ەلوردادا قازاقستان حالىق پارتياسىنىڭ سايلاۋالدى ۇگىت-ناسيحات جۇمىستارى اياسىندا ءىرى ساۋدا ورىندارىندا «حالىقتىكىن ساتىپ ال» اكتسياسى ۇيىمداستىرىلدى.
قحپ اتىنان پارلامەنت ءماجىلىسى دەپۋتاتتىعىنا ۇمىتكەرلەر سۋپەرماركەتتەر مەن ساۋدا ورتالىقتارى جەلىلەرىنە بارىپ, وتاندىق ءوندىرىس تاۋارلارىنىڭ تۇرلەرىمەن تانىستى. ولار ەڭ الدىمەن قالاداعى «الەم» ساۋدا ورتالىعىنا ات باسىن بۇردى. اكتسيا بارىسىندا ۇمىتكەرلەر قازاقستاندىق وندىرۋشىلەردىڭ ونىمدەرىن ساتىپ الدى.
– وزدەرىڭىزگە بەلگىلى, ازىق-تۇلىك قاۋىپسىزدىگى – قازاقستان حالىق پارتياسىنىڭ سايلاۋالدى باعدارلاماسىنىڭ نەگىزگى باعىتتارىنىڭ ءبىرى. جەرگىلىكتى جەردە وندىرىلەتىن تاۋارلار باعاسى قىمباتتاماۋى كەرەك, ول ۋاكىلەتتى ورگاندار تاراپىنان باقىلانىپ وتىرۋى ءتيىس. سەبەبى بيىل پاندەميا كەزىندە وتاندىق وندىرۋشىلەردىڭ ەڭ قاجەتتى تاۋار جانە ازىق-تۇلىك ونىمدەرىنىڭ باعاسى كوتەرىلىپ كەتكەنىن ءبارىمىز دە كوردىك, ءتىپتى كۇنباعىس مايىنىڭ 1 ءليترى 700 تەڭگەگە دەيىن جەتتى, بۇل رەتتە وتاندىق تاۋار ونىمدەرى تۋرالى ايتىپ وتىرمىز. قانتتىڭ باعاسى كەلىسىنە 300 تەڭگەگە دەيىن باردى. مەملەكەتتىڭ ازاماتتاردى قولداۋ رەتىندە بەرگەن 42500 تەڭگەگە كوپ ەشتەڭە كەلمەيتىنىن دە تۇسىنەمىز, – دەيدى جامبىل احمەتبەكوۆ.
وسى رەتتە ول ەلدىڭ وسال توپتارىن الەۋمەتتىك قولداۋ رەتىندە بولىنگەن قارجى تىم ماردىمسىز ەكەنىن, سوندىقتان الەۋمەتتىك تولەمدەر مولشەرىن كوتەرۋ كەرەكتىگىن ايتتى. تۇراقتاندىرۋ قورلارىنىڭ مۇمكىندىكتەرىن كوتەرىپ, قازاقستاندىق وندىرۋشىلەردىڭ تاۋارلارىنا باعانىڭ ارتۋىنا جول بەرمەۋ كەرەك. حالىق پارتياسى ونەركاسىپتىك قاۋىپسىزدىكتى جانە قازاقستاندىقتاردىڭ تەڭ قۇقىعىن قامتاماسىز ەتۋ ءۇشىن اۋىلشارۋاشىلىق ماقساتىنداعى جەرلەردى شەتەلدىكتەرگە جەكە مەنشىككە ساتۋعا زاڭدى تۇردە توسقاۋىل قويۋ ماسەلەسىن كوتەرۋدە. پارتيا مۇشەلەرى وسى ماسەلە بويىنشا رەفەرەندۋم وتكىزۋ قاجەت دەپ سانايدى. «ەڭ ءبىرىنشى كەزەكتە قاجەت تاۋارلار مەن ونىمدەردىڭ ساپالى بولۋىنا قول جەتكىزبەكپىز. پارتيانىڭ باستى ماقساتى – الدىمەن ەلىمىزدى ەڭ قاجەتتىمەن تولىق قامتاماسىز ەتۋ, سوسىن بارىپ ءبىزدىڭ ونىمدەردى سىرتقا شىعارۋ» دەپ اتاپ ءوتتى پارلامەنت ءماجىلىسى دەپۋتاتتىعىنا ۇمىتكەر ج.احمەتبەكوۆ.