استانا قالاسىندا 2020-2023 جىلدار ارالىعىندا 2380 جاس وتباسى 3 جىلدان 5 جىلعا دەيىن جالعا بەرىلەتىن پاتەرگە يە بولىپ, ۇلكەن قۋانىشقا بولەندى. بۇل – شاڭىراق كوتەرگەن جاستار اياعىنان تىك تۇرىپ كەتكەنشە «7-20-25», «وتباسى بانك», «بايتەرەك» مەملەكەتتىك باعدارلامالارى ارقىلى بەرىلىپ وتىرعان جەڭىلدىكتەر. ايىنا 12-15 مىڭ تەڭگە تولەپ, وسى جالدامالى پاتەردە تۇراتىندار بولاشاقتا وزىنە باسپانا الۋى ءۇشىن قاراجات جيناۋى قاجەت. قازىرگىدەي قىمباتشىلىق قوس بۇيىردەن قىسىپ تۇرعان زاماندا وعان كوپشىلىگىنىڭ شاماسى جەتە مە؟
ۇنەمدەسەڭ – ءۇيلى بولاسىڭ
ۇكىمەت بيىل ناۋرىز ايىنان باستاپ «وتباسى بانك» ارقىلى قوسىمشا «وتاۋ» اتتى جاڭا تۇرعىن ءۇي باعدارلاماسىن ىسكە قوستى. اتالعان باستاما 35 جاسقا دەيىنگى ازاماتتاردىڭ ءۇيلى بولۋعا دەگەن ءۇمىتىن نىعايتىپ, وعان 30 ساۋىرگە دەيىن 20 مىڭعا تارتا ءوتىنىش قابىلدانعان. وسى ورايدا «وتباسى بانك» باسقارما توراعاسى ءلاززات يبراگيموۆانىڭ ايتۋىنشا, ەلىمىزدىڭ تۇرعىن ءۇي نارىعىنداعى جاعداي قازىر الدەقايدا جاقسارا تۇسكەن كورىنەدى. وتكەن جىلى قازاقستاندا 17,5 ملن شارشى مەتر تۇرعىن ءۇي سالىنىپ, 157 مىڭ پاتەر پايدالانۋعا بەرىلگەن.
ەلوردادا قۇرىلىس قارقىندى جۇرۋدە. تەك 2024 جىلدىڭ قاڭتارىنان بەرى عانا 480 مىڭ شارشى مەتر تۇرعىن ءۇي عيماراتى تۇرعىزىلدى. مامانداردىڭ ايتۋىنشا, بۇل 2023 جىلدىڭ وسى كەزەڭىمەن سالىستىرعاندا 3 پايىزعا كوپ كورىنەدى. سوعان سايكەس سۇرانىس تا ارتىپ وتىر. 2023 جىلى قازاقستاندا ساتۋ-ساتىپ الۋ باعىتىندا شامامەن 370 مىڭ مامىلە جاسالسا, ايىنا 25-30 ادام باسپانا الۋعا ءوتىنىش بەرگەن ءارى ولاردىڭ 85-90 پايىزى باسپاناسىن يپوتەكا ارقىلى الىپتى. وسىعان وراي, وتكەن جىلى ەلىمىزدە تەك «وتباسى بانكتەن» عانا 112 مىڭ يپوتەكا زايمى راسىمدەلگەن.
كەيىنگى جىلدارى جاس وتباسىلاردى قولداۋ ءۇشىن يپوتەكا قارىزىنىڭ پايىزى 17-دەن 9 پايىزعا تومەندەدى. باستاپقى جارنا – 20 پايىز. ەندى, مىنە, شاڭىراق كوتەرگەن جاستاردى قوسىمشا قولداۋ ماقساتىندا «وتاۋ» تۇرعىن ءۇي باعدارلاماسى ىسكە قوسىلىپ وتىر.
استانا قالاسىنىڭ تۇرعىنى جاندار مۇراتۇلى – وسى باعدارلاما ارقىلى ءۇي الۋعا ءۇمىتتىنىڭ ءبىرى.
