ەلوردانىڭ ەسىل وزەنى جانە اقبۇلاق پەن سارىبۇلاقتى تازارتۋ كەزىندە 63 توننا قوقىس قالدىقتارى جينالعان.
«بيىل ءبىزدىڭ مەكەمە العاش رەت قالا اۋماعىنداعى وزەندەردى تازارتۋ جۇمىسىن جۇرگىزە باستادى. تەك ءبىر ايدىڭ ىشىندە ەسىل وزەنى مەن اقبۇلاق پەن سارىبۇلاقتان 63 توننا قوقىس جينالدى. ونىڭ جارتىسى بالدىر, ال قالعان جارتىسى تەمەكى تۇقىلى, پاكەت, پلاستيكالىق بوتەلكەلەر مەن باسقا دا تۇرمىستىق قالدىقتار» دەيدى «ەسىل استانا» كاسىپورنىنىڭ ديرەكتورى قانات الين. ونىڭ ايتۋىنشا, ەلوردا اۋماعىنداعى سۋ جولدارىنداعى ەڭ كوپ قوقىس سارىبۇلاقتا جينالادى. اتاپ ايتقاندا, ن.تىلەنديەۆ كوشەسىنەن باستاپ تەمىرجولعا دەيىنگى ارالىق ەڭ كوپ لاستاناتىن جەر ەكەن.
«سارىبۇلاق بۇلاعىنىڭ ۇزىندىعى 16 شاقىرىمدى قۇرايدى. بۇلاقتىڭ ەسىل وزەنىنەن تىلەنديەۆ كوشەسىنە دەيىنگى اۋماعى توسەمتاسپەن قاپتالعان, جيەكتەرى قورشالعان. الداعى ۋاقىتتا ەلورداداعى بارلىق سۋ جولدارىنىڭ جاعالارىن جوندەپ, تۇزەۋ جوسپاردا بار» دەيدى مەكەمە ديرەكتورى.
بۇگىندە استانا وزەندەرىن تازارتۋ جۇمىسىنا كۇن سايىن 50-گە جۋىق جۇمىسشى شىعادى. تەحنيكانى جەتكىزۋ مۇمكىندىگى بولماۋىنا بايلانىستى سارىبۇلاقتاعى تازالىق شارالارى تەك قولمەن جۇرگىزىلەدى.
