ەلوردادا Nur Otan پارتياسى قر ءبىلىم جانە عىلىم مينيسترلىگى جانە Qazaq epos قوعامدىق قورىمەن بىرلەسە, ەل تاۋەلسىزدىگىنىڭ 30 جىلدىعىنا وراي ۇيىمداستىرعان «تۇلپار ءمىنىپ, تۋ العان!» رەسپۋبليكالىق بايقاۋى باستاۋ الدى.
جىر جارىسى 6-10-سىنىپ وقۋشىلارى اراسىندا 25 قىركۇيەك-5 قاراشا ارالىعىندا وتەدى. «ەدىگە باتىر» جىرىن جاتقا ايتۋدان وتەدى. قاتىسۋشىلار قوسىمشا التىن وردا مەملەكەتىنىڭ تاريحي وقيعالارىنا قاتىستى سۇراقتارعا جاۋاپ بەرىپ, جىردا كەزدەسەتىن كونەرگەن سوزدەردىڭ ءمان-ماعىناسىن ءتۇسىندىرىپ, قازاق ادەبيەتى ءپانىنىڭ وقۋ باعدارلاماسى نەگىزىندە ازىرلەنگەن سۇراقتارعا جاۋاپ بەرۋى ءتيىس.
«استانا بويىنشا بايقاۋعا 200-دەن اسا وقۋشى قاتىسادى. باستى ماقساتىمىز – وسكەلەڭ ۇرپاققا باتىرلار جىرىن ناسيحاتتاۋ. بۇل – ۇلتتىڭ جادىن جاڭعىرتىپ, وتكەنىمىزدى ونەگە ەتۋدىڭ جارقىن باستاماسى. جىر ارقىلى بالالاردىڭ بويىنا باتىرلىق وبرازداردى, سالت-ءداستۇرىمىزدى, مادەنيەتىمىزدى ءسىڭىرىپ, انا ءتىلىمىزدىڭ كەرەمەتتىلىگىن كورسەتە الامىز. ادەبي ءارى ينتەللەكتۋالدى بايقاۋ دەپ ايتۋعا بولادى. سەبەبى قاتىسۋشىلار لوگيكالىق سۇراقتارعا مۇدىرمەي جاۋاپ بەرۋى ءتيىس. 16 قاراشادا قالالىق كەزەڭ وتەدى. قاراشانىڭ سوڭىنا دەيىن جەڭىمپازداردىڭ ەسىمى بەلگىلى بولادى. ءبىر ەرەكشەلىگى, ءبىز قازاق ءتىلى مەن قازاق ادەبيەتى ءپانى مۇعالىمدەرىنىڭ مارتەبەسىن ارتتىرۋعا باسىمدىق بەردىك. سەبەبى جۇيرىك شىققان بالاعا عانا ەمەس, ونىڭ مۇعالىمىنە دە اقشالاي سىيلىق قاراستىرىلعان. باستى تالاپ – 47 بەتتەن تۇراتىن جىردى جاتقا ايتۋ» دەدى «تۇلپار ءمىنىپ, تۋ العان!» رەسپۋبليكالىق بايقاۋىنىڭ جەتەكشىسى ارمان ابدوللاەۆ.
جەڭىمپاز وقۋشىلار اقشالاي سىيلىقتارمەن ماراپاتتالادى. اۋداندىق كەزەڭدە:
1-ورىن – 150 مىڭ تەڭگە;
2-ورىن – 100 مىڭ تەڭگە;
3-ورىن – 50 مىڭ تەڭگە.
وبلىستىق (قالالىق) كەزەڭدە:
1-ورىن – 750 000 تەڭگە (بىرەۋ);
2-ورىن – 350 000 تەڭگە (ەكەۋ);
3-ورىن – 200 000 تەڭگە (ەكەۋ).
وبلىستىق (قالالىق) دەڭگەيدەگى جەڭىمپاز وقۋشىلاردىڭ مۇعالىمدەرىنە ارنالعان اقشالاي سىيلىقتار:
1-ورىن – 1 500 000 تەڭگە (بىرەۋ);
2-ورىن – 700 000 تەڭگە (ەكەۋ);
3-ورىن – 400 000 تەڭگە (ەكەۋ).
بايقاۋ تۋرالى تولىق اقپاراتپەن www.qazaqepos.com سايتىندا تانىسۋعا بولادى.
