ءار زامان ءوز قاھارماندارىن تۋدىرماي تۇرا المايدى. الدىڭعى تولقىن اعا بۋىن كەيىنگى جاس تولقىنعا ءاردايىم ۇلگى كورسەتۋى كەرەك. جاس ۇرپاق باتىرلىقتىڭ نە ەكەنىن ءوز ەلى مەن ءوز اعالارىنان كورىپ وسكەنى عانيبەت. ول ەرتەڭ وزىنەن كەيىنگى ۇرپاققا الدىندا وتكەن سول جاقسىلارمەن مارقايىپ, سولاردى دارىپتەيدى. بۇل, ءبىر جاعىنان, پاتريوتتىق تاربيە بولسا, ەكىنشى جاعىنان, ەلدىڭ قاۋىپسىزدىگى مەن بەرىكتىگى. جاستارعا ۇلگى بولۋ – قازىرگى اعا بۋىن ءۇشىن زور جاۋاپكەرشىلىك.
تەكتى توپىراقتان تۇلەگەن سونداي تۇلعالاردىڭ ءبىرى, كەۋدەسى ماراپات بەلگىلەرگە تولى, قازاقستان رەسپۋبليكاسى قارۋلى كۇشتەرىنىڭ ارداگەرى, وتستاۆكاداعى پولكوۆنيك شەنىندە جەتپىستىڭ جوتاسىنا شىققالى وتىرعان ارداقتى ازامات – قازكەي ىسقاقۇلى دانگۋلوۆ دەر ەدىك.
قازكەي ىسقاقۇلى 1951 جىلدىڭ 4 قاراشاسىندا تسەلينوگراد وبلىسى اقمولا قالاسىندا دۇنيە ەسىگىن اشقان. 1968 جىلى قورعالجىن كەنتىندەگى №1 ورتا مەكتەپتى ءتامامداپ, تالاپتى جاس 1970 جىلى كەڭەس وداعىنىڭ مارشالى ي.س.كونەۆ اتىنداعى الماتى جوعارى جالپى اسكەري كوماندالىق ۋچيليششەسىنە وقۋعا تۇسەدى.
كوپتەگەن تانىمال قازاقستاندىق اسكەري جەتەكشىلەر – جوعارى اسكەري ۋچيليششە تۇلەكتەرى, ماسەلەن گەنەرال-پولكوۆنيك ا.قاسىموۆ, گەنەرال-لەيتەنانت ب.ەرتاەۆ, ا.تاسبولاتوۆتار قاتار وقىعان قازكەي دانگۋلوۆتى جاقسى قىرىنان تانيدى.
1970 جىلدان 2021 جىلعا دەيىن قازكەي ىسقاقۇلى اسكەري سالادا 50 جىلدان استام قىزمەت اتقاردى. پولكوۆنيك دانگۋلوۆ كۋرسانتتان قازاقستان رەسپۋبليكاسى قارۋلى كۇشتەرى باس شتابى دەپارتامەنتى باستىعىنىڭ ورىنباسارىنا دەيىنگى جولدان ءوتتى. 1974 جىلى اجاكۋ-دى بىتىرگەن بويدا سول جىلدىڭ قىركۇيەگىنەن 1975 جىلدىڭ قاراشاسىنا دەيىن كەڭەس وفيتسەرىنىڭ ءداستۇرلى جولىنان ءوتتى – ججم وقۋ ۆزۆودىنىڭ كومانديرى, ءبىر جىلدان كەيىن وقۋ روتاسىنىڭ كومانديرى بولىپ تاعايىندالدى. 1977 جىلدان 1979 جىلعا دەيىن موزامبيك حالىق رەسپۋبليكاسىندا شەتەلدىك ءىسساپاردا بولدى, وندا موتوجاياۋاسكەر بولىمشەلەرىنىڭ كومانديرلەرىن دايارلاۋ جونىندەگى مامان قىزمەتىن اتقاردى.
وتانىمىزدىڭ قورعانىس قابىلەتىن نىعايتۋ ىسىندەگى ەرەن ەڭبەگى ءۇشىن پولكوۆنيك قازكەي كوپتەگەن مەملەكەتتىك ناگرادالارمەن ماراپاتتالدى.
ۋاقىت تاپشى دەگەننىڭ وزىندە, ول جاس ۇرپاق ءۇشىن تاجىريبە مەن ءبىلىم بەرۋگە قاشان دا ىقىلاستى. سونىڭ ايعاعى ىسپەتتى, 2013 جىلدان باستاپ قازىرگى ۋاقىتقا دەيىن م.س.نارىكباەۆ اتىنداعى قازاق گۋمانيتارلىق زاڭ ۋنيۆەرسيتەتىنىڭ اسكەري كافەدراسىندا جۇمىس ىستەيدى.
ءبىز وسىنداي تۇلعامەن قاسيەتتى قارا شاڭىراق استىندا بىرگە ارىپتەس بولىپ جۇرگەنىمىزگە بەك ريزامىز. ونىڭ قازاقستان رەسپۋبليكاسىنىڭ قارۋلى كۇشتەرىندە وزىندىك سارا سوقپاعى بار تۇلعا ەكەنىن ماقتانىش ەتەمىز.
«شاكىرتسىز – ۇستاز تۇل» دەگەن ءسوز بار. كوپتەگەن شاكىرتكە ءبىلىم بەرگەن, دۇرىس باعىت كورسەتكەن قازكەي ىسقاقۇلىنىڭ شاكىرتتەرى وسى كۇنى بيىك بەلەستەردى باعىندىرۋدا. پاراساتتى پولكوۆنيك ءبىلىم بەرگەن اسكەري كافەدرانىڭ وقۋ ۆزۆودتارىنىڭ كوپتەگەن تۇلەكتەرى قازىر قر قارۋلى كۇشتەرى قاتارىندا اسكەري قىزمەت ەتۋدە. ماسەلەن, كاپيتان ءاليحان قۇدايبەرگەنوۆ نۇر-سۇلتان قالاسىنىڭ 68665 اسكەري بولىمىندە, اعا لەيتەنانت ءبىرجان ءجۇنىسوۆ اقمولا وبلىسىنىڭ قورعانىس ىستەرى جونىندەگى دەپارتامەنتىندە قىزمەت ەتەدى.
ءار ادام عۇمىرىندا ونىڭ ءومىر جولىن ايقىندايتىن ۇستازدار مەن جەتەكشىلەر بولادى. سولاردىڭ كومەگىمەن جاستار ءوز مۇمكىندىگىن جەتىلدىرىپ, ەلگە قىزمەت ەتەدى. سونداي ۇستاز – قازكەي ىسقاقۇلىنىڭ عۇمىرى ۇزاق بولسىن دەپ تىلەيمىز.
امانگەلدى ىبىراەۆ,
م.نارىكباەۆ اتىنداعى قازگزۋ
اسكەري كافەدرا باسشىسى,
پولكوۆنيك
