نۇر-سۇلتان قالاسىنىڭ «دوستىق» ۇيىندە باۋىرلاس وزبەك حالقىنىڭ انا ءتىلى كۇنىنە ارنالعان دوڭگەلەك ۇستەل ءوتتى.
شاراعا وزبەكستان رەسپۋبليكاسىنىڭ قازاقستانداعى توتەنشە جانە وكىلەتتى ەلشىسى سايديكروم نيازحودجاەۆ, نۇر-سۇلتان قالاسى ىشكى ساياسات باسقارماسىنىڭ باسشىسى تالعات راحمانبەردى, قحا توراعاسىنىڭ ورىنباسارى, وزبەك ەتنو-مادەني بىرلەستىگىنىڭ توراعاسى شەرزود پۋلاتوۆ جانە وزگە دە قوعامدىق ۇيىمدار وكىلدەرى مەن لينگۆيست-عالىمدار قاتىستى.
«ءتىل جوق جەردە مەملەكەت جوق. مەملەكەت جوق جەردە ۇلت جوق. سوندىقتان بارلىقتارىڭىزدى مەرەكەلەرىڭىزبەن قۇتتىقتاپ, قۋانىشتارىڭىزدى بولىسەمىن. قالا اكىمى التاي كولگىنوۆ سىزدەرگە ۇلكەن سالەمى مەن ىستىق ىقىلاسىن جولدادى. الەمنىڭ قانشاما مەملەكەتىندە بولساق تا, الدىمىزدان ەڭ ءبىرىنشى كەزدەسەتىنى – وزبەك باۋىرلارىمىزدىڭ اسحاناسى. وزبەك حالقى دەسە, ەسىمىزگە مىزعىماس دوستىعىمىز تۇسەدى. وزبەك ءتىلىنىڭ بۇگىنگى ايتۋلى مەرەكەسى قۇتتى بولسىن, ەلوردامىزداعى ەتنو-مادەني بىرلەستىكتىڭ جۇمىستارىنا بەرەكە تىلەيمىن» دەدى نۇر-سۇلتان قالاسى ىشكى ساياسات باسقارماسىنىڭ باسشىسى تالعات راحمانبەردى.
قحا توراعاسىنىڭ ورىنباسارى, وزبەك ەتنو-مادەني بىرلەستىگىنىڭ توراعاسى شەرزود پۋلاتوۆ دوڭگەلەك ۇستەلدىڭ اياسىندا تالقىلانعان ماسەلەلەر بولاشاقتا ءوز ناتيجەسىن بەرەتىنىن جەتكىزدى. «ءبىزدىڭ بارلىق جەتىستىكتەرىمىز بەن جەڭىستەرىمىزدىڭ مىزعىماس تۇعىرى – تاتۋلىق پەن تۇتاستىق. ءتۇبى ءبىر تۇركى ەلدەرى ءبىر شاڭىراقتىڭ استىندا ايرانداي ۇيىپ وتىرمىز. وسىنداي بەيبىت اسپانىمىزدا ارقاشان بۇگىنگىدەي مەرەكە كۇندەرى تويلانا بەرسىن. ەلوردامىزدا 23 ەتنومادەني بىرلەستىك بار. سولاردىڭ ىشىندەگى سانى جاعىنان كوبى دە – وزبەك حالقىنىڭ بىرلەستىگى. ياعني, وزبەك تىلىنە دەگەن قۇرمەت ەكى ەلدىڭ مىزعىماس دوستىعىنىڭ كەپىلى بولا بەرمەك» دەدى شەرزود پۋلاتوۆ.
كوكتەم قارقىن
