«استانا وپەرانىڭ» باس ديريجەرى, قازاقستاننىڭ ەڭبەك سىڭىرگەن قايراتكەرى, مەملەكەتتىك سىيلىقتىڭ لاۋرەاتى, الەمگە ايگىلى ماەسترو الان بورىباەۆتىڭ «پاريجدەن كادەسىي» اتتى اۆتورلىق باعدارلاماسىمەن 14-15 شىلدەدە «استانا وپەرانىڭ» IX تەاترلىق ماۋسىمىن اياقتايدى.
بۇل كونتسەرت تىڭدارمانعا ءبىر گالا-وپەرا اياسىندا جيىرمادان اسا تانىمال, سونداي-اق فرانتسۋز كومپوزيتورلارىنىڭ وتە سيرەك ورىندالاتىن جاۋھارلارىمەن تانىسۋعا مۇمكىندىك بەرەدى. بارلىق شىعارمالار XIX عاسىرداعى فرانتسۋز مادەني ومىرىمەن ءوزارا تىعىز بايلانىستى. «بۇل جوبا – XIX عاسىردىڭ فرانتسۋز رومانتيكالىق وپەراسى سەكىلدى شوقتىعى بيىك مادەني قۇبىلىستى بۇكىل كەش بويى قامتۋعا جاساعان شىعارماشىلىق تالپىنىس. بۇل ۇعىمنىڭ كەڭدىگى سونشا, وسىناۋ جالپىلانعان تەرميننىڭ ىشىندە ول كوپتەگەن باعىتتارعا بولىنەدى. گۋنونىڭ «فاۋست», بيزەنىڭ «كارمەن» نەمەسە دەليبتىڭ «لاكمە» سەكىلدى ءۇش اتاقتى فرانتسۋز وپەراسىن اتاساق تا, ولاردىڭ رومانتيزم, رەاليزم جانە وريەنتاليزم سەكىلدى ءتۇرلى اعىمداردى بىلدىرەتىنىن كورەمىز. ءبىزدىڭ كونتسەرتىمىزدە ۇسىنىلعان بارلىق كومپوزيتورلاردى نە بىرىكتىرەدى دەسەك, ول جوعارى تالعامعا, تاپقىرلىققا, كەمەلدىككە, مانەر كوركەمدىگىنە, اۋەن اسەمدىگىنە, درامالىق كورىنىستەردىڭ كوزتارتارلىعىنا, اۋەندى ءارى ۇيلەسىمدى اينالىمداردىڭ تولدارالىعىنا قۇشتارلىق. ماسەلەن, ۇلى جورج بيزە سوزگە ەكپىندى دۇرىس تۇسىرمەگەندە ءسوز ءوزى شىعارعان اۋەنگە «قونىپ» تۇرسا, ول اۋەن ءۇشىن ەكپىندى سولاي قاتە كۇيىندە قالدىرا سالادى. بىراق جوعارىدا ايتىپ وتكەنىمدەي, ۇيرەنشىكتى بولماۋ – فرانتسۋز وپەراسى مانەرىنىڭ ەڭ ماڭىزدى قۇراۋشى تۇستارىنىڭ ءبىرى» دەيدى الان بورىباەۆ.
ايتا كەتۋ كەرەك, قازاقستان مەن فرانتسيانى, اسىرەسە ءپاريجدى بەرىك شىعارماشىلىق كوپىرلەر بايلانىستىرادى. امىرە قاشاۋباەۆتىڭ 1925 جىلى پاريجدەگى ونەر كورسەتۋىن ەكى ەلدىڭ مادەني قاتىناستارىنىڭ باستاۋى دەپ ەسەپتەۋگە بولادى. ول ءبىزدىڭ ونەرىمىزدى ەۋروپالىق ساحنادا تانىستىرعان العاشقى قازاقستاندىق ورىنداۋشى اتاندى. پاريجدە ۇلى قازاق ويشىلى اباي, جامبىل جاباەۆ, مۇحتار اۋەزوۆتىڭ مەرەيتويلارى دا وتكەن بولاتىن, سونداي-اق يۋنەسكو-نىڭ شتاب-پاتەرىندە قازاقتىڭ ۇلى كومپوزيتورى احمەت جۇبانوۆتىڭ 100 جىلدىق مەرەيتويى ءوتتى, وعان الان بورىباەۆتىڭ ءوزى ديريجەرلىك ەتتى.
