سەنات سپيكەرى ماۋلەن اشىمباەۆتىڭ توراعالىعىمەن پالاتا بيۋروسىنىڭ وتىرىسى ءوتتى. وندا دەپۋتاتتار 2021 جىلعى 4 قاراشاداعى سەناتتىڭ جالپى وتىرىسىندا قاراۋعا ۇسىنىلعان كۇن ءتارتىبىن بەكىتتى.
پالاتانىڭ الداعى جالپى وتىرىسىندا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە قىلمىستىق جولمەن الىنعان كىرىستەردى زاڭداستىرۋعا (جىلىستاتۋعا) جانە تەرروريزمدى قارجىلاندىرۋعا قارسى ءىس-قيمىل ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى قارالادى.
زاڭ جوباسى كىرىستەردى جىلىستاتۋعا جانە تەرروريزمدى قارجىلاندىرۋعا قارسى ءىس-قيمىل ماسەلەلەرىنە قاتىستى زاڭنامالاردى, سونداي-اق ۇلتتىق قاۋىپسىزدىكتى قامتاماسىز ەتۋ جۇيەسىن جەتىلدىرۋدى كوزدەيدى. وسى قۇجات ارقىلى جاريا لاۋازىمدى تۇلعالار ىسكە اسىراتىن وپەراتسيالار باقىلاۋعا الىنادى. ياعني جاۋاپتى مەملەكەتتىك لاۋازىمداعى جانە مەملەكەتتىك مەكەمەلەردە نەمەسە كۆازيمەملەكەتتىك سەكتورلاردا باسقارۋ قىزمەتىن اتقاراتىن ازاماتتاردىڭ وپەراتسيالارى باقىلاۋدا بولادى.
سونىمەن قاتار بيۋرو مۇشەلەرى «اۋىل شارۋاشىلىعىن دامىتۋدىڭ وزەكتى ماسەلەلەرى مەن پەرسپەكتيۆالارى» تاقىرىبىنا ارنالعان پارلامەنتتىك تىڭداۋعا دايىندىق بارىسىن پىسىقتادى. پارلامەنتتىك تىڭداۋ 3 جەلتوقساندا وتكىزىلەدى دەپ جوسپارلانۋدا.
«پارلامەنتتىك تىڭداۋدا مەملەكەت باسشىسىنىڭ جولداۋىندا ايتىلعان اۋىل شارۋاشىلىعىن دامىتۋعا قاتىستى وزەكتى ماسەلەلەر تالقىلانادى. وسى سالاداعى جاھاندىق سىن-قاتەرلەر مەن الەمدىك ترەندتەرگە دە نازار اۋدارامىز. جاقىندا پرەزيدەنتىمىز ۇلتتىق جوبالار تىزبەسىن بەكىتتى. جوبالاردىڭ ءبىرى اگروونەركاسىپتىك كەشەندى دامىتۋعا ارنالعانى بەلگىلى. تىڭداۋ كەزىندە اتالعان ۇلتتىق جوبانى ءتيىمدى جۇزەگە اسىرۋ ماسەلەسى دە نازاردان تىس قالمايدى. سوندىقتان بۇل ءىس-شارانى جوعارى دەڭگەيدە جانە مازمۇندى تۇردە وتكىزۋىمىز كەرەك» دەدى ماۋلەن اشىمباەۆ.
