ساياسي پارتياسى» قوعامدىق بىرلەستىگىنىڭ اتاۋىن ەنگىزۋگە رۇقسات بەردى. 2020 جىلى 27 قاراشادا «ADAL» پارتياسى وسك-عا پارلامەنت ءماجىلىسىنىڭ دەپۋتاتتارىن سايلاۋعا ۇمىتكەرلەرىن ۇسىنۋ تۋرالى قۇجاتتارى تاپسىرعانى ءمالىم. ۇمىتكەرلەردىڭ قورىتىندى تىزىمىنە پارتيانىڭ 16 وكىلى كىردى, ولار: ولجاس ورداباەۆ – «اتامەكەن» ۇلتتىق كاسىپكەرلەر پالاتاسى توراعاسىنىڭ ورىنباسارى, ءبىلىم بەرۋ سالاسىنىڭ ساراپشىسى; ماقسات تولىقباي – بەلگىلى تەلەجۋرناليست, «اشىق الاڭ» تەلەجوباسىنىڭ جۇرگىزۋشىسى, Maltabu.kz سايتىنىڭ اۆتورى; الماسبەك سادىرباەۆ – «شوپان اتا» قازاقستان قوي وسىرۋشىلەرى ۇلتتىق اسسوتسياتسياسىنىڭ توراعاسى; داۋلەت مۇقاەۆ – تەلەجۋرناليست, قوعام قايراتكەرى; لاۋرا ماليكوۆا – «تاجىريبەلى ەكولوگتار قاۋىمداستىعىنىڭ» ءتورايىمى; جيگۋلي دايراباەۆ – «قازاقستان فەرمەرلەر وداعى» رەسپۋبليكالىق قوعامدىق بىرلەستىگىنىڭ پرەزيدەنتى; ارداق نازاروۆ – بەلگىلى سپورتشى, قوعام قايراتكەرى; اقمارال بەكمۋرزاەۆا – ەكونوميست, كاسىپكەر; يگور شاتسكي – قوعام قايراتكەرى, كاسىپكەرلەردىڭ قۇقىقتارىن قورعاۋ سالاسىنداعى ساراپشى; نۇرلىبەك مالەلوۆ – قارجىگەر, مەملەكەت قايراتكەرى, اوك سالاسىنىڭ ساراپشىسى, عالىمبەك جاقسىلىقوۆ – قوعام قايراتكەرى, قىزىلوردا وبلىسى وڭىرلىك كاسىپكەرلەر پالاتاسىنىڭ ديرەكتورى; الينا اسقاروۆا – بيزنەس ءبىلىم سالاسىن باسقارۋ بويىنشا ساراپشى; ءلاززات چينكيسباەۆا – «مەنىڭ اتامەكەنىم» الەۋمەتتىك قورىنىڭ ءتورايىمى; عاني ابادان – پارتيانىڭ الماتى قالاسىنداعى فيليالىنىڭ توراعاسى; سەرىك سۇلتانعالي – «ADAL» پارتياسىنىڭ توراعاسى, مەملەكەت جانە قوعام قايراتكەرى; ەلدار جۇماعازيەۆ – قوعام قايراتكەرى, بىرقاتار وقۋ, الەۋمەتتىك جوبالاردىڭ اۆتورى, ساياساتتانۋشى.