«ءبىز وتباسىمىزبەن بۇل باستامانى كوپتەن بەرى زەرتتەپ كەلەمىز. العاشىندا ونى ەل اراسىندا «9-20-25» دەپ اتادى. قازىر ازداعان وزگەرىس ەنگىزىپ, «وتاۋ» باعدارلاماسى دەپ حالىققا قايتادان ۇسىنىپ وتىر. كوبى ونى باسپانالى بولۋدىڭ ەڭ ءتيىمدى جولى دەپ سانايتىن سياقتى. ويتكەنى, اسىرەسە جاستاردىڭ اراسىندا, وعان بۇگىندە سۇرانىس ارتىپ وتىرعانى انىق بايقالادى. كوپشىلىككە بەلگىلى, بۇعان دەيىن بىزدە «شاڭىراق», «باقىتتى وتباسى», تاعى باسقا جەڭىلدەتىلگەن يپوتەكا باعدارلامالارى جۇمىس ىستەپ كەلدى. بىراق «وتباسى بانك» اق ارقىلى بەرىلەتىن «وتاۋدىڭ» باستاپقى جارناسى دا, پايىز مولشەرلەمەسى دە كوڭىلگە قونىمدى كورىندى. «تارتا جەسەڭ تاي قالار» دەگەن عوي. ارينە, وتباسى بيۋدجەتىن ۇنەمدەي وتىرىپ, ءبىز وسى باعدارلامانى قولداپ, وعان قاتىسۋ ءۇشىن ءوتىنىش بەردىك» دەدى ول.
قۇپتارلىق, بىراق…
«وتاۋ» تۇرعىن ءۇي باعدارلاماسىنىڭ باسقا ايماقتارعا قاراعاندا استانا مەن الماتى قالاسى ءۇشىن ءبىر ارتىقشىلىعى سول, وبلىستارداعى تىلەك ءبىلدىرۋشى جاستارعا بەرىلەتىن اقشا كولەمى 18 ميلليون بولسا, ەلىمىزدىڭ 2 ءىرى مەگاپوليسىنىڭ جاستارى ءۇشىن 30 ميلليون تەڭگە بەرىلەدى. وسى نەگىزدە «وتباسى بانك» جىل سايىن 150 ملرد تەڭگە بولەتىن كورىنەدى.
باعدارلاماعا 30 ساۋىرگە دەيىن Baspana Market (otbasybank.kz)
پورتالى ارقىلى 18-63 جاس ارالىعىنداعى 20 مىڭعا تارتا ازامات ءوتىنىش بەرگەن. ەڭ باستى شارت – ۇمىتكەر اتالعان بانكتەن جىل جارىم ۋاقىت بۇرىن جيناق شوتىن اشىپ, وعان كەم دەگەندە 1 ميلليون تەڭگە اقشا سالۋى قاجەت. ءارى ءوز اتىندا جىلجىمايتىن مۇلكى بولماۋى ءتيىس. بۇل جەردە ءسابيى بار جاس وتباسىلاردىڭ باسقالارعا قاراعاندا بالل جيناۋدا مۇمكىنشىلىگى جوعارى. دەگەنمەن الەۋمەتتىك جەلىدەن وسى «وتاۋ» تۇرعىن ءۇي باعدارلاماسىنا قاتىستى كەيبىر پىكىرلەردى دە وقىپ قالدىق. ول, نەگىزىنەن, ايماقتاردا تۇراتىن جاستاردىڭ ۇسىنىسى مەن وي-تۇجىرىمى.
– باعدارلاما 9 پايىزبەن 19 جىلعا بەرىلەدى. ونى قۇپتارلىق دەلىك. الايدا «وتباسى بانك» 18 ملن تەڭگەگە دەيىنگى سومانى باسپانا سوماسىنىڭ 20 پايىزىن باستاپقى جارنا رەتىندە اۋدارعان كەزدە عانا بەرەدى. قازىر بارلىق جەردە تۇرعىن ءۇي قۇنى ءوسىپ كەتتى. 25-30 ميلليون تەڭگەدەن ارزان ەكى بولمەلى پاتەر تابۋ قيىن. سوندىقتان قالعان سومانى اركىم ءوز قالتاسىنان تولەۋىنە تۋرا كەلەدى. بۇل جاڭا عانا ءسابيلى بولىپ, ومىرگە ەندى عانا قادام باسىپ جاتقان كوپتەگەن جاس وتباسىنا قيىندىق كەلتىرەرى ءسوزسىز, – دەيدى پاۆلودار قالاسىنىڭ تۇرعىنى ەرسەيىت ءابىلۇلى.
