كەشە نۇر-سۇلتان قالاسى اكىمدىگى جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى كوميسسيانىڭ وتىرىسى ءوتتى. جيىنعا مەملەكەتتىك قىزمەتكەرلەر, ءماسليحات دەپۋتاتتارى, ۇكىمەتتىك ەمەس ۇيىمدار, قوعامدىق بىرلەستىكتەر جانە ايەلدەر قاۋىمداستىعىنىڭ وكىلدەرى قاتىستى. مەملەكەت باسشىسى حالىققا جولداۋىندا اتاپ كورسەتكەن ماقسات-مىندەتتەرگە وراي اتالعان كوميسسيانىڭ بيىلعى جۇمىس جوسپارى تالقىلانىپ, قۇرامى بويىنشا بىرقاتار وزگەرىستەر ەنگىزىلدى.
ەلىمىزدەگى گەندەرلىك تەڭدىك, ايەلدەر مەن ەرلەر مۇمكىندىكتەرىن تەڭەستىرۋ, وتباسى ينستيتۋتىن كۇشەيتۋ, حالىقتىڭ دەنساۋلىعىن نىعايتۋ سياقتى وزەكتى ماسەلەلەردى اشىق تالقىلاۋعا ايگۇل مۇكەي, قارلىعاش ساركەنوۆا, قاراقات ابدەن, گۇلحان يساباەۆا, گۇلميرا شراحمەتوۆا, سانيا يرساليەۆا, اينۇر جۇگىنىسوۆا جانە باسقا دا ەسىمى ەلگە تانىمال ايەلدەر قاتىستى.
قۇزىرلى كوميسسيانىڭ وتباسى ينستيتۋتىن كۇشەيتۋ ماسەلەلەرى بويىنشا جاۋاپتى مۇشەسى بولىپ تاعايىندالعان اينۇر جۇگىنىسوۆا قازىرگى تاڭدا وتباسىلىق ماسەلەلەردىڭ ءورشىپ تۇرعانىن تىلگە تيەك ەتتى. «قوعامدا ايەلدىڭ اتقاراتىن ءرولى ەرەكشە. سول سەبەپتەن مۇنداي ماسەلەلەردى اشىپ قاراۋ كەرەك. قازىر وتباسى ماسەلەلەرىمەن اينالىساتىن ينستيتۋتتار بولماعاندىقتان, بۇل ماسەلە ءورشىپ تۇر. وعان اي سايىن ەمەس, جوسپارلى تۇردە كۇندەلىكتى شارالار وتكىزۋ كەرەك» دەدى اينۇر جۇگىنىسوۆا.
جيىندا ءسوز سويلەگەن نۇر-سۇلتان قالاسى اكىمىنىڭ ورىنباسارى بەرىك جاكەنوۆ كوميسيانىڭ وتىرىسى ءار توقسان سايىن ەكى رەت وتەتىنىن ايتتى. «بۇگىن نۇر-سۇلتان قالاسى اكىمدىگى جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى كوميسسيانىڭ ءى وتىرىسى ءوتتى. جۇمىس جوسپارى مەن كوميسسيا مۇشەلەرىن بەكىتتىك. وسى قۇراممەن جىل سوڭىنا دەيىن ءارتۇرلى ءىس-شارالاردى ىسكە اسىرامىز. الداعى ۋاقىتتا كوميسسيا وتىرىسى ءبىر توقساندا ەكى رەت وتەدى. نەگىزگى باسىمدىق ايەلدەر قۇقىعى مەن ولاردىڭ قوعامداعى رولىنە بەرىلىپ وتىر. وسى ماقساتتا جۇمىس ىستەمەكپىز» دەدى بەرىك جاكەنوۆ.
ايزادا جايىققىزى
