بۇگىن «استانا وپەرا» تەاترىندا امەريكادا تۇراتىن وتانداسىمىز, «دارىن» مەملەكەتتىك جاستار سىيلىعىنىڭ لاۋرەاتى, دارىندى سكريپكاشى وردابەك دۇيسەننىڭ «ماڭگى وشپەس مۋزىكا» اتتى كەشى وتەدى.
بۇگىنگە دەيىن بەلگىلى ونەرپاز وردابەك دۇيسەن اقش-تاعى «داللاس وپەرا» سيمفونيالىق وركەسترىنىڭ كونتسەرتمەيستەرى, مەكسيكا ەلىندەگى كوليما قالاسىنداعى ونەر ۋنيۆەرسيتەتىنىڭ ءارتىسى جانە پروفەسسورى, فورت ۋورت قالاسىنداعى (اقش) سيمفونيالىق وركەستردىڭ ءارتىسى سەكىلدى بىرقاتار قۇرمەتتى اتاقتاردى يەلەنىپ ۇلگەرگەن.
ول جاستايىنان كلاسسيكالىق مۋزىكاعا قۇشتار بولىپ وسەدى. قازاق ۇلتتىق ونەر ۋنيۆەرسيتەتىندە اتاقتى پروفەسسورلار رايسا جانە ايمان مۇساقوجاەۆالاردىڭ سىنىبىندا وقيدى. ودان كەيىن مۇحيت اسىپ, اقش-تىڭ تەحاس شتاتىنداعى داللاس ۋنيۆەرسيتەتىنىڭ اسپيرانتۋراسى مەن ماگيستراتۋراسىن ءتامامدايدى. بۇل كۇندەرى تالانتتى ازاماتتىڭ ەسىمىن امەريكا, ەۋروپا جانە ازيا ەلدەرىنىڭ جۇرتشىلىعى جاقسى بىلەدى.
مۋزىكالىق كەشتە وردابەكپەن بىرگە ونىڭ باۋىرى ءىلياس دۇيسەن دە ديريجەر رەتىندە العاش ونەر كورسەتپەك. ەكەۋى دە ونەرلى اۋلەتتىڭ پەرزەنتى. كەشتە كورەرمەن نازارىنا اۆستريالىق كلاسسيكتەر ي.گايدن مەن ۆ.موتسارتتىڭ شىعارمالارى وينالادى.
قىسقاسى, كلاسسيكالىق مۋزىكانىڭ قاينارىن قانىپ ىشەمىن دەسەڭىز, وسى كەشتەن قالىپ قويماڭىز.
ازامات ەسەنجول
