كەشە «جانۇيا» وتباسىن قولداۋ ورتالىعىندا استانا قالاسى اكىمدىگى جانىنداعى ايەلدەر ىستەرى جانە وتباسى-دەموگرافيالىق ساياسات جونىندەگى كوميسسيانىڭ قورىتىندى وتىرىسى ءوتتى.
استانا قالاسى اكىمىنىڭ ورىنباسارى ەسەت بايكەن توراعالىق ەتەتىن كوميسسيا قۇرامى 31 بەلسەندى ازاماتتان تۇرادى. ولاردىڭ قاتارىندا ەلوردادا ءتۇرلى سالادا ەڭبەك ەتىپ جۇرگەن بەلسەندى ازاماتتار, اتاپ ايتقاندا, مەملەكەتتىك قىزمەتكەرلەر, كاسىپكەرلەر, باسقارما باسشىلارى, ۇەۇ جەتەكشىلەرى, جۋرناليستەر جانە قالالىق ءماسليحات دەپۋتاتتارى بار. جالپى كوميسسيا جۇمىسى ءۇش توپقا ءبولىنىپ جۇرگىزىلەدى. ءبىرىنشىسى – «وتباسىلىق قۇندىلىقتار», ەكىنشى – «وتباسىنداعى قيىن جاعدايلاردى تالداۋ» جانە ءۇشىنشىسى – «ايەلدەر كوشباسشىلارى» توپتارى.
جيىنعا قاتىسقان كوميسسيا توراعاسىنىڭ ورىنباسارى, قوعام بەلسەندىسى نازگۇل ماقجان اتالعان كوميسسيا حالىقپەن بەتپە-بەت كەزدەسۋلەردى كوبەيتىپ, ەلدىڭ ماسەلەلەرىنە ءجيى قۇلاق تۇرەتىنىن جەتكىزدى.
«ۇلتتىق كوميسسيانىڭ بيىل 20-دان اسا وتىرىسى ءوتتى. ونىڭ سىرتىندا قالادا قىرىققا جۋىق دەموگرافيالىق ساياساتقا بايلانىستى ارنايى مەكەمە بار. انالار ءۇيى, داعدارىس ورتالىقتارى جانە باسقا دا ۇيىمداردىڭ جۇمىسىمەن تانىسىپ, اتالعان مەكەمەلەردىڭ جىلدىق قورىتىندىسى بۇگىنگى جيىندا تالقىلاندى. بيىل كوميسسيا تاراپىنان استانا قالاسىندا وتباسى باسقارماسىن قۇرۋ تۋرالى ۇسىنىس ۇلتتىق اگەنتتىككە جولداندى. ەندىگى ماقسات – وسى ماسەلەنى سوڭىنا دەيىن جەتكىزۋ. سونداي-اق بيىل 30-دان استام قيىن ومىرلىك جاعدايىنا تاپ بولعان بالانىڭ جاعدايىن رەتتەسۋگە كومەكتەستىك. مەنىڭشە, بۇل – كوميسسيا جۇمىسىنىڭ ۇلكەن ناتيجەسى. ءبىزدىڭ جۇمىسىمىز جاس جەتكىنشەكتەردىڭ بالالار ۇيىنە ءوتىپ كەتپەۋىنە جانە قوعامدا ءوز ورنىن تابۋعا سەپتەستى دەپ بىلەمىن» دەدى ن.ماقجان.
قابىلداۋ كەزىندە ءجيى كوتەرىلەتىن ەڭ وزەكتى تاقىرىپتار بويىنشا نازگۇل ماقجان كوميسسيا مۇشەسى, جۋرناليست ايگۇل مۇكەيمەن بىرگە «حابار» ارناسىندا جۇما سايىن ارنايى حابار اشىلعانىن دا جەتىستىككە بالايدى.
كوميسسيا مۇشەسى ىرزا تۇرسىنزادا اتالمىش كوميسسيا ءار وتىرىسىندا قوعام ماسەلەسىن تالقىلاپ قانا قويماي, مىندەتتى تۇردە ونىڭ شەشۋ جولىن باسشىلىق الاتىنىن جەتكىزدى.
«جۇمىسسىزدىق, كاسىپ باستاۋ, وتباسىنداعى كۇردەلى احۋالداردىڭ شەشىلۋىنە ءبىزدىڭ كوميسسيا نەگىز بولادى. بىرقاتار جۇمىستار اتقارىلىپ, جەمىسىن بەرۋدە. ماسەلەن, «باقىتتى وتباسى» ورتالىعىنىڭ ءوزى قانشاما قىز-كەلىنشىكتەردى اقىسىز وقىتىپ, بولاشاعىنا جول اشتى. ونداي مىسالدار وتە كوپ. سوندىقتان ءوزىمنىڭ ارىپتەستەرىمە اتقارعان قىزمەتى ءۇشىن العىسىمدى بىلدىرگىم كەلەدى» دەدى ول.
وتىرىس بارىسىندا جۇيەلى جۇمىستار جولعا قويىلعالى بەرى باسقا وبلىستارداعى كوميسسيالار ەلوردالىق ارىپتەستەرىنەن تاجىريبە جيناقتاۋعا ۇسىنىس بەرە باستاعانى جايىندا ءسوز قوزعالدى. كەلەسى جىلى مەملەكەتتىك ۇيىمدارمەن بىرلەسە اتقارىلاتىن جۇمىستىڭ جوسپارى دا ايتىلدى. جيىننىڭ سوڭىندا كوميسسيا مۇشەلەرى بەلسەندى قىزمەتى ءۇشىن العىس حاتپەن ماراپاتتالدى.