كەنتاۋلىق رىسبەك ساتىبالدى وزىنە وسى باعدارلاماداعى «پاتەردى تەك پايدالانۋعا بەرىلگەن نەمەسە تۇرعىن ءۇي-كوممۋنالدىق كومپانياسىنىڭ كەپىلدىگىمەن سالىنىپ جاتقان قۇرىلىستان Baspana Marke (otbasybank.kz) پورتالى ارقىلى ساتىپ الۋعا بولادى» دەگەن شارتتىڭ ۇنامايتىنىن ايتادى. «ماعان بولىنگەن يپوتەكاعا ۇستىنە قارجى قوسىپ الاتىن بولعان سوڭ كەز كەلگەن قالادان ءوزىم قالاعان ءۇيدى الاتىنداي مۇمكىندىك تۋعىزباي ما؟» دەيدى ول.
تۇيتكىلدىڭ ءتۇيىنى تابىلسا…
باس قالادا كەيىنگى كەزدە جاستارعا تۇيتكىلدى ماسەلە بولىپ تۇرعان جايدىڭ ءبىرى – 2019 جىلى «استانالىق» بازارىنىڭ جانىنان ارنايى سالىنىپ, جۇمىسشى جاستارعا جالعا بەرىلگەن پاتەرلەر بولىپ تۇر. 5 جىلعا دەيىن جەڭىلدىكپەن العان وسى شاعىن بولمەلەردەگى جاس وتباسىلار قازىر ومىرگە الدى 2-3, سوڭى 1 بالادان اكەلىپ, ورنىعىپ قالدى. و باستا «باسپانا الۋعا قارجى جيناۋ ماقساتىندا» دەپ ۇلكەن ۇمىتپەن الىنعانمەن, سول جاستاردىڭ باسىم كوپشىلىگى قازىر جەتكىلىكتى قارجى جيناي الماعانىن ايتىپ, ءماجىلىس دەپۋتاتتارى مەن ۇكىمەتكە بازىناسىن جەتكىزە باستادى. وسى جايدىڭ كوتەرىلگەنىنە 7-8 اي ۋاقىت وتسە دە, قۇزىرلى ورگاندار تاراپىنان ەشقانداي جاۋاپ بولعان جوق. تەك جاقىندا عانا «وتباسى بانك» باسشىسى ءلاززات يبراگيموۆا جەڭىلدەتىلگەن باعدارلامامەن جالدامالى پاتەردە تۇرىپ جاتقان جاستاردىڭ دا «وتاۋ» تۇرعىن ءۇي باعدارلاماسى ارقىلى باسپانالى بولۋعا تولىق مۇمكىندىگى بار ەكەنىن ايتتى.
– بانك مالىمەتى بويىنشا بىزدە قازىر دەپوزيتكە كەم دەگەندە 1 ميلليون تەڭگە جيناۋ مەرزىمى 18 ايدان اسقان 310000-عا تارتا سالىمشى بار. سولاردىڭ قاتارىنا ورتاشا باعاداعى پاتەر قۇنىنىڭ 20 پايىزىن جيناعان كەز كەلگەن كليەنت ۇمىتكەر بولا الادى, – دەدى ول.
تاعى ءبىر ايتا كەتەرلىگى, جاڭا سالىنعان ۇيلەردە پاتەرلەر العاشقى ارلەنگەن كۇيىندە تاپسىرىلادى. سوندىقتان ونىڭ جوندەۋ جۇمىسىنا يەسى 40 پايىزعا دەيىن تۇتىنۋشى كرەديتىن الىپ ءجۇردى. بۇل قوسىمشا قيىندىق تۋعىزاتىن. بولاشاقتا مۇنداي قولايسىزدىق بولدىرماۋ ءۇشىن «وتباسى بانك» ءۇي العان ءوز كليەنتتەرىنە كرەديتىنىڭ 30 پايىزىن جوندەۋ جۇمىسىنا جۇمساۋعا رۇقسات بەرىپ وتىر. ەندىگى جەردە Baspana Market ارقىلى «وتباسى بانكتەن» الىنعان پاتەرلەر تۇتىنۋشىلارعا تازا, تولىق جوندەلگەن, دايىن كۇيىندە تاپسىرىلادى.
استانا قالاسىندا دا, ەلىمىز بويىنشا دا تۇرعىن ءۇي قۇرىلىسى قازىر قايتادان قارقىن الا باستادى. تەك ەلوردانىڭ وزىندە 600 مىڭعا تارتا جاس وتباسى ءۇي كەزەگىندە تۇرسا, «وتباسى بانك» ارقىلى جەڭىلدەتىلگەن «وتاۋ», «ناۋرىز» تۇرعىن ءۇي باعدارلامالارى ولاردىڭ تەزىرەك باسپانالى بولۋىنا سەپتىگىن تيگىزەر دەگەن سەنىم مول.
